Jo Roma 16

Mot bot jo mapatpat

1Anyutu botwu laminwa Phoebe, ma en latic pa lwak jo ma guye Kricito matye i Kenkeria. 2Wujole i Rwot kit macalo jo pa Lubanga myero gujol kwede dano, dok bene myero wukonye igin ducu ma en bimito ki botwu; pien yam okonyo jo mapol, okonya bene. 31

Wumot Pricika ki Akwila, ma gitiyo kacel kweda i tic pa Kricito Yecu. 4Gin yam gudyero kwogi pi laro kwona; pe an kena aye ma apwoyogi, ento kadi wa Lurok ducu ma guye Kricito bene gipwoyogi. 5Wumot bene jo ma oye Kricito ma gicoke i otgi. Wumot larema Epaenato; en aye obedo ngat mukwongo ye Kricito i Acia. 6Wumot Maliam mayam otiyo tic matek ikinwuni. 7Wumot Anduroniko ki Yunia, ma gin wadina mayam kitweyogi kacel kweda i buc. Gin jo ma gingene mada ikin lukwena, gin bene aye gukwongo ye Kricito ma onongo an pud peya aye. 8Wumot Ampuliato, ma en larema ma amaro i Rwot. 9Wumot Urbano latic wadwa i Rwot, ki Citakic larema ma amaro. 10Wumot Apelle, ma en dano ma gene i Kricito. Wumot dano ducu me ot pa Aricitobulo. 11Wumot Kerodion ma en wata, ki jo me ot pa Narocico ma gitye i Rwot. 12Wumota bene Terapaina ki Terpoca, ki larema Perici ma otiyo tic matek i Rwot. 132 Wumot Rupo, dano ma ngene i Rwot, gin ki mine ma alwongo ni maa bene. 14Wumot bene Acinkerito, Pelegon, Keremec, Patroba, Keremac ki utmego ki nyimege ma gitye kacel kwedgi. 15Wumot bene Pilologo ki Julia, Nerea gin ki lamine, ki Olimpa, ki jo pa Lubanga ducu ma gitye kacel kwedgi. 16Wumote kekenwu ki mot maleng me mar. Lwak jo ma oye Kricito i kabedo mapatpat ducu gumotowu.

Lok me agiki

17Abako doga botwu, utmegina ki nyimegina, wunen jo ma gikelo apokapoka i lok mamiyo dano poto i bal, ma pe rwate ki pwony mayam kipwonyowu kwede. Pe wuribe ki jo macalo meno. 18Jo macalo meno pe gin lutic pa Rwotwa Kricito, ento rwotgi ma gimaro aye igi. Gibwolo tam pa dano ma gipe ki tam marac, ma kun nongo giloko lok maber ma winyone mit adada. 19Kit winy ma wubedo kwede bot Lubanga dong owinye bot jo ducu, meno aye gin ma omiyo wuyomo cwinya. Dong amito wubed luryeko i gin maber, ento myero wubed maleng labongo bal; 20ci Lubanga won kuc binyoto Catan woko oyotoyot piny ite tyenwu. Kica pa Rwotwa Yecu Kricito obed kwedwu. 213

Temceo ma tiyo kacel kweda i Rwot omotowu; ki Lukio, ki Jacon, ki Cocipater, ma gin giwadina.

22An Tertio aye ma acoyo waraga man amotowu i Rwot. 234

Gayo ma en ngat ma abutu i ode bene omotowu, en aye ma gwoko lwak ducu ma oye Kricito. Eracto ma en lakan lim me gang man, ki ominwa Kwarto bene gumotowu.

[24Kica pa Rwotwa Yecu Kricito obed kwedwu wun ducu. Amen.]

Lega me pak

25Myero wamii deyo bot Lubanga matwero miyo wucung matek, macalo apwonyo kwede ilok me Kwena Maber ma abedo katitoneni, ki lok ma kitito ikom Yecu Kricito ma mako mung man yam Lubanga okano oling woko litik pi lwak mwaka mapol, ka lacen dong oyabo kamaleng. 26Kombedi dong kinyutu woko kamaleng i lok ma lunebi yam gucoyo ma omiyo lurok ducu gungeyo kit macalo Lubanga mabedo nakanaka yam ociko, wek omii gulub niye. 27Deyo obed bot Lubanga nakanaka, ma en keken aye won ryeko, pi Yecu Kricito. Amen.