Jo Roma

Waraga ma Paulo ocoyo bot

JO ROMA

Lanyut wilok madito ma i buk man

Waraga pa Paulo bot Jo Roma nyutu miti pa Paulo me limo kanica matye i Roma. Paulo onongo mito mada me tic ikin lukricitayo matye kunu pi kare manok, wek bene gin otyel kore me citone wa i Spain. En ocoyo waraga man me tito kamaleng lok ma mako kom niye pa lukricitayo wa kit tic ki kwo pa lukricitayo bene. Buk man tye ki lok me Kwena Maber ma Paulo oryeyo kore kikore manen kamaleng.

Inge mot bot dano ma i kanica matye i Roma ki tito pi legane pirgi, Paulo otito botgi bene lok ma pire tek i waraga man ni, “Kwena Maber nyutu yo ma Lubanga kwano dano ni kite atir. Man a ki i niye dok bene gik ki niye.” 1:17.

Lacen Paulo otito lok ki tek cwiny wek gin guniang telok man. Kit ma rok ducu, kadi bed Lujudaya nyo rok mapatpat myero kikwan gi ni kitgi atir wek gin gucung kacel ki Lubanga, pien rok ducu tye i te twero me bal. Dano mo keken kikwano ni kite atir nia ki i niyene ma en keto ikom Yecu Kricito. Lacen Paulo otito telok man me kwo manyen ma a ki iribe ikom Kricito ma bino ki i kwo manyen i Lubanga. Ngat muye Kwena Maber bedo ki kuc i Lubanga dok bene Lubanga gonye woko ki itwero me bal ki to.

I cura 5:1—8:39, Paulo bene tito telok ango ma oweko kiketo cik pa Lubanga obedo tye ki bene gin ma oweko tek pa Cwiny Maleng tye i kwo pa lukricitayo. Paulo bene omede katito lok ikit ma Lujudaya ki Rok mukene ducu tye kacel iyub pa Lubanga. En bene owaco ni Lujudaya gukwero Yecu pien yub pa Lubanga onongo tye me kelo Rok ducu ma iwi lobo me nywako kacel kica pa Lubanga matye i Yecu Kricito, dok bene en tye ki niye ni Lujudaya pe bikwero Yecu matwal. Gin bene biye Yecu Kricito macalo Lalargi. Me agikine Paulo otito kit ma lakricitayo myero okwo kwede, tutwale ikit me maro dano. En bene onyutu yo me tic pi Lubanga, ki kit ma lakricitayo myero otii pi lobone ki bot luwote, ki kit ma tamgi myero obed kwede. En odolo te waraga man kun coyo tam ma mere ki miyo pwoc bot Lubanga.

Lacim wilok madito ma i buk man

Lanyut ki guti me lok

Kit me lar

Yo me lare ma a ki bot Lubanga

Kwo manyen i Kricito

Jo Icrael i yub pa Lubanga

Yo me kwo pa Lakricitayo

Ladol lok ki mot