Jo Roma 3

1Ka dong tye kitmeno, ci Lajudaya kato jo mukeneni ki gin ngo? Nyo kony me lire kono tye ka kwene? 2Konyo matek i yo ducu. Mukwongo, Lujudaya yam kimiyo botgi lok pa Lubanga ma pire tek kun kigenogi ni gibigwoko. 3Lok man bedo ningning ka jo mogo ikin Lujudaya onongo yam gin pe gigene? Kit macalo gin pe geneni, itamoni man bene twero miyo Lubanga doko ngat ma pe gene? 41 Pe kitmeno! Lubanga tye ki ada, kadi bed dano ducu lugoba, kit macalo kicoyo ni,

“Wek gin ma iloko onyut ni kiti atir,

dok bene wek ilo lok ka kingolo kop ikomi.”

5Ento ka kitwa ma pe atirni nyutu ni kit Lubanga tye atir, ci wan dok wabiwaco lok ango? Wabiwaco mono ni Lubanga pe kite atir pi keto akemone ikomwa? (Man atye kalok ikit pa dano.) 6Pe kitmeno! Ka Lubanga pe kite atir pi keto akemo ikomwa, ci en twero ngolo kop ikom dano ma gibedo iwi lobo ningning? 7Kace gobanani miyo ada pa Lubanga mede ameda kun bene kelo deyo bote, ci pingo pud dok kingolo kop ikoma calo an labalo? 8Pingo pe dong watim gin marac wek gin maber oa iye? Pien tye jo mogo ma gicoko dogwa ki lok goba ma giwaco ni wan waloko kitmeno. Ka kingolo kop oloyo jo macalo meno nongo kingolo kakare.

Ngat mo ma kite atir peke

9Man teloke ango doki? Wan Lujudaya mono watye maber makato Lurok woko? Pe wa ki acel; pien dong anyutu woko i loka me adot ni, Lujudaya ki jo Grik ducu bal dong oloyogi woko. 102 Kit macalo yam kicoyo ni,

“Ngat mo ma kite atir peke, kadi ki acel!

11Ngat mo ma niang bene peke,

ngat mo ma yenyo Lubanga bene peke.

12Gin ducu dong gungak woko, gudoko jo ma kitgi racu;

pe tye ngat mo ma tiyo gin maber,

peke kadi ki acel. 133

Gungamo doggi calo bur lyel ma twolo,

kun giloko lok mamit me bwolo dano.

Lok ma giloko obedo calo kwir pa ororo. 144

Lokgi ducu ma giloko obedo lok makec ma giceno ki dano acena. 155

Tyengi yot giringo kwede madwir kaneko dano.

16Balo lobo ki cwercwiny keken aye tye i yogi ducu;

17pe gingeyo yo me kuc. 186

Pe bene gilworo Lubanga.”

19Kombedi dong wangeyo ni gin ma Cik oloko, loko bot jo matye ite Cik, wek dano ducu gubed labongo lageng ngegi. Wek wi lobo ducu obed ite ngolo kop pa Lubanga. 207 Pien pe kibikwano dano mo ni kite atir inyim Lubanga pi lubu Cik; pien Cik tice aye me niango dano wek gunge balgi.

Dano kikwano ni kite atir pi niye

21Ento kombedi kit ma Lubanga kwano ki dano ni kite atir dong onen woko kamaleng, ni pe a ki ilubu Cik. Kadi bed onongo Cik pa Moses ki coc pa lunebi bene yam otito pire. 22Lubanga kwano dano ni kite atir pi niyene ikom Yecu Kricito, dok bene en tiyo kitmeno pi jo ducu ma ye Kricito, labongo apokapoka mo. 23Pien dano ducu gubalo, dok pe gio ikom deyo pa Lubanga. 24Lubanga kwanogi ni kitgi atir macalo mot, ma omiyo ki gin pi kit ma Yecu olarogi kwede. 25Lubanga oketo Yecu me bedo gin kok me kwanyo bal ki remone, pi jo ma ye en, wek enyut kwede kite ma atirni, pien Lubanga yam ojuke kene, pe otimo gin mo ikom bal mayam dano gutimo con. 26Lubanga onyut kit ma atir ikare man, ni en kikome kite atir, dok en kwano dano ni kite atir pi ye Yecu.

27Ka wakewa kono dong tye kwene? Peke. Pi gwoko Cik? Pe kitmeno gire, ento pi kit me niye. 28Ma omiyo wamoko tamwa ni dano kikwano ni kite atir pi niyene, ento pe pi tic me cobo Cik. 29Onyo Lubanga mono tye pi Lujudaya keken? Pe en bene Lubanga pa Lurok? Eyo, adada, en bene Lubanga pa Lurok. 308 Pien Lubanga tye acel, en bikwano dano ma kilirogi ni kitgi atir pi niyegi, dok bene bikwano jo ma pe kilirogi ni kitgi atir pi niyegi. 31Wan mono watye kabolo Cik pa Moses woko piman? Pe kumeno wa ki acel, wan giwa wamoko Cik amoka.