1 Jo Korint 16

Jogo lim pi konyo jo pa Lubanga

11

Dong lok ma mako jogo lim me konyo jo pa Lubanga, omyero wulub lok mayam aciko jo ma oye Kricito ma gibedo i Galatia ni gutim, wun bene wutim kumeno. 2Nino mukwongo i cabit ducu, dano acel acel ikinwu myero opok lim mo oket pat, malube ki kit ma en nongo kwede, ci okan woko, wek pe dok kijog limwu ki ikoma ka ao botwu. 3Ka ao botwu kunu, ci abicwalo jo ma wun wuyero me tero motwu i Jerucalem, kun nongo amiyogi bene waraga. 4Kace onongo nen ni myero an bene aciti, ci wabicito kacel kwedgi.

Yub me wot pa Paulo

52

Abio botwu kun nongo awok ki Makedonia, pien atamo me wok ki kunu. 6Gwok nyo abibedo botwu pi kare manok mo, nyo bene abityeko kare me ngico piny woko ducu botwu, wek wukonya bene i dog wota ma abicito iye doki. 7Pien pe amito ni anenwu malmal, ageno abibedo botwu pi kare malac, ka Rwot oye. 83 Ento abibedo i Epeco nio wa inino me Pentekote4, 95 pien dong giyabo yo bota malac me tiyo tic matek kany, dok jo ma gengo tic pol. 106

Ka Temceo obino, wunen ni en obed ikinwu labongo lworo mo, pien en bene tiyo tic pa Rwot calo an ki koma. 11Ngat mo pe myero ocaye. Ento wukonye wek oruye wek odwog bota ki kuc, pien atye kakure kacel ki utmegiwa.

12Malube ki lok ikom ominwa Apolo, yam alege mada ni kong myero oo botwu, kacel ki utmego mukene, ento en pe omito bino kadi ki acel ikare man. Atamo dong en bibino kace onongo kare maber.

Lega me agiki ki mot

137

Wuki piny, wucung matek liking ikom niyewu, wubed ki tekcwiny, wubed ki keru. 14Wunen ni gin ducu ma wutimo, otime ki mar. 158

Utmegina, wungeyo ni Citepana ki jo ma i ode aye gin jo mukwongo doko Lukricitayo i lobo Akaya, dok bene gumine ken gi i tic pi jo pa Lubanga. 16Dong alegowu me bedo ki winy bot jonu, ki jo mukene ducu ma giyele kun gitiyo kacel kwedgi. 17Cwinya yom ibino pa Citepana gin ki Portunato ki Akaiko, pien gin gucung me kakarwu. 18Gin dong gukweyo cwinya, ki cwinywu bene. Gin jo macalo meno myero wutam pirgi. 199

Jo ma oye Kricito ducu ma gibedo i Acia gumotowu. Akwila ki Pricika gumotowu matek i Rwot, kacel ki lwak jo ma oye Kricito ma gicoke i otgi. 20Utmego ducu gumotowu. Wumote kekenwu ki mot maleng me mar.

21An Paulo, amotowu ki coc man ma acoyo ki cinga. 22Ngat ma pe maro Rwot myero kicen woko. Bin Rwotwa! 23Kica pa Rwotwa Yecu Kricito obed kwedwu. 24Mar mera obed kwedwu ducu i Kricito Yecu. Amen.