Jo Roma 1

1Waraga man oa ki bot Paulo ma en latic pa Yecu Kricito, ma Lubanga olwongo me bedo lakwena, ka dong kimiye tic me tito lok me Kwena Maber ma oa ki bot Lubanga. 2Lok me Kwena Maber onongo yam Lubanga ociko pire con ilok ma lunebi yam gutito, dok bene onongo kicoyo woko i ginacoya maleng. 3Lok me Kwena Maber man kicoyo okemo Wode. Ikit me kom, Wode man yam kinywale ikin likwayo pa Daudi, 4ento pi Cwiny Maleng, Lubanga onyutu en obedo Wode pi tek ma ocere kwede ki ikin jo ma oto, en aye Yecu Kricito Rwotwa. 5Pire omiyo wan walimo kica pa Lubanga, ki tic me bedo lukwena wek wamii dano ma i rok ducu gubed luwiny pi niyegi inyinge; 6ma wun bene wutye ikin gi, wun dano madong kilwongowu me bedo jo pa Yecu Kricito.

7Bot wun jo ducu ma wutye i Roma ma Lubanga marowu, dok olwongowu me bedo jone maleng ma en aye oyero.

Lubanga Wonwa ki Rwotwa Yecu Kricito omiwu kica ki kuc.

Lega me miyo pwoc

8Mukwongo apwoyo Lubangana i Yecu Kricito pi wun ducu, pien niyewu dong kitucu pire oromo wi lobo woko ducu. 9Lubanga ma aworo ki icwinya kun bene atito lok me Kwena Maber ikom Wode, en aye cadena ma ngeyo ni atucu nyingwu ilegana ikare ducu ma pe akeng. 10Alego ni ka twere, ka Lubanga oye, olo myero anong yo me bino botwu ikare ni. 11Atye kaparo me nenowu mada, wek apok botwu mot mogo me cwiny me jingowu wek wubed matek. 12Gin ma aloko en aye ni wun kacel ki an wabikonye lawangacel; en aye ni niyena bikonyowu, ki niyewu bene bikonya. 131

Gin ma amito wunge, utmegina, en aye ni onongo abedo kamito tyen mapol ni myero abin botwu, (kadi wa onyo bene gin mo pud tye ma kagenga bino woko), wek alok jo mogo ikinwu me ye Yecu kit ma atimo ikin Lurok mukene ducu. 14Atye ki banya bot Lugrik ki bot Lurok ma gin kwiya piny, bot luryeko ki bot luming. 15Man aye gin ma omiyo atye ki miti me tito lok me Kwena Maber botwu bene wun jo ma wubedo i Roma.

Teko matye i Kwena Maber

16Lewic pe maka pi lok me Kwena Maber, ma en aye teko pa Lubanga ma laro jo matye ki niye, mukwongo Lujudaya, ka dong Lugrik bene. 172 Pien lok me Kwena Maber nyutu kit ma Lubanga kwano ni dano bedo ma kite atir, ma man time pi niye keken, cake ki i acakine nio kwede wa i agikine. Kit macalo kicoyo ni, “Dano ma kite atir pi niye bibedo kwo.”

Bal pa dano

18Pien dong akemo pa Lubanga onyute woko ki ipolo kun bino ikom jo ma lutim maracu ducu ma pe gin woro Lubanga, ma gin tye kagengo lok ada ni pe otii tic, pi timgi maracuni. 19Pien gin ma dano twero ngeyone ikom Lubanga dong onen woko kamaleng botgi, Lubanga kikome aye onyutu botgi. 20Nicake ikare ma kicweyo lobo, kit pa Lubanga ma onongo pe nen, ma en aye tekone ma pe gik, ki dit ma en Lubanga tye kwede dong onen woko, kun kingeye nia ki i jami ducu ma en otiyo. Ma omiyo dano dong pe gitye ki lok mo ma myero gin opid pi gengo ngegi. 213 Pien kadi bed onongo yam gin ngeyo Lubanga, ento pe guwore macalo Lubanga, pe bene gupwoye, ento tamgi odwokogi igin ma pe konyo, ki tam ma i cwinygi me mingomingo bene dong ocido woko odoko col. 22Gin lwonge ken gi ni gin luryeko, ento gin guloke gudoko luming. 234 Ci gin guloko deyo pa Lubanga ma pe to woko, kun giporo ki cal pa dano ma to, nyo ki cal pa winyo, nyo pa lee, nyo pa twol gu.

24En ma omiyo Lubanga otenyogi woko liyak imiti me caro matye i cwinygi, wek gin gubal kwede deyo me komgi keken gi. 25Gin guloko ada mamako kom Lubanga woko ki goba, kun guworo dok gutiyo bot ginacweya, ma ka woro ki tic bot Lacwec, ma pwoc myero kimii bote nakanaka! Amen.

26Pi tyen lok man omiyo Lubanga otenyogi itamgi ma ogom ma gin tamo makelo lewic. Kadi wa mon gi bene guweko bedo ki co ikit ma kinywalogi ni gin gubed kwedeni, ento dok gucako butu ki mon wadigi. 27Ki co bene kitmeno guweko bedo ki mon woko ikit ma kinywalogi ni myero gubed kwedeni, ento cwinygi puke ikom co wadigi, ma gimito ni gibut ki co wadgi, ma meno tim me lewic mada, pimeno gin gilimo can malit ikomgi ken gi pi kit balgi meno.

28Dong kit macalo gin pe guneno gin mo ma konyogi ingeyo Lubangani, Lubanga bene otenyogi woko itamgi ma konye pekeni, wek dong gutim gin ma pe myero. 29Gin onongo yam gupong ki kwayi bal mapol, tim maracu, woro me lim, ki rac cwiny. Gupong bene ki cwiny me nyeko, nek, daa, goba, ki kwarcwiny, dok gin bene lukwot dano, 30luyet dano, dok jo ma dag Lubanga. Gubedo lungala, jo ma lyere, jo ma wake, lurot kit me timo tim maracu, jo ma pe winyo lunyodogi. 31Gin jo ma gikwiya piny, jo ma pe gene, pe gitye ki mar i cwinygi, kica bene pe makogi ikom dano. 32Kadi bed gin ngeyo cik pa Lubanga ni jo ma timo gin macalo meno myero kinekgi woko, ento gin pe gitimo jami macalo meno atima keken, kono gin gipwoyo apwoya bene jo matye katimone.