Jo Roma 5

Adwogi kwano dano ni kite atir

1Pimeno, kit macalo kikwanowa ni kitwa atir pi niye, watye dong ki kuc ikinwa ki Lubanga, pi Rwotwa Yecu Kricito. 2Pire omiyo kiyabo botwa yo me limo kica man ma ocung pi niyeni, kun wabedo ki yomcwiny pi gen ma watye kwede me nywako deyo pa Lubanga. 3Makato meno, wabedo ki yomcwiny i can mapatpat ma poto ikomwa, kun wangeyo ni bedo ki can kelo diyo cwiny me ciro can, 4diyo cwiny iciro can weko kipwoyo kitwa, ka dong pwoyo kitwani miyo wabedo ki gen. 5Genwa meno pe kelo botwa cwercwiny, pien Cwiny Maleng madong kimiyo botwa omiyo kionyo mar pa Lubanga woko icwinywa.

6Pien ikare mayam pud wagoro ma pe watwero konye kenwa, ka kare ma Lubanga oyero dong oromo, ci Kricito oto pi lubalo. 7Tek tutwal bot dano mo me to pi ngat mo ma kite atir. Gwok nyo ka obedo dano ma kite ber, ci ngat mo twero diyo cwinye me to pire. 8Ento Lubanga onyutu kit ma en marowa kwede kit man ni, ikare ma wan pud lubalo Kricito yam oto pirwa. 9Kit macalo kikwanowa woko ikare man ni kitwa atir pi remone ni, dong makato tutwale wabilare pire ki ikom akemo pa Lubanga. 10Ikare ma onongo wan pud lukwor pa Lubanga, en odwokowa cen bote pi to pa Wode. Makato meno, kit madong kidwokowa cen bote me doko luremeni, wabilare tutwale pi kwo pa Wode. 11Pe meno keken, ento watye ki yomcwiny i Lubanga pi Rwotwa Yecu Kricito, pien en aye ma omiyo kidwokowa cen bot Lubanga me bedo lureme.

Adam ki Kricito

121

Pimeno, kit macalo bal yam obino i lobo kun wok ki ikom dano acel, ka dong to obino pi bal, kitmeno bene to onya oromo kin dano ducu, pien dano ducu gubalo. 13Bal onongo tye i lobo con ma peya kimiyo cik, ento kama cik pe iye, bal bene pe gikwano iwi ngat mo. 14Ento to ocako loc ki ikom Adam oo kwede wa ikom Moses, ci oloyo jo mayam pe gutimo bal marom ki bal pa Adam, mayam oturu cik ma kimiye. Adam aye lanyut ma cimo Kricito ma obinoni.

15Ento mot me kica ma Lubanga omiyo pe rom ki bal pa Adam. Pien kadi bed dano mapol yam guto pi bal pa ngat acel ca, ento kica pa Lubanga ki mot me nono ma obino pi kica pa Yecu Kricito, obedo dit makato, dok onya oromo lwak dano mapol ata. 16Dok mot me nono pe rom ki bal pa Adam ca, pien pi bal pa Adam acel ca omiyo kingolo kop oloyo dano ducu, ento tic me kica ma obino inge bal mapol okelo agonya. 17Kace pi bal pa Adam aceli omiyo to obedo kaloc pi bale, ci dong jo ma gulimo kica mabup, ki mot me nono ma omiyo kikwanogi ni kitgi atir, gibibedo kwo kun nongo gitye kaloc pi dano acel, en Yecu Kricito.

18Dong kit macalo bal pa ngat acel omiyo kop oloyo dano ducu, kitmeno bene tic me kit ma atir pa dano acel okelo agonya i kwo pa jo ducu. 19Pien macalo pi dano acel ma pe obedo ki winy omiyo dano mapol ata gudoko lubalo, kitmeno bene pi winy pa dano acel jo mapol ata kibikwanogi ni kitgi atir. 20Ikare ma kimiyo Cik bal onya iye; ento kama bal onya iye, en aye bene kama kica onya iye makato ducu. 21Kitmeno, kit macalo bal yam oloyo loc ci okelo to, kica bene oloyo loc ci omiyo kikwano dano ni kitgi atir, wek omii gunong kwo ma pe tum, pi Yecu Kricito Rwotwa.