Tic Pa Lukwena 27

Paulo ocako wote me cito i Roma

1Ma dong kimoko ni wakwang wacit i Itali, kimiyo Paulo ki lumabuc mukene i cing ladit mo ma nyinge Julio ma lalo dano miya ikin dul mony ma kilwongo ni pa Augucito. 2Wadonyo i mel mo ma oa ki i Adramitio madong cok a kun kwang dok tung wangwat mogo ma i dog nam me lobo Acia. Wanywako yoo ki Aristako, Lamakedonia ma ganggi tye Tecalonika. 3Orwone wao Cidon, ci Julio otimo Paulo maber mada, oye ki en me wot ka limo lureme wek gugwoke. 4Wa a ki kunu, wakwang warabo nget Caiprac, pien yamo okemowa. 5Ka dong wangolo nam atir inget lobo Cilicia ki Pampulia, wao i Mira ma i lobo Licia. 6Ki kunu ladit mony onongo mel ma oa ki i Alekijanderia ma tye kacito Itali, ci omiyo wadonyo iye. 7Wakwang pi nino mapol, ci wao i Kunida ki tek. Yamo nongo ogengowa wot anyim atir, ma omiyo warabo nget Kurete cok ki Calamone. 8Warabo nget Kurete ki tek ka wao i kabedo ma kilwongo ni Wang Wat Mabeco, macok ki gang ma nyinge Lacea.

9Watero kare malac kunu nio ka kit me wot i nam dong odoko tek. Dong kit ma nino madit me rii kec bene onongo dong okato woko ni, Paulo omiyo botgi tam, 10kun owaco ni, “Ludito, aneno ni wotwani bibedo rac ma bikelo lanye pa jami mapol, pe me yec ma kitingo i mel keken, ento wa mel kikome dok kadi wa kwowa bene.” 11Ento ladit mony oketo cwinye i lok pa ladit maloyo mel ki lok pa won mel, makato lok ma Paulo owaco. 12Wang Wat meno nongo pe ber me bedo iye ikare me koyo, pimeno pol pa dano gutamo ni bedo ber me a ki kunu wek ka twere ki o Poinike, ma en aye wangwat me Kurete ma nyime okemo kupiny me kupotoceng ki kumalo me kupotoceng, wek giri kunu pi kare me koyo.

Yamo otago nam marac tutwal

13Ikare ma yamo ma a tung acuc ocako kodo mot ma opye, ci co ma imel gutamo ni dong orwate ki tamgi. Guywayo lajuk mel woko ki i pii, ci gucako kwang gurabo Kurete macok ki tura. 14Ento ka kare okato manok keken, yamo lapiru mager tutwal ocoro, ma kilwongo ni Yurakwilo, okodo nia ki iwi tura. 15Lapiru man omako mel, opango wiye woko ma pe dong twero kemo yamo, ci waweko mel dong woto dok kama yamo terowa malube ki kama yamo okemo. 16Ka warabo nget latin cula mo ma nyinge Kauda ci watemo ki tek me laro yeya me mel man. 17Ka lukwang dong guywayo yeya gutingo ki i pii, gukelo i mel, ci guywayo tol mogo gutweyo te mel piny ki ite pii. Lacen guywayo bongo mamalo piny, wek yamo pe omii mel owot oyot tutwal, pien gilworo ni gwok nyo gibidonyo i kweyo me Cirtic i dog nam me Libya, ci guweko yamo otero mel kumeno. 18Ka dong lapiru otwago pii matek, ci orwone lutic imel gucako kwanyo jami ma i mel gubolo woko i pii. 19Inino me adeke gucako bolo jami tic me mel woko i pii ki cinggi. 20Wari pi nino mapol ma pe waneno ceng nyo lakalatwe, yamo bene obedo ka kodo mager tutwal, ci lacen pe dong wabedo ki gen mo ni wabilare.

