Jo Roma 11

Kica pa Lubanga ikom Jo Icrael

11

Apenyo ni, “Lubanga mono dong okwero jone woko?” Pe kitmeno gire. An kikoma bene an Laicrael, lakwar Abraim, ma i kaka pa Benjamin. 2Lubanga pe okwero jone mayam en oyerogi con. Pe wungeyo gin mayam kicoyo i ginacoya ma oloko lok ikom Eliya, kit ma en obako kwede doge bot Lubanga ikom jo Icrael ni, 32 “Rwot, dong guneko lunebini woko, gumuku keno tyeri gu woko ducu, an kena aye dong adong, dok bene gimito neka woko.” 43 Ento Lubanga yam odoke iye gin ango? En odoke iye ni, “Pud aweko jo alip abiro gudong bota, ma peya gurumu conggi inyim Baal.” 5I kit yo acelu tye jo mogo ikare man ma gudong, ma Lubanga oyerogi pi kicane. 6Ci ka kiyerogi pi kica, man nongo dong pe ocung ikom timo gin ma cik mito; ka nene onongo ocung ikom tic ma dano otiyo, kono kica dong pe kilwongo ni kica.

7Gin ango dok kono? Jo Icrael pe gunongo gin ma gubedo kayenyone. Jo ma kiyerogi keken aye gunongo, ento jo mukene onongo wigi odoko dit woko, 84 kit macalo yam kicoyo ni,

“Lubanga dong omiyo botgi dingwic,

omiyogi wang ma pe neno piny,

ki it ma bene pe winyo lok,

kadi wa onyo.” 95

Daudi bene waco ni,

“Wek karamagi ma gicamoni otyekgi woko macalo owic ma makogi;

wek obed gin mamiyo gipoto i bur pi culu wang balgi.

10Mii wanggi ocor woko, wek pe gunen piny;

mii pyergi ogom woko matwal.”

11Dok apenyo ni, “Ikare ma jo Icrael yam guyokeni, gin mono gupoto woko matwal?” Pe kitmeno! Pi balgi omiyo lare bene dong obino bot Lurok, wek omii nyeko omak jo Icrael. 12Ka balgi dong okelo lonyo bot lobo, dok bene ka potogi okelo lonyo bot Lurok, bere dong bibedo rom mene ka gin ducu gudwogo woko liweng?

Lare obino bot Lurok

13Kombedi atye kalok kwedwu, wun Lurok. Dong kit macalo an lakwena kwede bot Luroki, abidworo tica, 14wek gwok nyo amii nyeko omak jo me roka, ka wek alar jo mogo ki ikin gi. 15Kace pi kwerogi woko omiyo Lubanga odwoko lobo ducu bote; ci dong bibedo ningning ka oye me gamogi kun jologi? Pe itamoni bibedo calo miyo kwo bot jo ma oa ki ikin jo ma oto? 16Ka kinywango moko me mugati, ce kikwanyo dule mukwongo ci kityero calo gin me wi mwaka bot Lubanga, ci moko ma odonge ducu nongo dong mere bene; dok bene ka kityero lwit yat bot Lubanga, ci nongo jange ducu bene gibedo mere kitmeno.

17Ento kace jange mogo gituru woko ki ikom yat jeituni mabere, ka dong kijako jang yat jeituni mo me tim, ci kicomo kakagi wek omok i tyen yat maber ca, ka dong cako nywako ywayo pige mamiyu ma a ki ilwite. Jang yat ma gijako ki i tim ca en aye in; 18ento pe myero iwake ikom jange mukene ca. Kadi bed iwake, pe in aye ma itingo lwite, ento lwite aye ma otingi. 19Ibiwaco ni, “Yam kituru jange mogo ni wek kicoma ikom yat.” 20Adada, yam giturugi woko pien gin pe guye Lubanga, in pud icung pien niyeni tye. Pe myero ibed ki tam me wake, ento bed ki lworo. 21Ka Lubanga yam pe oweko Lujudaya ma gin jang yat kikome, ci dong wutamoni en pe biwekowu? 22Kong inen kica pa Lubanga ki gerone. En ger ikom jo ma gupoto woko, ento nyutu kicane boti, ka imede kun icung i kicane. Ka pe, kibitongi woko bene. 23Dok gin Lujudaya bene ka guweko bedo labongo niye, ci kibidwokogi ikom yat; pien Lubanga tye ki twero me dwokogi iye. 24Pien in Larok irom ki jang yat jeituni me tim ma kitongo woko ci kicomo ikom jeituni mabere, mayam onongo pe olot ikom yat jeituni ma kipito apita. Pe bedo yot tutwal bot Lubanga me dwoko jang yat mukene ca ikom yat kikome mayam kiturugi ki iye ni?

Lubanga bidwoko jo Icrael bote

25Utmegina, tye mung mo ma amito wunge, wek omii pe wutam kekenwu ni wuryek; man en aye ni, jo Icrael cwinygi ongil pi kare mo manok, nio ka wel Lurok biromo. 266 Lacen dong Lubanga bilaro jo Icrael ducu, kit macalo yam kicoyo ni,

“Lalar bibino kun a ki i Cion,

en bikwanyo kit ma kwero lworo Lubanga woko ki bot Yakobo. 277

Man aye gicike ma abiketo kwedgi

ikare ma abikwanyo balgi woko.”

28Dong pi lok ma dok ikom lok me Kwena Maber, gin gudoko lukwor pa Lubanga pirwu, ento pi lok ma kemo yer, Lubanga marogi pi kwarigi. 29Mot me kica pa Lubanga, ki lwongone, pe twero loke. 30Yam pe wuwinyo dog Lubanga, ento kombedi dong en otimo kica botwu, ma onongo dong gin gukwero bedo ki winy woko ikome. 31I kit acelu kombedi dong gukwero winyo doge ikare ma en otimo botwu kica, wek omii gin bene kitim kica botgi kitmeno. 32Piman Lubanga oweko dano ducu gudoko mabuc me bal pien gukwero winyo lok doge; en otimo man wek etim kica bot jo ducu.

Kimii pak bot Lubanga

33Lonyo pa Lubanga dwong ma okato kare! Ryekone kacel ki ngece tut tutwal! Lok ma en ngolo tere pe tate, niang ikite tek! 348 Kit ma kicoyo kwede i ginacoya ni,

“Anga ma ngeyo tam pa Rwot?

Anga mayam miye tam?

En bikwanyo kit me kwero lworo Lubanga. 359

Anga mono mayam kong omiye gin mo me mot,

ka wek en bene ocul wange bote?” 3610

Pien en aye yam ocweyo jami ducu, ci jami ducu yam obedo tye pire, dok bene obedo mere. Deyo obed bote nakanaka. Amen.