Jo Roma 12

Kwo matye i tic bot Lubanga

1Pimeno utmegina, abako doga botwu pi kica pa Lubanga; wumiine kenwu macalo gitum makwo ma kityero bot Lubanga, gin maleng ma yomo cwiny Lubanga; man en aye woro me cwiny ma opore bot Lubanga. 2Pe wulub tam me lobo man, ento wuwek Lubanga olok tamwu odok nyen, wek omii wuniang i gin ma Lubanga mito, gin maber, ma yomo cwinye, ma roc mo peke iye.

3Pi mot me kica ma kimiyo bota atito botwu ducu ni, dano acel acel myero pe opar pi dite mukato kare, ento wubed ki par matye atir, kun ngat acel acel lubu kit pok me niye ma Lubanga dong opimo omiye. 41 Watye ki dul komwa mapol ikom acel, dul kom magi bene pe gitiyo kit tic acel keken; 5kitmeno, wan bene kadi bed wapol, wan kom acel i Kricito, ma dano acel acel bedo calo dul kom lawote. 62 Watye ki mot mapatpat ma lubu gum ma Lubanga omiyo botwa; myero watii kwedgi. Kace kimiyo botwa mot me tito lok pa Lubanga, myero watit kit macalo niyewa tye kwede. 7Kace omiyowa mot me tic pi dano, myero watii tic botgi. Ngat ma lapwony myero opwony dano. 8Ngat ma cuku cwiny dano myero ocuk cwinygi. Ngat ma poko jamine, myero opok ki cwinye ducu. Ngat ma latel myero otel dano ki mitkom ki ngat ma konyo lucan, myero okonygi ki yomcwiny.

Cik mogo ma okemo kwo pa dano ma gilubu Kricito

9Wuwek mar ma wutye kwede obed mar me ada. Wukwer gin marac, wumok matek ikom gin maber. 10Wumare kekenwu ki cwinywu ducu macalo omego, kun dano acel acel miyo woro bot lawote. 11Komwu obed mit, labongo wackom, wubed lyet wa i cwinywu, kun wutiyo bot Rwot macalo lutice. 12Wubed ki yomcwiny pi gen ma wutye kwede; wudii cwinywu ican, kun wumiine kenwu ilego Lubanga ki cwinywu ducu. 13Wupok jamiwu bot jo pa Lubanga ma gitye ki peko; wuket cwinywu bene kagwoko welo. 143

Wuleg gum ikom jo ma giunuwu; wulam gum botgi, ento pe wucen gi acena. 15Wubed ki yomcwiny kacel ki jo matye ki yomcwiny, wukok bene kacel ki jo ma kok. 164 Wubed ki niang ma atir ikinwu kekenwu; pe wuwake, ento wuribe ki dano ducu. Pe wukete kekenwu ni wuryek. 17Pe wucul wang gin marac ki gin marac ikom dano mo, ento wutam pi gin ducu ma dano ducu pwoyo ni ber. 18Kace twere ki tung botwu, myero wubed ki kuc ki dano ducu. 195 Luwota ma amaro, pe wucul kwor, ento wuwek kare ki kiniga pa Lubanga, pien yam kicoyo ni, “An aye ma abiculu kwor, abiculu wange lacen, man Rwot ma owaco.” 206 Yam kicoyo bene ni, “Kace kec neko lakwori, miye kwon ocam; dok ka orwo pii neke, miye pii omati; pien ka itimo kitmeno, bimiyo lewic make.” 21Pe wuwek gin marac olowu, ento wun aye myero wulo gin marac ki timo gin maber.