Jo Roma 14

Pe ingol kop ikom lawoti

11

Wujol dano ma niyene goro, ento pe wupyem kwede ikom tam mogo ma en tamo. 2Dano mo twero bedo ki niye me camo gin mo keken, ento ngat ma niyene goro camo pot dek keken. 3Dano ma camo gin ducu myero pe oca ngat ma pe camo, ki dano ma pe camo gin ducu pe myero ongol kop ikom ngat ma camo gin ducu; pien Lubanga dong otyeko jologi. 4In anga mono ma ingolo kop ikom latic pa ngat mukeneni? Meno lok pa ngat ma loye me ngolo kop ikome, ka cung nyo ka poto. Ento en bicung gire, pien Rwot tye ki twero ma miyo en cung.

5Dano acel woro nino acel ni dit kato nino mukene ducu, kun nongo dano mukene tero ni nino ducu rom. Dano acel acel myero omok tame pire kene. 6Dano ma keto woro ikom nino mo, miyo woro bot Rwot, ki ngat ma camo bene camo pi Rwot, pien pwoyo Lubanga; dano ma kwero cam bene kwero pi Rwot, pwoyo Lubanga bene. 7Pien dano mo pe ki ikinwa ma kwo pire kene, dok bene dano mo pe ma to pire kene. 8Ka wakwo, wakwo pi Rwot; ka wato bene, wato pi Rwot. Ma omiyo kadi wakwo, nyo wato, wan jo pa Rwot. 9Pien Kricito yam oto ka dok obedo kwo wek ebed Rwot pa jo ma oto ki jo makwo. 102

Pingo ingolo kop ikom lawoti? Nyo in, pingo icayo lawoti? Wan ducu wabicung inyim komker me ngolo kop pa Lubanga. 113 Pien yam kicoyo ni,

“Macalo atye kwoni, man Rwot ma owaco,

jo ducu gibirumu conggi inyima,

ki dano ducu gibitucu ki doggi ni an aye Lubanga.”

12Kitmeno, ngat acel acel ikinwa bidok ilok ma ikome pire kene bot Lubanga.

Pe iwek lawoti opot i bal

13Myero dong wagiku ngolo kop woko ikom luwotwa; ento gin ma myero wamok en aye pe me tiyo gin mo ma bimiyo ngat mo yoke nyo poto i bal. 14Angeyo dok aniang maber i Rwot Yecu ni, pe tye gin mo ma obedo me kwer pire kene; ento bedo me kwer bot ngat ma tamo ni obedo me kwer. 15Kace imiyo lawoti bedo ki cwercwiny pi gin ma in icamo, nongo dong pe itye kalubu yo me mar. Pe iwek gin ma in icamo obal kwo pa dano ma Kricito oto pire. 16Pe wuwek dano gulok ikom gin maber ki tung botwu ni obedo gin marac. 17Pien ker pa Lubanga pe teloke cam ki mat, ento kit ma atir, kuc, ki yomcwiny ma Cwiny Maleng miyo. 18Dano ma tiyo tic pa Kricito kitmeno aye yomo cwiny Lubanga, dok bene dano gipwoye.

19Myero dong watim wunu gin makelo kuc ki gin ma dongo niyewa ikinwa kekenwa. 20Pe wubal tic pa Lubanga pi lok me cam ma mwani. Jami ducu leng, ento bedo rac ka dano mo camo gin mamiyo lawote poto i bal. 21Bedo ber mada ka pe icamo ringo, nyo kadi ki mato kongo, nyo tiyo gin mo ma bimiyo lawoti poto. 22Dong niye ma itye kwede myero ibed kwede ikin in ki Lubanga keken. Tye ki gum dano ma pe ki tyen lok ma ngolo kop loye kekene i gin ma en pwoyo. 23Ento dano ma kalo akala i cwinye kop loye kace ocamo, pien gin ma en timoni nongo pe oa i niye, pien gin ducu ma pe oa i niye meno bal.