1 Jo Korint 9

Twero ki tic pa Lakwena

1An pe atye agonya? An pe lakwena? Yam pe aneno Rwotwa Yecu Kricito? Wun pe adwogi me tica i Rwot? 2Kadi bed jo mogo pe giye ni an lakwena, ento ki tung botwu an lakwena, pien wun ki komwu aye wubedo lanyut me kwenana i Rwot.

3Man aye pidona bot jo ma giroka ki peny. 4Pe watye ki twero me nongo cam ki mat ma iwa mito? 5Pe atye ki twero me tero dako ma Lakricitayo kacel kweda i wota, macalo lukwena mukene, ki omego pa Rwot, ki Kepa? 6Nyo wan ki Barnaba keken aye myero watii pi camwa pirwa kenwa? 7Anga ma cito i mony, ci cako culu mucarane pire kene? Anga ma pito olok i potone ma pe camo nyig olok ma ocek iye? Lakwat mene ma pe mato cak ma a ikom lim ma en kwayo?

8Atye kaloko lok man ikit pa dano keken? Cik kono pe loko lok marom ki man? 91 Pien i cik pa Moses kicoyo ni, “Pe itwe dog twon ka tye ka nyono bel.” Lubanga mono tame tye tutwal pi dyang? 10En pe oloko lok meno pirwa? I adane loke yam kicoyo pirwa, pien lapur myero opur pur kun nongo tye ki gen, ngat ma dino bel bene myero odin kun tye ki gen me nongo dul mo iye. 112 Ka wacoyo kodi me cwiny ikinwu, meno loke bedo lok madit tutwal ka wakayo jami mogo me kom ki botwu? 12Ka jo mukene gitye ki twero meno ikomwu, ci wan dong pe wakatogi kwede woko?

Ento kadi bed twero meno tye botwa, pe watiyo kwede; wadiyo cwinywa i lok ducu wek pe omii waket ariya mo ma gengo tito lok me Kwena Maber ikom Kricito. 133 Pe wungeyo ni, jo ma gitiyo tic i Ot pa Lubanga ginongo camgi ki i Ot pa Lubanga, dok jo ma gitiyo ikom keno tyer kipoko botgi gitum ma gityero? 144 Rwot bene yam ociko ikit yo acelu ni, jo ma tito lok me Kwena Maber myero gunong gin ma gikwo kwede pi tito lok me Kwena Maberi.

15Ento an pe atiyo ki twero macalo meno wa ki acel. Dok bene pe acoyo lok man ni kono wutima kitmeno. Bedo ber ka ato, kato ma dano mo loko wakena doko gin ma ka cungone peke. 16An pe awake ka atito lok me Kwena Maber, pien meno obedo tica ma omyero atii. Ka pe atito lok me Kwena Maber, ci abineno can. 17Ka atimo man pi mitina pira kena, abinongo mot, ento ka atimo man kun pe tye pi mitina pira kena, nongo atye ka cobo tic ma kimiya. 18Abinongo kit mot ango? Mot ma mera en aye yomcwiny ma anongo itito lok me Kwena Maber, labongo ngolo kit cul mo iye bot dano ma giwinyo, kun bene pe atiyo ki twero ma atye kwede wek anong kony mo ki bot jo ma atito botgi lok me Kwena Maber.

19Kadi bed alone kena inyim dano ducu, ento dong atyeko mine me bedo opii pa jo ducu, wek anong dano mapol. 20Ka atye katic bot Lujudaya aloke abedo macalo Lujudaya, wek anong Lujudaya mogo; bot jo matye ite Cik pa Moses abedo bene macalo ngat matye ite Cik, kadi bed an ki koma pe atye ite Cik, wek anong jo matye ite Cik. 21Bot Lurok ma pe ite Cik pa Moses abedo macalo ngat ma pe ite Cik, kun nongo pe atye labongo Cik pa Lubanga, ento abedo ite Cik pa Kricito. 22Bot jo ma gigoro i niyegi, aloke adoko dano magoro bene, wek anong jo magoro. Alubu kit ducu ma dano gitye kwede, wek omiya alar jo mogo i yo ducu. 23Meno ducu atiyo pi lok me Kwena Maber, wek an bene anywak gum mo ma a iye kacel kwedgi.

24Pe wungeyo ni, jo ma gipyem i ngwec ducu giringo, ento ngat acel keken aye ma limo mot me pwoc? Wun bene wuring kumeno wek wunong mot me pwoc. 25Dano acel acel ma pyem i tuku myero ogwoke kene i yo ducu. Kitimo meno wek gunong lalukana ma bale woko, ento wan watimo pi nongo lalukana ma pe bale. 26An mera aringo atir ma pe acabe atata; ka awaci atye i tuku me donge, pe adongo piny macalo ngat ma dongo yamo ata. 27Acano koma, kun bene aloye calo opiina, wek ka dong atyeko tito lok bot jo mukene, pe abed ngat ma pe kipwoyo.