1 Jo Korint 11

11

Wulub kita, kit macalo an bene alubu kit pa Kricito.

Boyo wic ikare me woro Rwot

2Apwoyowu pien ilok ducu wupo pira, kun wumako pwonya mayam akelo botwu. 3Ento amito wunge ni wi laco acel acel en aye Kricito, wi dako aye cware, ki wi Kricito aye Lubanga. 4Laco moni ma lego Lubanga, nyo ma tucu lok me nebi kun oboyo wiye, meno nongo oketo lewic ikom Kricito. 5Ento dako ma lego Lubanga nyo ma tucu lok me nebi, ma kun pe oboyo wiye nongo oketo lewic ikom cware, pien pe tye apokapoka mo ikin en ki dako ma olyelo wiye woko. 6Ka dako mo pe boyo wiye, omyero onyar yer wiye woko. Kace bedo me lewic ka dako olyelo wiye, nyo onyaro yer wiye anyara, en dong omyero oboo wiye woko. 72 Laco pe myero oboo wiye, pien en cal pa Lubanga dok deyo pa Lubanga bene; ento dako aye deyo pa laco. 83 Laco yam pe kicweyo nia ki ikom dako, ento dako aye oa ikom laco. 9Laco yam pe kicweyo pi dako, ento dako aye kicweyo pi laco. 10En ma omiyo dako myero obed ki lanyut me twero iwiye, pi lumalaika. 11Ento i kwowa me bedo i Rwot, dako pe twero cung kene labongo laco, ki laco bene pe twero cung kene labongo dako. 12Pien macalo dako yam kicweyo kun a ki ikom laco, ikit acelu laco bene dako aye ma nywalo, ento jami ducu a ki bot Lubanga. 13Kong wungol lok man kenwu; tika nen ber ka dako olego Lubanga ma pe oboyo wiye? 14Kit ma kinywalowa kwede bene pe pwonyowu ni, ka laco oloto yer wiye odongo maboco, ci miyo ginyware? 15Ento dako gire ka yer wiye olot maboco meno bedo me deyo bote, pien kimiye yer maboco nu me ume kwede. 16Dong ka ngat mo mito kelo pyem iye, wan giwa wa peke ki kit tekwaro mo mapat ki man, pe bene tye ikin jo ducu muye Lubanga.

Cam me otyeno pa Rwotwa

(Mat 26:26-29; Mar 14:22-25; Luk 22:14-20)

17Malube ki tam ma atye kamiyo botwu, atye ki lok mogo ma cwinya pe yom iye ikomwu, pien cokewuni gin mo ma konyo pe iye, ento tye ka kelo bal keken. 18Lok mukwongo ma atyeko winyone en aye ni, ka lwak gucoke kacel, apokapoka bedo tye ikinwu. An bene ki tungcel aye lok meno, 19pien apokapoka mogo myero obed ikinwu, wek jo matye maber gunen woko kamaleng. 20Pien ka wucoke kacel pe wucamo Cam me otyeno pa Rwotwa aye. 21Pien wun ducu ka wucamo, ngat acel acel kwongo camo came woko, kun jo mogo bedo ki kec, ki jo mogo gimer mere woko. 22Wun mono paciwu peke, kama wutwero camo iye cam ki mato matgu? Nyo wucayo jo ducu muye Lubanga, kun wuketo lewic ikom jo ma pe tye ki gin mo? Myero awac botwu gin ango? Wumito ni apwowu? Pe atwero pwoyowu pi lok man.

23Pien pwony mayam apwonyowu kwede, Rwot aye mumiya, ni, i wor meno ma kiketo roro ikome ni, Rwot Yecu okwanyo mugati; 24madong opwoyo, ci obaro iye, omiyogi kun waci, “Man aye koma matye pirwu. Wutim kit man me po kwede pira.” 254 Kitmeno ma gucamo otum, otingo kikopo kun waci, “Kikopo man aye gicike manyen i remona. Wutim kit man ikare ducu ma wumato, me po kwede pira.” 26Pien ikare ducu ma wucamo mugati man, dok bene ka wumato ki i kikopo man, nongo wutye ka yweko lok me to pa Rwot, nio ka en bidwogo.

27En ma omiyo ka dano mo ocamo mugati man, nyo omato kikopo man ma kun kite pe myero, nongo en otimo bal ikom kom ki remo pa Rwot. 28Dano acel acel myero kong okwong ngiine kene, ka dong ocak camo mugati meno ki mato ki i kikopo meno. 29Pien ngat ma camo nyo mato kun pe oniang maber ikom gin ma kilwongo ni kom Rwot, nongo en tye ka kelo ngolo kop ikome kene kace ocamo nyo omato. 30Meno gin ma omiyo jo mapol ikinwu gitwo, dok gigoro bene, ki jo mogo dong guto woko. 31Ka kono nene wan ki komwa kong wangiine kekenwa ki ada, kono pe kingolo kop ikomwa. 32Dong ka Rwot aye ma ongolo kop ikomwa, nongo en opwodowa me pwonyowa, wek pe kingol kop olowa kacel ki jo me lobo.

33Pimeno dong, wutmegina, ka wucoke kacamo cam pa Rwotwa, ngat acel acel myero kong okur lawote. 34Ka dano mo kec tye kaneko, omyero kong ocam cam i pacone, wek pe kingol kop ikomwu ka wucoke kacel. Lok mukene mudong, abicobo ka ao botwu.