Jo Roma 10

1Utmegina, gin ma amito ki cwinya ducu ma alego Lubanga pire, en aye ni myero Jo Icrael gulare. 2An abedo caden gi kun angeyo ni gumoko matek ikom Lubanga, ento kadi bed gumoko, ci pe gucung i ngec kikome. 3Onongo pe gingeyo kit ma Lubanga kwano kwede dano ni kite atir, ento gubedo kayenyo ni gitwero nongo kit ma atir pirgi ken gi, pe gumine ken gi ikit ma atir ma Lubanga miyo. 4Pien cik dong ogik woko i Kricito, wek omii jo ma ye en kikwangi ni kitgi atir.

Lare tye pi jo ducu

51

Moses yam owaco ni dano ma tiyo tic ma atir ma cik mito, bikwo pire. 62 Ento kit ma atir ma kinongo pi niye loko kit man ni, “Pe ilok kekeni ni, ‘Anga ma biyito malo ipolo?’ (ni, me kelo Kricito piny) 7Nyo ni, ‘Anga ma bidonyo i bur ma tere pe gik?’” (ni, me kelo Kricito woko ki ikin jo ma oto) 8Ento man waco gin ango? Waco ni, “Lok pa Lubanga dong tye cok kwedi, tye i dogi ki i cwinyi bene,” ma en aye lok ikom niye ma watito pireni. 9Pien ka itucu ki dogi ni, “Kricito aye Rwot,” ma kun iye bene ki i cwinyi ni Lubanga yam ocere woko ki ikin jo ma oto, ci ibilare. 10Pien dano ye ki cwinye, en aye miyo kikwane ni kite atir, ka dok tucu ki doge ka dong miyo Lubanga lare. 113 Pien coc mayam kicoyo i ginacoya waco ni, “Ngat ma ye pe kibiweko lewic mako en.” 12Apokapoka mo peke ikin Lujudaya ki jo Grik; gin ducu Rwotgi acel, en bene poko lonyone bot jo ducu ma kok bote. 134 Yam kicoyo ni, “Jo ducu ma gilwongo nying Rwot kibilarogi.”

14Ento dano gibikok bote ningning, ma peya guye en? Gitwero ye en kono ningning ka pe guwinyo lok ma kitito ikome? Gitwero winyo lok ikome ningning ka ngat mo pe ma tito loke botgi? 155 Dano gitwero tito lok ningning ka pe kiorogi? Kit macalo yam kicoyo ni, “Neno tyen gi ber rom mene jo makelo lok me Kwena Maber!” 16Ento pe gin ducu yam guye lok me Kwena Maber; pien Icaya yam oloko ni, “Rwot, anga mayam oye lok ma wan watito?” 17Adada, niye bino pi winyo lok ma kitito, lok ma kiwinyo a ilok ma kitito ikom Kricito. 186

Ento kong amito apeny ni, “Onongo yam pe guwinyo?” I ada guwinyo gire, kit macalo yam kicoyo i Jabuli ni,

“Dwon gi winye teretere iwi lobo ducu,

ki lok ma giloko oo wa i agiki piny.”

19Dok apenyo ni, “Jo Icrael mono yam pe guniang?” Moses aye ma okwongo waco ni, “Abimiyo nyeko makowu ikom jo ma pe gin rok kikome, abimiyo kiniga makowu ikom rok maming.” 207

Icaya dok cwinye obedo tek me waco ni,

“Jo mayam pe giyenya dong gunonga,

dong bene atyeko nyute woko kamaleng bot jo ma onongo pe gipenyo pira.” 218

Ento ikom jo Icrael en owaco ni, “Yam abedo karyeyo cinga dyeceng jwi bot jo ma pe giwinyo doga, jo ma gin pyem kweda.”