1 Jo Korint

Waraga mukwongo ma Paulo ocoyo bot

JO KORINT

Lanyut wilok madito ma i buk man

Waraga ma Paulo ocoyo mukwongo bot jo Korint kicoyo kun lube ki lok me cobo peko ma mako lok me kwo pa lukricitayo ki kit ma niye myero oile kwede malo matek i kanica ma Paulo ocako i Korint. Ikare meno Korint onongo obedo taun madit ma opong ki kaka pa jo Grik, ma bene en aye onongo taun madit ma kom ker pa jo Roma tye iye ite adwol pa Akaia. Taun madit man onongo bene obedo kama biacara time iye matek adada, ma opong ki tekwaro me awaka, kwele ki tim abor madongo ki kwa dini mapatpat.

Lok ma pire tek mada ma ogudu cwiny lakwena man aye obedo lok mamako apokapoka ikin dano, ki lok me tim abor i kanica, lok mamako butu ikin laco ki dako ki lok me nyom, lok mamako kit yo me tam me cwiny pa dano, kit ma omyero lega owot kede i kanica, ki lok mamako mic pa Cwiny Maleng ki cer ikin jo ma oto. Ki niang matut, Paulo onyutu kit ma Kwena Maber kelo kwede ngec wa ki lagam ikom lapeny magi.

Cura 13, nyutu mar macalo mic madit maloyo ducu ikin mic pa Lubanga bot danone. Ginacoya ma i cura man aye ginacoya ma ngene matek maloyo ki i buk man.

Lacim wilok madito ma i buk man

Lanyut

Tic matye i kanica

Yo mupore me butu ikin laco ki dako ki kwo me i ot

Lukricitayo ki jo ma pe guye

Kwo me kanica ki miyo deyo ki woro bot Rwot

Cer pa Kricito ki pa jo ma oye

Gityer pa Lukricitayo matye i Judaya

Lok ma mako kom Paulo ki ladol lok