Tic Pa Lukwena 25

Paulo okoko apil ni omyero kiter loke inyim laloc madit

1Ikare ma Festo obino i lobo ma kimiye ni en oloo, inge nino adek, en oa ki i Cecaria, ocito i Jerucalem. 2Ajwaki madito pa Lubanga ki ludito me lobo Judaya gutite pi lok ikom Paulo, ci gubako dogi bote 3ni otim ber oye ocwal Paulo i Jerucalem, kun onongo guyubu ni dano gibikiye ci gineke woko i wanga yoo. 4Ento Festo ogamo ni kitye kagwoko Paulo i Cecaria, en bene emito dok kunu ikare macoki. 5Ci owaci, “Pimeno, jo ma ikinwu ma gitye ki twero myero gucit kweda. Ka onongo roc mo tye ikom laco meno, wek gudote bota.”

6Festo obedo i Jerucalem pi nino maromo aboro nyo apar, ka odok i Cecaria. Orwone obedo ikom me ngolo kop, ci ociko ni gikel Paulo. 7Ka dong obino, Lujudaya ma gua i Jerucalem gucung ma gurume dyere, gudote ki lwak adot mapol mapek ma pe gitwero moko kite. 8Paulo opido ni, “Peya abalo lok mo ikom Cik pa Lujudaya kadi Ot pa Lubanga, kadi wa bot laloc madit Cecar.” 9Ento Festo onongo mito ni Lujudaya gupwoye, ci owaco bot Paulo ni, “Imito giteri i Jerucalem wek angol kop ikomi pi adot magi ki kunu?” 10Paulo ogamo ni, “Acung kany inyim kom me ngolo kop pa Cecar, en aye kama myero gingola iye kop. Pe abalo bal mo bot Lujudaya, meno in bene ingeyo maber. 11Ka abalo bal ma roma to, lok mo pe, gitwero neka, pe akwero; ento ka adotgi ikoma tere pe, ci pe tye ngat mo matwero miya i cinggi. Akoko apil bot Cecar.” 12Ka Festo otyeko poro lok ki lumemba me Otkot ma mege ci, odok iye ni, “Ikoko apil bot Cecar; ibicito bot Cecar.”

Paulo inyim Agripa ki Bernike

13Ka nino okato manok, rwot Agripa ki Bernike guo i Cecaria ci Festo ojolo gi. 14Ka gudike kunu pi kare malac, Festo oketo adot ma kikelo ikom Paulo inyim rwot kun waco ni, “Tye laco mo kany ma Pwelici oweko ibuc. 15Ikare ma atye i Jerucalem, ajwaki madito pa Lubanga ki ludongo pa Lujudaya gutita lok ikome, ci gulega ni angol ni kop oloye. 16Adok iye botgi ni, pe obedo kitwa wan Luroma me miyo dano mo i cing ludote ma peya kimiye kare me cung inyimgi wang ki wang wek opid pidone ikom lok ma kidote iye. 17Ka gubino kany, ci an bene pe adike, ento orwone abedo ikom me ngolo kop ci aciko ni kikele. 18Ka ludote gua kalok, pe gukelo adot mo ikome ma mako bal mo marac, macalo yam atamo; 19ento gubedo ka laro lok kwede ma dok ikom dinigi, ki ikom ngat mo ma nyinge Yecu mayam oto, ma Paulo waco ni tye makwo. 20Yeko telok macalo meno oloya, ma omiyo apenye ka en mito cito i Jerucalem wek kicingol loke ki kunu. 21Ento Paulo okoko apil ni omyero kigwoke ibuc pi kuru ngolo kop pa laloc madit ma won deyoni. Ci aciko ni kigwoke nio ka abicwale bot Cecar.” 22Agripa owaco bot Festo ni, “An kikoma amito winyo lok pa danonu ka twere.” En ogamo ni, “Diki ibiwinyo loke.”

23Orwone Agripa ki Bernike gucito ki deyo madwong, ci gudonyo i kicika me winyo ngolo kop kacel ki kapten mogo me mony ki jo ma gingene ma i gang meno. Ka Festo ociko, ci gikelo Paulo. 24Festo owaco ni, “Rwot Agripa ki wun ducu ma wutye kwedwa kany, wun dong wuneno dano man ma lwak Lujudaya ducu gubako dogi bota pire i Jerucalem wa ki kany bene, kun gidange ni pe myero obed kwo. 25Ento an pe anongo otimo gin mo maromo miyo kingole kop me to. Dong macalo en aye gire okoko apil pi laloc madit, an bene amoko ni abicwale. 26Ento peya atye ki lok mo kikome ma myero aco ikome bot rwoda, en gin ma omiyo akele inyimwu, ki makato ne inyimi, in Rwot Agripa, wek ka wabipenye abed ki lok mo me acoya. 27Pien aneno ni konye mo pe me cwalo lamabuc ka pe ginyutu lok mo ma atir ikome.”