1 Jo Korint 8

Cam ma kityero bot jogi

1Lok ma dok ikom cam ma kityero bot jogi. Wangeyo ni, “wan ducu watye ki ngec.” Kit ngec meno miyo dano giwake awaka, ento mar tego niye. 2Dano matamo kekene ni engeyo gin mo, nongo pe ngeyo gin mo kit ma onongo myero onge kwede. 3Ento ka ngat mo maro Lubanga, ci Lubanga bene ngeye.

4Dong lok ma dok ikom cam ma kityero bot jogi; wangeyo ni, “jok pe gin mo i lobo,” dok ni, “Lubanga mo mukene peke, kono en Lubanga aceli keken.” 5Kadi bed tye gin mogo ma kilwongo ni lubanga i polo nyo i lobo, kit macalo tye lwak lubanga ki lwak rwodi mapol mapatpati, 6ento ki tung botwa Lubanga tye acel, en Lubanga Won, ma jami ducu a ki bote, ma wan wabedo tye pire; dok bene tye Rwot acel keken, Yecu Kricito, mamiyo jami ducu bedo tye, wan bene wabedo tye pire.

7Kadi bed kumeno, jo mapol pe gitye ki ngec macalo meno. Jo mogo dong gungi woko i woro jogi nio wa ceng tin; gicamo cam ma kun nongo pud gitamo ni, “Man adada gin ma kityero bot jok;” pien tamgi matye i igi manyutu balgi botgi goro, miyo gitamoni gidoko keni woko pi cam meno. 8Cam pe bimiyo Lubanga pwoyowa; pe wabibedo marac ka pe wacamo cam, pe bene wabibedo maber ka wacamo. 9Ento wugwoke, wek twero ma wutye kwede pe odok gin mo mamiyo dano magoro poto i bal. 10Pien ka dano mo ma tam ma i iye ma nyute bale pud goro, ce oneno ni in ma itye ki ngec ibedo kacam i ot jok, pe itamoni bimedo tekcwiny bote me camo ringo ma kityero bot jogi? 11Pimeno dano ma niyene goroni, ma obedo omeru mayam Kricito oto pire, en bito pi ngeci! 12Dong ka wubalo kit man bot utmegiwu ma niyegi goro, ka dok wubalo tamgi ma nyutu botgi balgi ma pud goro, nongo wubalo bot Kricito. 13Pimeno, kacam aye miyo omera poto i bal, pe dong abicamo ringo matwal, wek pe amii omera opot i bal.