Jo Roma 13

Woro luloc

1Dano acel acel myero owiny luloc ma giloye; pien pe tye kit twero mo ma pe oa ki bot Lubanga; luloc ma gitye ni Lubanga aye oketogi. 2Pimeno ngat ma pyem ki luloc nongo pyem ki ngat ma Lubanga oyero; kibingolo kop ikom jo ma pyem kwedgi. 3Pien jo ma tiyo gin maber pe gibedo ki lworo mo ikom luloc, ento jo ma tiyo gin marac aye gibedo ki lworo. Imito ni pe ibed ki lworo ikom dano matye kaloc? Tii gin maber, ci en bipwoyi; 4pien en latic pa Lubanga ma tiyo tice pi konyi. Ento ka itimo gin marac, ci myero ibed ki lworo ikome, pien twero me miyo pwod ikom dano dong kimiye woko. En latic pa Lubanga makelo kiniga pa Lubanga ikom jo ma timo gin marac. 5En ma omiyo myero wuwiny luloc, pe pi lworo kiniga pa Lubanga keken, ento pien meno aye gin ma omyero wutim. 61 Man bene aye tyen lok ma omiyo wuculu mucoro, pien luloc gin lutic pa Lubanga ma gitiyo tic meno kikome. 7Wucul gin ma myero bot ngat acel acel, wucul mucoro bot wegi mucoro, ki ajog bot wegi ajog, wulwor jo ma myero me alwora, wuwor jo ma myero me awora.

Mar aye ma cobo cik

8Pe wubed ki banya pa ngat mo ikomwu. Ento wubed ki banya me mare kekenwu; pien jo ma maro luwotgi nongo dong gucobo cik. 92 Pien cik mogo ma waco ni, “Pe i tim abor, pe ineki, pe ikwal, cwinyi pe opuke ikom jami pa ngat mukene,” ki kwayi cik mogo mukene gucoke kacel ki lok man ni, “Mar lawoti macalo imare keni.” 10Ngat ma maro dano, pe timo gin marac bot dano lawote; pimeno mar aye ma cobo cik.

11Wutii man kun wungeyo kare ma wutye iye ni, kare dong oromo myero wuco woko ki iwang nino. Pien larewa dong onyiko cok tutwal, kato ma ikare mayam wakwongo ye iye Rwot ca. 12Dyewor dong cok tum, piny dong mito ruu. Dong wabolu tic me piny macol woko, waruku jami lweny me dyeceng. 13Myero walubu kit ma myero me dyeceng, labongo maro tuku marac me yomcwiny marac, ki mero, labongo timo abor ki tim mogo me tarwang, labongo daa ki nyeko. 14Wuruk Rwot Yecu Kricito calo wuruku bongowu, dok bene pe wutam pi kwowu me kit pa dano ma kinywalowu kwede pi cobo mitine.