1 Jo Korint 12

Mot ma Cwiny Maleng miyo

1Utmegina, amito wuniang lok ikom mot ma Cwiny Maleng miyo. 2Wungeyo ni ikare mayam onongo pud pe wungeyo Lubanga, onongo wurwenyo woko ata ka woro cal jogi ma pe loko. 3Pimeno amito wuniang ni, pe tye ngat mo ma Cwiny pa Lubanga telo ma waci, “Kicen Yecu;” dok bene pe tye ngat mo matwero waci, “Yecu aye Rwot,” ento Cwiny Maleng keken matwero miyo en loko. 41

Mot tye ma kitgi patpat, ento en Cwiny acelu aye miyogi. 5Tic ma kitiyo pi Rwot bene tye ma kitgi patpat, ento Rwot acelu aye kitiyo pire. 6Tye teko mapatpat me tiyo tic i yo mapatpat, ento Lubanga acelu aye mamiyo teko bot jo ducu. 7Lubanga onyutu tye pa Cwiny Maleng bot dano ki acel acel pi konyo lwak. 8Cwiny Maleng miyo bot dano acel kwena me ryeko; en Cwiny acelu bene miyo bot dano mukene kwena me ngec. 9En Cwiny acelu miyo niye bot ngat mukene, ki bot dano mukene en Cwiny acelu miyo mot me cango two. 10Bot ngat mukene en miyo mot me tiyo tango, bot ngat mukene mot me tito lok me tucu nebi, bot ngat mukene miyo ryeko me poko kin cwiny mapatpat, bot ngat mukene miyo dumu leb mapatpat, bot ngat mukene miyo ryeko me gonyo leb mapatpat. 11Ento Cwiny acelu aye ma tiyo tic i mot magi ducu; en poko mot mapatpat bot dano acel acel kit macalo en mito.

Kom acel tye iye dul mapol

122

Pien Kricito obedo calo kom acel matye iye dul mapol; ento nongo pud tye kom acel, kadi bed gitye dul mapol. 13Pien wan ducu, Lujudaya ki jo Grik, opii ki jo ma gilone ken gi, kibatijawa wadoko kom acel i Cwiny acelu pa Lubanga, wan ducu wamato en Cwiny acelu.

14Pien kom dano pe tye iye dul acel keken, ento tye iye dul mapol. 15Ka kono tyen waco ni, “Pien an pe a cing, an pe a dul kom,” meno pe genge bedo dul kom. 16Ka kono it waco ni, “Pien an pe a wang, an pe a dul kom,” meno pe genge bedo dul kom. 17Ka kono kom ducu obedo wang, kono ki winyo lok ki ngo? Dok kono kom ducu obedo it, kono kingweyo ki ngo? 18Ento kit matye kwedeni, Lubanga oketo dul mapatpat ikom, dul acel acel kit macalo en mito. 19Ka kono gin ducu gubedo dul acel, kom kono obedo kwene? 20Kit macalo tye ni, tye dul mapol, ento kom tye acel. 21Wang pe twero waco ki cing ni, “An pe amiti.” Wic pe twero waco ki tyen ni, “An gira pe amitowu.” 22I ada, dul kom maca ma kitamo ni goro ni mite tutwal, 23dok bene dul maca me kom ma kitamo ni deyogi peke ni, dul magi aye kigwokogi ki deyo makato, ki dul komwa ma pe nen maberi aye warukugi ki ruk manen maber makato, 24ma dul komwa ducu ma ginen maberi pe gimito. Lubanga kikome aye oketo dul mapol me kom kun ribogi kacel, kun miyo deyo madwong makato bot dul ma deyogi nok, 25wek apokapoka mo obed pe ikom, ento omii dul acel acel opar pi dul wadgi. 26Ka dul mo acel tye ki arem, ci dul kom mukene ni ducu bene rem kacel kwede; ka gipako dul acel, dul mukeneni ducu bene ribe kwede ki yomcwiny.

27Kombedi dong wun kom Kricito, dano acel acel ducu obedo dul kom Kricito. 283 Ento Lubanga oketo jo magi ikin lwak muye Kricito; mukwongo lukwena, me aryone lunebi, me adeke lupwony, ki dok jo ma tiyo tic me tango; ki jo ma lubu gin jo ma kimiyo botgi mot me cango two ki ikom dano, jo ma tiyo tic me kony, jo maromo loyo tic, ki jo ma gidumu leb mapatpat. 29Jo ducu gin lukwena? Jo ducu gitye lunebi? Jo ducu gitye lupwony? Jo ducu gitimo tango? 30Jo ducu tye ki mot me cango dano? Jo ducu gidumu leb mapatpat? Jo ducu gin lugony leb? 31Wuket cwinywu i nongo mot ma pirgi dito.

Kombedi dong amito anyut botwu yo maber dok makato.