Jo Roma 4

Lanyut ikom Abraim

1Wan mono wabiwaco lok ango ikom Abraim, ma en kwarowani? 2Kono yam kikwano Abraim ni kite atir pi tic ma en otiyo, kono onongo en tye ki gin mo ma en nyate pire, ento pe inyim Lubanga. 31 Dong coc mayam kicoyo iginacoya waco lok ango? Ginacoya waco ni, “Abraim onongo tye ki niye ikom Lubanga, omiyo kikwane ni en dano ma kite atir.” 4Dano ma tiyo tic pe kimiye mucarane macalo mot, ento kimiye macalo jami ma en otiyo pire. 5Ento dano matye ki niye ma pe jenge ikom tice ma en tiyo, kun ye Ngat ma kwano jo ma pe lworo Lubanga ni kitgi atir pi niyegi, kit dano macalo meno aye kikwano ni kite atir pi niyene. 6I kit acelu, Daudi bene yam oloko pi yomcwiny ma dano tye kwede, ka Lubanga okwane ni en dano ma kite atir labongo tic mo ma en otiyo, macalo yam kicoyo ni, 72

“Jo madong kiweko balgi gitye ki yomcwiny,

ma balgi bene dong kikwanyo woko;

8dano ma Rwot dong pe kwano bal mo ikome tye ki yomcwiny.”

9Yomcwiny man mono tye pi jo ma kilirogi, nyo pi jo ma pe kilirogi bene? Ginacoya wawaco ni, pi niye omiyo kikwano Abraim ni kite atir. 10Onongo mono yam kikwano ikome ningning? Onongo mono kikwane ma pud pe kilire, nyo lacen ma onongo dong kityeko lire woko? Pe madong kityeko lire, ento ma pud peya kilire. 113 Kimiye lire macalo lanyut onyo lanen ma nyutu ni kikwane ni kite atir pi niyene ma onongo peya kilire. Meno miyo Abraim bedo kwaro dano ducu ma giye ma peya kilirogi, wek gin bene kikwangi ni kitgi atir. 12Abraim bene kwaro pa jo ma kilirogi, pe pa dano ma kilirogi alira keken, ento pa jo ma kilirogi ma gilubu bene niye mayam kwarowa Abraim obedo kwede ma onongo pud pe kilire.

Cike pa Lubanga cobe pi niye

134

Cike ma onongo yam Lubanga ociko bot Abraim ki likwaye ni, wi lobo ducu bibedo meggi. Lubanga yam ociko man, pe ni Abraim yam olubu Cik, ento ni en onongo oketo niyene ikom Lubanga, ka dong kikwane ni kite atir. 145 Kace jo ma lubu Cik gin aye jo ma wi loboni ducu bedo meggi, kono niye dong konye peke, ki cike bene kono konye peke. 15Pien Cik miyo akemo mako Lubanga ikom dano, ento kama cik pe iye, turu cik bene peke. 166

Meno aye gin ma omiyo cike pa Lubanga ocung ikom niye, wek obed me kica, dok pi moko cikene bot likwayo pa Abraim ducu, pe bot jo ma lubu Cik keken, ento kadi wa bot jo ma gibedo ki niye macalo Abraim. Pien en kwarowa ducu, 177 kit macalo yam kicoyo ni, “Dong aketi wek ibed kwaro rok mapol.” Cike man dong kimoko inyim Lubanga mayam Abraim oyeni, en Lubanga mamiyo kwo ikom jo ma oto, dok bene ma lwongo gin mogo mayam komgi peke miyo gibedo tye. 188 Abraim yam oye, kun onongo oketo gene ikom gin manen calo pe kitwero geno, omiyo en odoko kwaro rok mapol, kit macalo yam kicoyo ni, “Likwayu bibedo mapol macalo lakalatwer.” 199 En pe obedo nyap iniyene kadi bed en onongo oneno ni kome dong romaroma ki gin ma oto, pien mwakane onongo dong cok romo miya acel kulu, dok bene medo ikom meno, dakone Cara onongo lalur. 20Niyene pe odok cen, dok bene en pe obedo kacabe acaba itame ikom cike pa Lubanga, ento niyene omede ameda odoko matek, kun en miyo deyo bot Lubanga. 21Abraim onongo tye ki niye matut i cwinye ni, Lubanga twero tiyo gin ma ocike pire. 22Pi niyene “omiyo kikwane ni en dano ma kite atir.”

23Ento lok man ni, “omiyo kikwane” onongo pe kicoyo pi en kene, 24ento kicoyo pi wan bene. Wan bene kibikwanowa ni kitwa atir, wan jo madong waketo niyewa ikom Lubanga mayam ocero Rwotwa Yecu Kricito ki ikin jo ma oto ni. 2510 Yecu mayam kineko pi balwa, Lubanga ocere woko wek kikwanwa ni kitwa atir.