Jo Roma 2

Ngolo kop pa Lubanga

11

Pimeno, gin mo ma myero ipid pire dong peke, kadi in anga, ka ingolo kop ikom dano lawoti. Pien pi kop ma ingolo ikom dano mukene ca, nongo dong ingolo kop oloyi woko, pien in langolkop ki komi bene itimo kit gin acelu. 2Wan wangeyo ni Lubanga ngolo kop atir dok kakare ka ongolo kop oloyo jo ma gitimo gin macalo meno. 3Dong in dano ma ingolo kop ikom jo mukene ma gitimo gin macalo menoni, kun in kikomi bene itimo, itamo ni ibibwot ki ingolo kop pa Lubanga? 4Nyo icayo kica pa Lubanga ki kit ma en juke kwede pi bal pa dano, ki kit ma en diyo kwede cwinye? Adada in ingeyo ni kica pa Lubanga tye me teli wek ingut ikom bali. 5Ento pi nganga ma icwinyi, ma idag ngut kwede ni, itye kakano giri akemo pa Lubanga ikomi keni ma bibino inino me akemo, ikare ma kibinyutu iye ngolo kop ma atir pa Lubanga. 62 Lubanga biculu dano acel acel kun lubu kit tic ma dano meno otiyo. 7En bimiyo kwo ma pe tum bot jo ma gudiyo cwinygi kun gicane me tiyo gin maber, pi yenyo deyo ki woro, ki kwo ma bedo naka. 8Ento bot jo ma giparo pirgi ken gi, ma pe gilubu lok ada, ento gilubu gigi kit marac, Lubanga biculugi kun onyo akemone ki kinigane mager atika ikomgi. 9Can ki remcwiny bidiyo dano ducu ma timo gin marac, mukwongo Lujudaya ka dong jo Grik bene. 10Ento dano ducu ma timo gin maber gin binongo deyo ki woro ki kuc, mukwongo Lujudaya ka dong jo Grik bene. 113 Pien Lubanga gire pe ki apokapoka ikin dano pi kit ma dano tye kwede.

12Jo ma gutimo bal labongo Cik pa Moses, gibito labongo cik bene; ento jo ma gutimo bal ite Cik, kibingolo kop ikomgi kun lubu Cik. 13Pien pe jo ma winyo lok me Cik awinya ki itgi aye jo ma kitgi atir inyim Lubanga, ento jo ma gitiyo gin ma Cik mito aye kibikwanogi ni gin jo ma kitgi atir. 14Ka Lurok ma gin peke ki Cik pa Moses gitiyo gin ma Cik mito pi kitgi ma kinywalogi kwede, meno nongo dong gin kikomgi gitye ki Cik i cwinygi, kadi bed Cik pe kimiyo botgi. 15Ginyutu ni gin ma cik mito dong kicoyo woko i cwinygi, dok ngec ma gitye kwede ma nyutu botgi balgi bene aye bedo caden tye ada, kun tamgi bedo kayoke ayoka; mogo ngolo ni kop oloyogi, ki mogo nongo cwakogi acwaka. 16Bibedo kitmeno inino meno ma Lubanga bingolo kop ikom dano pi gin ma gutiyo i mung, mamiyo Yecu Kricito aye ngolo, kun lubu lok me Kwena Maber ma atye katitoneni.

Lujudaya ki Cik pa Moses

17Ento ka ilwonge keni ni in Lajudaya, kun ijenge ikom Cik, dok bene iwake pi Lubanga, 18dok bene ingeyo gin ma en mito, dok ipwoyo gin maber makato, pien dong kipwonyi woko ki lok mamako cik, 19dong ki tung boti, in ingeyo ni in latel lutowang, in dero ma menyo dano ma gitye ipiny macol, 20dok bene in aye ma tiro luming, in lapwony pa lutino, pien itye ki ngec ma oromo ki lok ada mamako Cik kikome. 21Dong in lapwony ma ipwonyo jo mukene, pe ipwonye kekeni bo? Itito lok ni, “Pe ikwal”, in kono omyero ikwal kwo? 22Itito ni, “Pe i tim abor”, in kono myero itim abor? Cwinyi dag woro jogi, ento in omyero ikwal gin matye i ot jok? 23Iwake pi Cik, ento ituru Cik kun icayo Lubanga? 244 Tye kit macalo yam kicoyo iginacoya ni, “Kiyeto nying Lubanga ikin Lurok pirwu.”

25Lire konyo kace ilubu Cik, ento ka ituru cik, dwoki cen ibedo calo pe onongo kiliri. 26Dong ka inen dano ma pe kiliro olubu gin ma kiciko matye i Cik, dano ma pe kilironu pe kibikwane calo ngat ma kiliro? 27Meno miyo dano ma pe kilirogi, ma gilubu Cik, bingolo kop loyi, pien itye ki Cik mayam dong kicoyo woko acoya, dok bene kiliri, ento pud ituru Cik. 28Pien dano manen Lajudaya ki woko keken meno pe Lajudaya kikome; dok bene lire manen ki woko ikom, meno pe lire kikome. 295 Lajudaya kikome aye dano ma bedo Lajudaya ki i cwinye, dok bene lire me ada aye lire ma dano bedo kwede ki i cwinye, ma en aye tic pa Cwiny Maleng, pe nukuta ma kicoyo acoya. Dong ngat macalo meno kadi bed dano pe gipwoye, ento Lubanga pwoye.