Jo Roma 9

Lubanga yam oyero Jo Icrael

1Atye kaloko lok ada i Kricito, pe aloko goba; ngec ma i cwinya moko lok man ki tek pa Cwiny Maleng ni, 2atye ki cwercwiny madit kun cwinya rem mada ma pe juke 3pi utmegina, ma gin wadina me roka. Pi mitina kekena, kono yam kiceno an kikoma woko, wek kikwanya woko ki bot Kricito. 41 Gin Jo Icrael, jo ma Lubanga olokogi gudoko lutinone, omiyogi deyone ki gicikene, omiyogi bene Cik ki kit yo ma myero guwore kwede, ki cikene pirgi. 5Kwariwa macon ducu yam gubedo meggi, dok Kricito bene kinywalo ikin gi calo dano adana. Myero kipwo Lubanga maloyo jami ducu nakanaka. Amen.

6Ento pe teloke ni, lok pa Lubanga pe otiyo gin mo; pien jo ma kinywalo ikin jo Icrael pe gin ducu jo Icrael. 72 Dok bene pe likwayo pa Abraim ducu gubedo nyikwaye me ada, pien yam kicoyo ni, “Likwayo pa Icaka aye kibilwongogi ni likwayu.” 8Man teloke ni, pe lutino ma kinywalogi ikit pa dano ma gin aye gibedo lutino pa Lubanga, ento lutino ma kinywalogi pi cike pa Lubanga aye kilwongogi ni gin likwayo. 93 Pien Lubanga ceng ocike bot Abraim kun waco kuman ni, “Abidwogo ikare macalo man, ka dong dakoni Cara binywalo latin awobi.” 10Pe meno keken, gin ma calo man bene otime ikare ma Labeka ogamo ic pa lutino rudine ki laco acel, ma en aye kwarowa Icaka. 11Ento ma pud peya onywalo lutinone, dok bene ma peya gutiyo gin mo maber nyo marac, wek omii yub pa Lubanga me yer omede, pe pi tic ento pi lwongone, 124 kiwaco bot Labeka ni, “Latin matidi biloyo latin kayo.” 135 Kit macalo kicoyo ni, “Yam amaro Yakobo, ento akwero Ecau.”

14Wan dok wabiwaco gin ango? Wabiwaco ni Lubanga pe ngolo kop atir dok kakare? Pe kitmeno! 156 Pien yam owaco bot Moses ni, “Abitimo kica bot ngat ma abitimo kica bote, dok bene abinyutu bera bot ngat ma abinyutu bera bote.” 16Kumeno, pe cung ikom gin ma dano mito, nyo ikom tice ma en cane pire, ento cung ikom kica pa Lubanga. 177 Pien ginacoya waco bot Parao ni, “Atingi malo pi lok man wek omii anyut tekona ikomi, wek nyinga oywek iwi lobo ducu.” 18Kitmeno en timo kica bot ngat ma en mito ni etime kica, dok bene dingo cwiny ngat ma en mito doko nwang.

Akemo pa Lubanga ki kicane

19Gwok nyo ibipenya ni, “Pingo mono Lubanga pud yenyo bal ikomwa? Nga matwero gengo gin ma en mito?” 208 Ento in dano adanani in anga, ma igamo dog Lubanga? Gin ma kicweyo acweya twero penyo ngat ma ocweye ni, “Pingo icweya kuman?” 21Itamo ni lacwec peke ki twero ikom lobo me cweyo atabo acel me wel ki mukene ma pe me wel, kun tiyo ki lobo ma en ongino angina acel madit? 22Kadi bed Lubanga onongo mito nyutu akemone ki tekone ikom jo ma gubalo, ento en odiyo cwinye pi kare malac ikom jo mogo madong guromo me aneka woko. 23En otimo man wek omii lonyo me deyone ongene ikom jo ma en bitimo kica ikomgi, ma en yam oyubu wa con wek gunong deyone. 24Man aye wan kikomwa, wan jo ma en olwongo, pe ki ikin jo Icrael keken, ento kadi wa ki ikin Lurok ducu bene. 259 Kit macalo yam en oloko i buk pa Kocea ni,

“Jo mayam onongo gin pe jona,

abilwongogi ni, ‘Jona,’

dako ma onongo yam pe amaro

abilwongo ni, ‘Me Amarana.’ 2610

Dok bene i kabedo kama yam kiwaco botgi iye ni, ‘Wun pe wujona,’

kibilwongogi iyeni, ‘Lutino pa Lubanga makwo.’” 2711

Icaya bene yam oloko lok ikom Icrael ni, “Kadi wel jo Icrael obed rom ki kweyo me dog nam, jo mogo manok ki ikin gi ma gudong aye gibibwot. 28Pien Rwot bingolo kop iwi lobo, bicobo bene woko oyotoyot.” 2912 Dok tye kit macalo yam Icaya oloko nebi ni,

“Kono nene Rwot me mony pe oweko botwa likwayo mogo,

kono wabedo calo Codom,

kono dong wadoko calo Gomora.”

Icrael ki lok me Kwena Maber

30Wan dok wabiwaco gin ango? Wabiwaco ni Lurok mayam pe guyele pi doko jo ma kitgi atir dong kikwanogi ni kitgi atir, ento kitgi ma atir meno gunongo pi niye. 31Ento jo Icrael mayam guyele pi lubu Cik ni wek gibed jo ma kitgi atir, pe gutwero cobo gin ma cik mito. 32Pingo? Pien pe gubedo kayenyone i yo me niye, ento gubedo kayenyone calo gin ma ocung ikom lubu Cik. Guyoke ki got ma yoko dano. 3313 Kit macalo kicoyo ni,

“Nen, dong aketo got ma yoko dano i Cion,

ariya mamiyo dano poto.

Ento lewic pe bimako ngat ma oye en.”