1 Jo Korint 6

Pido ikin jo ma guye Yecu

1Ka dano mo ikinwu tye ki lok mo ikom lawote, pingo lewic pe make me cito ka pido ki danoni inyim jo ma pe guye Kricito, ma ka pido kwede inyim jo pa Lubanga? 2Pe wungeyo ni jo pa Lubanga aye ma bingolo kop ikom dano me lobo? Ka wun kulu aye ma wubingolo kop ikom lobo, ci pe wuromo ngolo kop mogo matitinone pirwu kenwu? 3Pe wungeyo bene ni wan aye ma wabingolo kop ikom lumalaika? Ento kop ma mako kwo ma watye iyeni kono? 4Kace wutye ki lok mogo me alara ikinwu, pingo wutero inyim jo ma pe guye Kricito? 5Awaco lok man wek lewic omakwu. Pe tye ngat mo maryek ikinwu maromo tyeko lok matye ikin utmege? 6Ma ka timo kitmeno, nen, dano moni dok pido ki lawote wa inyim jo ma pe guye Kricito.

7Ka wupido pido ikomwu kekenwu kitmeno, nongo pe dong kiloyowu woko? Pingo pe ber botwu me ciro gin marac? Bedo ber ka kono wuweko dano gubuyowu. 8Ma ka timo kitmeno, wun ki komwu aye dok wuloke wudok katimo dano marac, dok bene wubuyu kadi wa utmegiwu.

9Pe wungeyo ni jo ma pe guye Kricito, ker pa Lubanga pe bibedo megi? Pe wuwek kibwolwu; kadi lutim tim kwele, nyo jo ma woro cal jogi, ki lutim abor, nyo jo ma butu ki co wadgi, 10nyo lukwo, nyo luworo me jami, nyo lumero, nyo luyet dano, nyo luyak, ker pa Lubanga pe bibedo meggi. 11Jo mogo ikinwu bene yam gubedo macalo jo meno. Ento wun dong kityeko lonyowu me bedo jo maleng, kityeko kwanowu ni wun jo ma kitwu atir pi nying Rwot Yecu Kricito ki pi Cwiny pa Lubangawa.

Wutii ki komwu me keto deyo ikom Lubanga

121

Ngat mo biwaco ni, “Kiyena timo jami ducu.” Ento meno pe nyutu ni jami ducu tye ki kony. “Kiyena timo jami ducu,” ento pe abiye ni gin mo oloka adok opiine. 13Wuwaci, “Cam tye pi ic, ki ic bene pi cam.” Ento gin aryonu ducu Lubanga bityekogi woko. Kom pe tye pi tim kwele, ento tye pi Rwot, Rwot bene tye pi kom. 14Lubanga yam ocero Rwot woko ki ikin jo ma oto, en bicerowa woko bene pi twerone. 15Pe wungeyo ni komwu aye obedo dul kom Kricito? Mono tye myero ka akwanyo dul kom Kricito, ci aloko odoko dul kom malaya? Pe twere! 162 Pe wungeyo ni dano ma ribe ki malaya doko kom acel kwede? Pien kit macalo yam kicoyo ni “Gin aryonu gibidoko kom acel,” 17Ento ngat ma ribe ki Rwot, doko cwiny acel kwede. 18Wubol tim kwele woko. Bal mukene ducu ma dano timo tye woko, pe gudo kome; ento ngat ma timo tim kwele balo kome kekene. 193 Pe wungeyo ni komwu aye ot pa Cwiny Maleng mabedo i iwu, ma Lubanga omiyo botwu? Wun pe wutye pirwu kenwu. 20Dong kiwilowu awila ki wel, pimeno omyero wutii ki komwu me keto deyo ikom Lubanga.