Tic Pa Lukwena 24

Lok ma kidoto ki Paulo

1Ka nino abic okato, ajwaka madit Anania obino ki ludongo mogo, kacel ki lapilida mo ma nyinge Tertulo, ci gutero adotgi inyim laloyo pi doto Paulo. 2Ka dong kilwongo Paulo, ci Tertulo ocako adote kun waco ni:

“Laloyo Maber, ladit Pwelici, wabedo ki kuc piri nia wa con, dok itamo pi rokwa, ikelo alokaloka mapol ma okonyowa 3ikit yo ducu ki i kabedo ducu, wan bene wajolo ki yomcwiny madwong, ladit. 4Ento pe dong agal wii, abako doga boti pi kicani iwiny lokwa ma cegocegoni. 5Wanongo ni dano man lanek piny, en aye lakel jemo ikin Lujudaya ducu ma i lobo ducu, en latel wi dul pa Lunajaret. 6En bene otemo pyedo wa Ot pa Lubanga madite, ci wamake woko. [Onongo wamito ngolo kop ikome kun walubu cikwa ni, 7ento kapten Licia obino omaye woko ki i cingwa tektek, 8ci ociko ni ludote omyero guo inyimi.] Ka in ki komi ipenye, ibiniang ki bote lok ducu ma wadote iye.”

9Lujudaya bene guribe i adot meno, kun gimoko ni lok man ducu tye kitmeno.

Paulo opido loke inyim Pwelici

10Ka laloyo ocime ni oloki, Paulo odok iye ni, “Ladit, angeyo ni ibedo kangolo kop i rok man pi mwaka malac, ma omiyo apido loka inyimi ki yomcwiny. 11Macalo in bene itwero nongo ka ipenyo dano, wel nino ma okato nia ikare ma acito i Jerucalem ka woro Lubanga peya okato apar wiye aryo. 12Pe ginongo ni atye ka pyem ki dano mo, nyo tubu lwak, kadi i Ot pa Lubanga, nyo i kacoke me lega, nyo i dye taun madit. 13Dok bene pe gitwero nyutu ni lok ma gikelo ikoma kombedi tye kakare. 14Ento aye lok man boti ni, aworo Lubanga pa kwarowa kun alubu kit Yo ma gin kilwongo ni dul. Aye lok ducu ma kicoyo i Cik pa Moses ki i buk pa lunebi. 15Pi niyena ikom Lubanga atye ki gen ni dano gibicer woko, jo ma kitgi atir wa ki jo ma kitgi pe atir, wa gin bene gitye ki kit gen acelu. 16Pimeno an bene atemo mada kare ducu wek abed ma cwinya leng inyim Lubanga ki inyim dano. 171

Ma dong abedo cen pi mwaka mapolpol acito i Jerucalem ka tero mot bot jo me roka pi konyo lucan, ki ka tyero gitum. 18Ikare ma atye katiyo man, gunonga i Ot pa Lubanga madong atyeko lonye woko ikit mamite. Pe abedo ki lwak mo dok wo bene obedo pe. Ento Lujudaya mogo ma gua ki i Acia onongo bene gitye. 19Gin aye onongo omyero gubed kany inyimi wek gukel adotgi, ka gitye ki lok mo ikoma. 20Nyo wek jo man ki komgi gunyut gin marac ma gunongo ikoma ikare ma acung inyim jo me Otkot. 212 Tye lok man keken, ikare ma acung ikin gi adange ni, ‘Pi lok kom cer pa jo ma oto aye omiyo wutye kangolo lok ikoma tin.’”

22Ento Pwelici obedo kingec ma oromo ikom Yo pa Rwot, ci pe otyeko lok woko cut. Owaco ni, “Abingolo kopwu ka kapten Licia bibino kany.” 23Ka ociko ladit mony maloyo dano miya ni omyero ogwok Paulo ibuc ento obed labongo ayela mo, pe gigeng lureme ka gimito mine kony.

Paulo inyim Pwelici ki Drucila

24Ka kare okato manok, Pwelici obino ki dakone Drucila ma anyira Judaya. Olwongo Paulo, ci obedo ka winye kaloko lok me niye ikom Kricito Yecu. 25Ikare ma en tye kalok ikom kit ma atir ki gwoke kekene, ki ngolo kop ma bibedo ikare me anyim, lworo omako Pwelici omiyo owaco ni, “Kong dong iciti; ka dok anongo kare ci abilwongi.” 26Onongo bene en geno ni Paulo bimiye lim, pieno obedo ka lwonge jwijwi ci boko lok kwede. 27Ento ka mwaka aryo okato, Porcio Festo oleyo katyen Pwelici. Pwelici onongo mito ni Lujudaya gupwoye, omiyo oweko Paulo ibuc.