1 Jo Korint 7

Lok ikom nyom

1Dong me dok i lok ma wucoyo waraga bota pire, bedo ber ka laco mo pe onyomo dako, 2ento pi gengo tim me abor, omyero laco acel acel obed ki dakone, ki dako acel acel bene omyero obed ki cware. 3Laco omyero ocob miti pa dakone, ki dako bene omyero ocob miti pa cware. 4Dako pe loyo kome kene, ento kono cware aye maloyo; kitmeno laco bene pe loyo kome kene ento dakone bene aye maloyo. 5Dano acel acel pe myero okwer pi kome bot lawote, kono gwok nyo pi kare manok mo keken ma wuyubu ayuba dok wuye kacel, wek wunong kare me bedo kalego Lubanga. Ka lacen dok wuribe kacel, wek Catan pe obitwu, pi miti ma wutye kwede ma pe juke. 6Awaco lok man macalo tam amiya keken, ento pe aketo macalo cik. 7Kono onongo twere imitina, kono dano ducu gubed kit macalo atye kwedeni; ento dano acel acel tye ki kit mote mutiko en, ma Lubanga omiye; inongo ni dano moni tye ki mot man, ki dano mukene tye ki mapate.

8Bot jo ma pud peya gunyomo, ki bot mon ma coggi oto, awaco kit man ni, bedo ber ka onongo gubedo macalo an. 9Ento ka pe giromo juke ken gi myero gunyom, pien nyom ber kato ma laco nyo dako obedo ka ciro miti me kom. 101

Bot jo madong gunyome, acikogi ni dako pe okwer cware, ento man pe an aye ma aciko, Rwot gire aye ma ociko. 11Ento kace dako mo dong oweko cware, myero obed kene, nyo odwog cen bot cware, pe oger laco mo mukene. Dok laco bene pe myero oket keny ikin gin ki dakone.

12Bot jo mukene gu, an ki koma aye ma atye kalok, pe Rwot gire, ni, kace Lakricitayo mo tye ki dakone ma pe oye Yecu, ka dakonu oye me mede ki bedo kwede, laco pe myero oket keny ikin gi woko. 13Ka dako mo bene tye ki cware ma pe oye Yecu, kace cware oye me mede ki bedo kwede, pe myero okwere. 14Pien laco ma pe oye Yecu doko leng pi dakone, ki dako ma pe oye Yecu bene doko leng pi cware ma Lakricitayo ni. Ka pe kumeno, kono lutinowu pe gibedo leng, ento kit macalo tye, gileng gigi. 15Ento ka ngat ma pe oye Yecu mito poke woko ki lawote, wek opoke. Dong lok macalo meno Lakricitayo ma laco nyo ma dako pe tye iye ki dic mo, pien Lubanga olwongowa ni wabed ki kuc. 16In dako, ingeyo ningning ka ibilaro cwari? Nyo in laco, ingeyo ningning ka ibilaro dakoni?

Lub kit kwo ma Rwot omiini

17Myero dong dano acel acel olub kit kwo ma Rwot omiye, en kwo mayam en tye iye ikare ma Lubanga olwonge. Man engin ma aciko ki jo ducu ma guye Kricito. 18Tye dano mo ma onongo dong olire ikare ma kilwonge? En pe myero openy yo me dwoko kome macalo dano ma pe kiliro. Tye dano ma onongo peya kilire ikare ma kilwonge? En pe myero openy yo me lire. 19Pien bedo ma kiliri ki bedo ma pe kiliri pe konyo gin mo; ento gwoko cik pa Lubanga aye konyo. 20Dano acel acel myero obed ki kit ma onongo en tye kwede ikare ma kilwonge. 21Ikare ma kilwongi onongo ibedo opii? Pe ipar. Ento ka inongo yo me a woko ki i opii, ci ti kwede. 22Ngat ma kilwongo me bedo i Kricito ma onongo en opii, en aye dano ma Rwot dong ogonyo woko ki i opii. Kitmeno bene, ngat ma onongo lone kene ka kilwonge, dong odoko opii pa Kricito. 23Wun jo ma kiwilo ki wel; pe wudok opii pa dano mo. 24Utmegina, dano acel acel myero obed inyim Lubanga kit ma ceng kilwonge kwede ca.

Jo ma peya gunyome ki mon ma coggi oto

25Lok ma dok ikom jo ma pud peya gunyome, pe anongo cik mo ma oa ki bot Rwot, ento amiyo tama iye macalo dano ma Lubanga dong otyeko timo kica bote, en ma omiyo abedo ngat ma gene. 26Dong atamo ni, pi peko matye kabino anyim maraci, bedo ber ka dano moni obedo kit macalo tye kwede. 27Itye ki dako? Pe item gonyo nyom woko. In pe inyomo? Pe imit nyom. 28Ento ka inyomo, nongo pe itimo bal mo. Nyako bene ka kinyomo nongo pe otimo bal. Ento jo ma nyome gibinongo ayelayela me kwo me lobo man; amito ni ka twere kono akwanyo ayelayela meno woko ki ikomwu. 29Utmegina, gin ma aloko en ene ni, kare dong odoko ding; cake kombedi jo matye ki mon myero gubed calo jo ma pe ki mon, 30ki jo ma kumu myero gubed calo jo ma pe kumu, jo ma cwinygi yom calo jo ma pe cwinygi yom, jo ma wilo jami gubed calo jo ma pe tye ki gin mo, 31jo ma tiyo ki jami me lobo man calo jo ma pe gitye katic kwede, pien lobo kit matye kwedeni bitum woko.

32Amito wubed labongo par mo. Laco ma pud peya onyomo, cwinye paro lok pa Rwot, kit ma myero eyom kwede cwiny Rwot. 33Ento laco madong onyomo, paro mere lok me lobo kit ma ebiyomo kwede cwiny dakone; 34tame poke i dul aryo. Dako ma pe kinyomo, nyo nyako, bene paro lok pa Rwot, wek ebed maleng ikome ki i cwinye. Ento dako ma kinyomo paro mere lok me lobo, kit ma myero eyom kwede cwiny cware. 35Awaco lok man pi konyowu, pe me gengowu agenga, ento wek omii gin ducu owot kakare, cwinywu bene obed ikom Rwot, ma gin mo pe ywayo tamwu tero woko cen.

36Ka laco mo tamo ni kit bedone ki nyako ma etongo keny woko ikome pe tye atir, ka mare dit ikome, en dong myero otim kit macalo cwinye mito. Bal mo pe iye, gitwero nyome. 37Ento ka laco mo cwinye tek kun pe tye gin mo ma diye, madong bene nongo otyeko mine kene me weko nyakonu ma pe onyome, nongo otimo ber kace twero loyo tame. 38Kumeno ngat munyomo nyako ma otongo keny woko kwede nongo otimo ber, ento ngat ma pe onyomo nongo otimo ber makato.

39Cik gengo dako ka pud cware tye kwo, ento ka cware dong oto woko, ci en bedo ki kare me nyome ki laco mo mukene ma cwinye mito, matye ikin jo pa Rwot keken. 40Ci twero miyo dakonu cwinye bedo yom makato kace en obedo kitmeno ma pe dok onyome. Meno tama, atamo bene ni atye ki cwiny pa Lubanga.