21Ka dong gurii pi kare malac ma pe gicamo cam mo, Paulo obino ocung i dyegi ci owaco ni, “Luditona, kono yam wuwinyo doga ma pe wua ki i Kurete, kono pe wapoto i can man ki lanye pa jami. 22Ento koni acikowu ni wudii cwinywu pien kwo pa ngat mo ikinwu pe birwenyo, ento mel aye. 23Pien tin i dyewor man lamalaika pa Lubanga ma an a danone, ma an aworoni, obino ocung kangeta, 24ci owaca ni, ‘Paulo, pe ibed ki lworo. In myero icung inyim Cecar; nen Lubanga dong otyeko laro kwo pa dano ducu ma itye kawot kwedgi.’ 25Pimeno wudii cwinywu, pien an ageno Lubanga, angeyo ni bitime kit ma kiwaco botani. 26Ento mel aye biyoke ki cula mo.”

27Ka nino oromo apar wiye angwen, ma yamo terowa i dye nam me Adria, i cwiny dyewor, lukwang mel gutamo ni tye lobo mo macok kwedwa. 28Ka gupimo tut me pii ci oromo puti miya acel ki pyere aryo. Ka dong kidire manok, dok giporo tut me pii ci oromo puti pyere abongwen. 29Gulworo ni gwok nyo mel bicore ikom got, ci gubolo lajuk mel angwen i pii ki tung tere, ci gulego ni piny myero kong oru. 30Ka lukwang mel guyenyo yo me lwi woko ki i mel, ento ka dong gucwalo yeya i nam kun gitimo ma calo gimito bolo lajuk yo tung nyime. 31Ento Paulo owaco bot ladit mony ki bot lumony ni, “Ka pe jo man gubedo i mel; ci pe wubilare.” 32Kadok lumony gungolo tol yeya, guweko yeya okwang ocito.

33Ka piny dong mito ruu, Paulo odiyogi wek gin ducu gucam cam mo, ci owaco ni, “Tin dong nino me apar wiye angwene ma wubedo ka rii kec ma cwinywu ongabe angaba, ma pe wucamo gin mo. 34Pimeno abako doga botwu ni wucam cam mo wek wunong teko; pien kadi wa yerwic mo acel pe birwenyo ki bot dano mo acel ikinwu.” 35Ka dong owaco lok man, okwanyo mugati, omiyo pwoc bot Lubanga inyimgi ducu ci ocako camone. 36Ka gin ducu cwinygi odoko tek ci gucamo cam pirgi ken gi. 37Onongo wan ducu ma wabedo i mel waromo dano miya aryo ki pyere abiro wiye abicel. 38Ka dong gucamo guyeng, ci dong guyako jami woko ki i mel kun gibolo ngano woko i nam.

Mel otur woko

39Ka piny dong oru, lukwang mel pe gungeyo lobo ma guo iye, ento guneno gul nam ma kweyo tye iye ci gutamo ni ka twere myero gikel mel i dog tura kunu. 40Gungolo tol ma mako lajuk ducu, guweko odong i nam; ikare meno bene gugonyo tol ma onongo gutweyo ki pol1 ma giwiro ki mel, ka dong gungabo bongo matidi ki tung nyime wek yamo omaki, ci guweko mel omol owoto kun kemo tura. 41Ento ka guo kama pii mager aryo oromo iye, ci nyim mel otwome ki lobo ma ite pii, ogeto woko liking, te mel bene pii otage oturu woko. 42Acikari guyubu ni kinek lumabuc woko ducu, wek acel mo pe okwang oring woko matwal, 43ento ladit mony ka mito laro Paulo, ojukugi pe oye ki gin me tic ki tamginu. Ociko ni jo ma gingeyo kwang gukwore i pii wi atii gucak kwang wek gukat iwi tura, 44ka lacen jo ma gudong gulub korgi iwi bao mogo nyo iwi dul mel. Kitmeno gin ducu gukonye keken gi gukato iwi tura.