Tic Pa Lukwena 28

Paulo i cula nam ma kilwongo Malta

1Ka dong watyeko lare, ci waniang ni cula meno kilwongo ni Malta. 2Wegi lobo meno gunyutu botwa mar me kica ma pe nen atata. Gin gujolowa, dok gumoko mac pi wan ducu, pien onongo kot ocako cwer ki koyo bene onongo ngic. 3Paulo ogwaro rido yen, obolo i mac, ci twol lacocodo omwome woko pi lyeto ka orine i cinge. 4Ka wegi lobo meno guneno twol mulyere ki i bade, gucako lok keken gi ni, “Iye ada, laco man laneko. Kadi ka olare ki i nam, langolkop atir pe oye ni obed kwo.” 5Ento Paulo oyengo bade obolo kwede twol i mac ma pe otime gin mo marac. 6Gukuru kwe kun gitamo ni bade bikwot woko nyo bipoto piny ci to woko cut; ento ka dong gukuru pi kare malac ci guneno ni gin mo marac pe otime ikome, guloko tamgi, ci gucako waco ni en obedo lubanga mo.

7Ladit maloyo cula meno, laco ma nyinge Publio, onongo tye ki ngome cok ki kunu, ci ojolowa, ogwokowa pi nino adek. 8Won Publio onongo two kun obedo kawinyo lyeto ki cado bene. Paulo olime, olego pire kun keto cinge ikome, ci ocange. 9Ikare ma man otime, lutwo mukene ducu ma i culanu gubino bote ci gucang. 10Gumiyowa mot mapol; ka doki ikare ma wacako wot guketo jami mamite pi konyowa i mel.

Paulo oo i Roma

11I nge dwe adek wamede ki wotwa i mel mo ma oa ki Alekijanderia matye ki cal Rudi inyime, ma odike i cula meno pi kare me koyo. 12Wakwang wao Cirakuca, wadike kunu pi nino adek. 13Waa ki kunu, warabo piny nio Regio. Ma nino okato acel, yamo ma a tung acuc okodo, orwone wao Puteoli. 14Wanongo utmego kunu, ci gulwongowa, wabedo botgi nino abiro, ci wao i Roma. 15Ka utmego ma i Roma guwinyo pirwa, gubino wa i Cuk pa Appio, ki i kabedo ma kilwongo ni Ot Welo Adek pi jolowa. Ka Paulo onenogi, opwoyo Lubanga ci cwinye odoko tek. 16Ka dong wao Roma, kiye ni Paulo obed i ode kene ki acikari ma gwoke.

Paulo otito lok pa Lubanga i Roma

17Ka nino okato adek, Paulo olwongo ludito pa Lujudaya ma gibedo kunu. Ka gucoke bote, en owaco botgi ni, “Utmego, kadi bed pe atimo gin mo marac ikom rokwa nyo ikom kit pa kwariwa, ento kimaka i Jerucalem kitweya, ci kimiya i cing Luroma. 18Ka Luroma gutyeko ngiyo loka, gumito ni kigonya woko, pien onongo pe tye tyen lok mo maromo neka. 191 Ento ka Lujudaya gucere iye, meno omiyo akoko apil bot Cecar, pien yo mukene dong onongo peke, kadi bed pe atye ki adot mo ma apido ki roka. 20Meno aye gin ma omiyo amito ni anenwu ci alok kwedwu, pien kitweya ki nyor man pi gin ma gen pa Jo Icrael ocung iye.” 21Gugamo ni, “Pe walimo waraga mo ma oa ki Jerucalem ma loko ikomi, pe tye ngat mo ikin omegiwa ma oa kunu ma okelo lok mo ikomi, nyo ma oloko lok mo marac ikomi. 22Ento wamito waniang tami ki boti, pien wangeyo ni i kabedo ducu kiloko lok marac ikom dul man ma in icwako ni.”

23Gin gumoko nino ci gubino bote i ot ma en bedo iye. Jo mapol ma welgi kato wel jo ma obino nino ca. Ci Paulo oyeko lok ducu kore ki kore cake odiko nio wa otyeno kun tito lok kom ker pa Lubanga atyer ci otemo ywayo tamgi wek guye Yecu ki lok ma okwanyo ki i Cik pa Moses ki i buk pa lunebi. 24Jo mukene guye lok ma en otitoni ento jo mukene gukwero ye. 25Ci gucako ket woko ma kin gi opoke woko kitmeno ka dong Paulo oloko lok acel ni, “Cwiny Maleng yam oloko kakare bot kwariwu ki i dog lanebi Icaya ni, 262

‘Cit iwac ki rok man ni:

Winyone mere wubiwinyo,

ento pe wubiniang teloke;

nenone wubineno,

ento pe wubingeyo gin matye.

27Pien jo me rok man cwinygi ongil woko,

itgi bene oding woko,

dok gumiyo wanggi woko

wek pe ginen ki wanggi,

pe bene giwinyo ki itgi,

pe bene gilwodo lok i cwinygi,

pe giloke gidwog bota acang gi.’

28Myero dong wunge ni, lare man ma Lubanga omiyo dong kicwalo woko bot Lurok; gin gibiwinyo.” [29Ka owaco lok meno, Lujudaya guket woko kun gitye ka pyem matek ikin gi keken gi.]

30Paulo obedo kunu pi mwaka aryo kun kwo ki lime kene ci jolo lwak jo ducu ma bino bote. 31Obedo katito lok me ker pa Lubanga, pwonyo bene lok kom Rwot Yecu Kricito atyer ma pe kijuke.