Tic Pa Lukwena 26

Paulo opido loke inyim Agripa

1Agripa owaco bot Paulo ni, “Kiye ni ilok giri piri keni.” Ci Paulo oryeyo bade ka ocako pidone ma lube kuman:

2“Ladit, tin koma gum mada me cung inyimi, in rwot Agripa, pi pido loka ikom lok ducu ma Lujudaya gudota iye. 3Makato ducu pien in ingeyo maber tutwal kit pa Lujudaya ducu ki lok ma gilaro ikin gi ken gi; pimeno alegi ni idi cwinyi wek iwiny loka mot ma cwinyi opye.

4Lujudaya ducu gingeyo kit kwona nia ka tinona. Pi kwona ducu, cake i acakine, abedo ikin rokwa ki i Jerucalem bene. 51 Gingeyo nia wa con, ka giye tucu ne, ni abedo kalubu kit pa lugwok dini matek makato ma ikinwa, ma gin aye Luparicayo. 6Kombedi acung kany ka pido kopa pi geno cike ma Lubanga omiyo bot kwariwa, 7pi geno gin ma kakawa apar wiye aryo ducu gigeno ni gibinongo, kun giworo Lubanga ki cwinygi ducu dyewor ki dyeceng. Lujudaya gitye ka pida pi gen man, ai rwot, macalo obedo bal! 8Pingo pe wutwero ye ni Lubanga cero jo ma oto? 92

Kadi wa an bene yam atamo ni myero atii matek me lweny ikom nying Yecu me Najaret. 10Yam atimo kitmeno i Jerucalem; ci atweyo jo pa Lubanga mapol ibuc kun atiyo ki twer ma anongo ki bot ajwaki madito. An ki koma abolo kwir wek ki nekgi ka onongo ki ngolo lok me to iwigi. 11Tyen mapol aketo can ikomgi i kacoke ducu, kun atemo diyo gi ki tek me yeto nying Kricito; dok agere ikomgi, ayelogi wa i taun madito pa lurok.

Paulo otito kit ma en eloke kwede bot Kricito

(Tic 9:1-19; 22:6-16)

12Kitmeno awoto Damaciko kun atye ki twero ki cik ma ajwaki madito gumiya. 13I cwiny dyeceng, ai rwot, aneno ki i wanga yoo ka dero a ki ipolo maryeny matar makato ceng; oryeny oboyo koma dyere ki jo ma guwoto kweda bene. 14Wan ducu wapoto piny, ci awinyo dwon ma loko kweda i leb Ibru ni, ‘Caulo, Caulo, iyela pingo? Itye kaketo ret ikomi keni, macalo twon ma gweyo dim.’ 15Agamo ni, ‘In anga, Rwot?’ Ci Rwot owaco ni, ‘An aye Yecu ma itye kayelani.’ 16Ento a icung, pien anen boti pi lok man pi keti ibed latica ki lacaden pi gin ma ineno ma dok ikoma, ki pi gin ma ibineno ka dok anyute boti ikare me anyim. 17Abilari ki bot jo me rokwu, ki bot Lurok bene ma abiori botgi. 18Ibiyabo wanggi wek gua woko ki i colpiny, gubed i dero, gua woko ki ite twero pa Catan, guloke bot Lubanga, wek owek balgi ci gunong kabedo ikin jo ma Lubanga olonyogi gudoko jone, pi niyegi ikoma.

Paulo otito pi tice

19Kitmeno, ai Rwot Agripa, pe akwero winyo cik ma gimiya ma oa ki ipolo, 203 ento acako tucu lok, ma okwongo i Damaciko, ka lacen i Jerucalem ki lobo Judaya ducu ki bot Lurok bene, kun atito botgi ni myero gungut ikom balgi, ci guloke gudwog cen bot Lubanga, dok guti kit tim ma nyutu ni dong gungut. 21Pi tyen lok man aye omiyo Lujudaya gumaka i Ot pa Lubanga, ci gutemo neka woko. 22Nio wa ikare man abedo ka limo kony ma a ki bot Lubanga; kombedi dong acung kany pi miyo caden bot jo matino ki bot ludito. Lok ma aloko en gin ma lunebi wa ki Moses bene guwaco ni bitime keken, pe lok mo mapat, 234 ni Kricito ma Lubanga oyero, myero onen can, dok ni en bikwongo cer ki ikin jo ma oto wek otit bot rokwa ki bot Lurok bene pi dero ma biryeny menyogi.”

Paulo otemo ywayo tam pa Agripa wek oye Yecu

24Ka dong otyeko pidone kitmeno, Festo ogere ki lok ni, “Paulo, in lapoya. Kwano lok mapol mada omiyo ipo apoya.” 25Ento Paulo ogamo ni, “Pe an lapoya, ladit Festo, ento atye kaloko lok me ada keken kun wiya tye katic. 26Rwot Agripa ngeyo lok man ducu, atwero lok bote labongo lworo mo. Angeyo ni pe tye lok mo ma okato ite, pien loke pe otime i mung. 27Rwot Agripa, in iye lok pa lunebi? Angeyo ni iye lokgi.” 28Agripa owaco bot Paulo ni, “Itamo ni iloka adok lalub Kricito pi kare manok mo kit man?” 29Paulo ogamo ni, “Kadi pi kare manok nyo madwong, kono alego Lubanga ni idok macalo an, pe in keken ento wa dano ducu ma gitye kawinyo loka tin, ento labongo nyor ni aye.”

30I nge meno rwot ki laloyo ki Bernike ki jo ma gubedo kwedgi gua malo. 31Ka dong gucito woko, guloko keken gi ni, “Laco man pe otimo gin mo ma rome to, kadi bedo ibuc.” 32Ci Agripa owaco bot Festo ni, “Kono nene dano man pe okoko apil bot Cecar, kono gitwero gonye woko.”