Jo Roma 7

Lanyut ma kikwanyo ki ikom nyom

1Utmegina, atye kalok ki jo ma gingeyo cik; pe wungeyo ni cik mako dano ka pud kwo keken? 2Dako ma kinyomo bene cik tweyo ikom cware ka cware pud kwo, ento ka cware dong oto, en gonye woko icik me nyom. 3Ma omiyo ka cware pud kwo, ce dakonu oa okobo woko bot laco mukene, kibilwonge ni latim abor. Ento ka cware dong oto, en nongo ogonye woko ki icik meno; ka dok onyome ki laco mukene nongo pe otimo abor.

4Kumeno, utmegina, wun bene yam kigonyowu woko ki i Cik pa Moses pi to pa Kricito ma wuribe ikomeni, wek wudok bot ngat mukene, en aye ngat mayam kicere woko ki ikin jo ma oto, wek wutii gin maber bot Lubanga. 5Pien ikare mayam pud watye i kwo me anywali, gin maracu me bal ma cik dong otugu woko onongo tye katic i dul komwa mapatpat me tiyo tic ma terowa i to. 6Ento kombedi dong kigonyowa woko ki ikom cik, dong wato ki tung bot gin ma con omakowa. Omiyo wan dong watye katic i yo manyen me Cwiny, pe dok i yo macon ca me lubu cik mayam kicoyoni.

Cik ki Bal

71

Wabiwaco lok ango mono? Cik mono bal? Pe kitmeno gire! Ento kono yam Cik pe obedo tye, onongo kono gira pe angeyo bal. Ka kono yam Cik pe owaco ni, “Cwinyi pe opuke ikom jami pa ngat mukene,” kono onongo bene pe abedo ki ngec macalo meno. 8Ento bal onongo kare odonyo i Cik ca, ka dong ocako kelo kwayi miti ducu me puke cwiny icwinya. Pien ka Cik pe, ci bal to woko. 9Yam onongo abedo kwo labongo Cik, ento ikare ma Cik ca obino, bal ocako bedo kwo, ci oweko ato woko. 10Cik pa Moses kikome onongo myero okel kwo, ento dok okelo to bota. 112 Pien bal onongo kare odonyo i Cik, ci obwola, ka dong oneka woko. 12Pimeno, Cik leng, ki gin ma kiciko bene leng, tye atir, dok ber bene.

13Ento gin mayam ber ca aye dok okelo to ikoma? Pe kitmeno! Bal aye onongo ma omiyo ato, kun tiyo ki gin maber, wek omii onen woko kamaleng ni meno bal enu. Kitmeno gin ma kiciko ca omiyo bal odoko marac mukato kare.

Atelatela ma i cwiny

14Wangeyo ni Cik a ki i cwiny pa Lubanga; ento an a dano ma miti me kom telo ma kicato woko macalo opii bot bal. 153 Gin ma atiyogu ducu pe aniang iye. Pien gin ma amito pe atiyo, ento dok atiyo gin mogo ma pe amitoni. 16Dong ka atiyo gin ma pe amito, nongo aye ni Cik ber. 17Meno dong pe an aye ma atiyo, ento bal ma bedo i iya aye ma tiyo gire. 18Pien angeyo ni gin mo maber pe ma bedo i iya, ma en aye kwona me anywali pa dano. Atwero mito gin ma atir, ento pe atwero tiyone. 19Pien pe atiyo gin maber ma amitoni, ento gin marac ma pe amitoni aye dok atiyo. 20Ci ka atiyo gin ma pe amitoni, meno dong nongo pe an aye ma atiyo, ento nongo bal ma bedo i iya aye tiyo.

21Ma omiyo dong onen bota macalo cik ni, ka amito tiyo gin ma atir, ci gin marac nyiko cok kweda. 22Pien amaro kwano cik pa Lubanga, kun alwodo loke ki iya. 23Ento dok aneno cik mukene i dul koma ducu, kun tye kalweny ki cik ma itama, tera i opii me cik me bal ma bedo i dul koma ducu. 24An ma koma kec kumani, anga ma bilara ki i mitina me kom man ma tera woko i toni? 25Apwoyo Lubanga pi Yecu Kricito Rwotwa! Dong an kikoma aworo cik pa Lubanga ki tama, kun ikoma ma kinywala kwede aworo cik me bal.