1 Jo Korint 1

Mot

1Waraga man oa ki bot Paulo, ma pi mit pa Lubanga yam Lubanga olwongo me bedo lakwena pa Kricito Yecu, ki bot ominwa Coctene. 21

Bot jo ma oye Lubanga ma gitye i Korint, ma gin jo ma kilonyogi gudoko maleng i Kricito Yecu, ma Lubanga olwongogi me bedo jone kikome, kacel ki jo ducu ma gitye ikabedo ducu, ma gilwongo nying Rwotwa Yecu Kricito, Rwotgi ki mewa bene: 3Lubanga Wonwa ki Rwotwa Yecu Kricito omiwu kica ki kuc.

Gum manonge i Kricito

4Nino ducu amiyo pwoc bot Lubangana pi kicane ma en omiyowu i Kricito Yecu. 5Pien pi ribewu ki Kricito omiyo dong wudoko lulonyo i yo ducu. Wutye bene dong ki ngec ducu, dok wutwero dong lok maber. 6Pien lok ma wabedo ka titone ikom Yecu Kricito odonyo matek i iwu. 7Omiyo mot mo me cwiny pe orem botwu, ma kun pud wutye ka kuru kare me nyutu Rwotwa Yecu Kricito. 8En bigwokowu miyo wubicung matek nio wa i agiki, wek pe wubed tye ki gin mo ma omyero kidotwu iye inino pa Rwotwa Yecu Kricito. 9Lubanga ma olwongowu me ribe kacel ki Wode Yecu Kricito Rwotwa, en ngat ma gene.

Apokapoka i Kanica

10Abako doga botwu, wutmegina, pi nying Rwotwa Yecu Kricito, ni wun ducu omyero wulok lok acel, apokapoka mo pe myero obed tye ikinwu, ento omyero wuribe i cwiny ki tam acel. 11Pien jo mogo ma gua ki bot Koloe gutita lok ikomwu, ni meno daa tye ikinwu, wutmegina. 122 Gin ma awaco en aye ni, dano acel acel ikinwu tye ka waco ni, “An dano pa Paulo,” onyo ni “An dano pa Kepa3,” onyo ni “An dano pa Apolo,” onyo ni “An dano pa Kricito.” 13Kricito mono iye opoke? Yam mono kiguro Paulo aye ikom yatariya pirwa? Onongo yam kibatijawu inying Paulo? 14Apwoyo Lubanga mada pien an gira yam pe abatija dano mo ikinwu, kono abatija Kricipo ki Gayo keken, 154 wek ngat mo pe owac ni kibatija en i nyinga. 165 (Abatija bene jo ma i ot pa Citepana; pe dong atwero po ka onongo dok abatija ngat mukene.) 17Kricito pe ocwala ka batija dano, ento katito lok me Kwena Maber ma pe atito ki ryeko mo me lok, wek pe omii to pa Kricito ikom yatariya obed gin ma konye peke.

Kricito en tek ki ryeko pa Lubanga

18Jo matye ka rwenyo gitamoni lok ikom to pa Kricito ikom yatariya, nen calo gin me mingo, ento ki tung botwa, wan jo ma Lubanga tye ka larowa, obedo tek pa Lubanga. 196 Pien yam kicoyo ni,

“Abityeko ryeko pa jo maryek,

abibalo niang pa jo ma ngeyo piny woko.” 207

Jo maryek tye kwene? Lupwonycik kono tye kwene? Lupyem me kare man tye kwene? Lubanga oloko ryeko me lobo man odoko me mingo! 21Pien Lubanga i ryekone pe omiyo jo me lobo gungeye pi ryekogi, ento Lubanga pi twerone olaro jo ma oye en pi lok me kwena ma kineno calo lok me mingo ma watitoni. 22Lujudaya gimito neno lanyut mogo, ki jo Grik giyenyo meggi ryeko; 23ento wan giwa watito pi Kricito mayam kiguro ikom yatariya, ma loke ki tung bot Lujudaya nen calo lok atata, ki bot Lurok nen calo lok me mingo. 24Ento bot jo ma Lubanga olwongogi, Lujudaya ki jo Grik, Kricito obedo tek ki ryeko pa Lubanga. 25Pien gin manen calo mingo pa Lubanga ryek kato ryeko pa dano woko, ki gin manen calo goro pa Lubanga bene tek kato teko ma dano tye kwede woko.

26Utmegina, kong wutam pi lwongo ma Lubanga olwongowu kwede. Jo mapol ikinwu onongo pe giryek ikit me lobo, dok jo mapol ikinwu onongo pe gubedo wegi deyo, jo mapol ikinwu onongo pe gitye ki woro me anywali. 27Ento Lubanga oyero gin ma maming me loboni, wek oket lewic ikom luryeko. Lubanga oyero gin ma goro i loboni wek oket lewic ikom gin jo matek. 28Lubanga oyero gin mogo me lobo ma kicayogi, ma rwomgi piny, kadi jami mogo ma kineno ni konye peke, wek omii gin ma kinenoni konye tye odok gin atata, 29wek dano mo pe owake inyim Lubanga. 30Lubanga aye ma omiyo wubedo i Kricito Yecu, ma Lubanga omiyo odoko ryekowa. Pi Kricito bene omiyo Lubanga okwanowa ni kitwa atir, olonyowa wadoko jo maleng, okokowa bene ki i opii me bal. 318 Dong kit macalo yam kicoyo ni, “Ngat ma nyate myero onyate pi Rwot.”