1 Jo Korint 3

Lutic pa Lubanga

1Ento wun wutmegina, yam pe onongo atwero lok kwedwu calo jo matye ki Cwiny pa Lubanga, ento aloko kwedwu macalo jo ma pud tye ki kit me kom ma kinywalowu kwede, macalo lutino lukere i Kricito. 21 Yam apitowu ki cak, pien onongo peya wutwero camo kwon kikome; kadi wa kombedi bene pud pe wuromo camo kwon kikome, 3pien pud wutye ki kit me kom ma kinywalowu kwede. Ka pud wutye ki nyeko ikinwu, ma wuda kekenwu, meno pe nyutu ni pud wutye ikit me kom ma kinywalowu kwede, kun pud wulubu kit pa dano? 42Ka dano mo ikinwu waco ni, “An dano pa Paulo,” ki ngat mukene bene waco ni, “An dano pa Apolo,” meno nongo pe nyutu ni wun pud wubedo dano adana?

5Apolo mono en anga? Paulo kono en anga? Wan mere wabedo lutic mamiyo wuye Yecu. Ngat acel acel tye ki tic ma Rwot opoko bote. 63 Yam acoyo kodi, Apolo oonyo iye pii, ento Lubanga omiyo odongo. 7Kadi bed kumeno, ngat ma ocoyo kodi nyo ngat ma oonyo iye pii, gin ducu pirgi pe dito, kono Lubanga keken aye myero pire obed dit pien en aye mamiyo jami dongo. 8Dano ma ocoyo kodi ki ngat ma oonyo pii iye, gin ducu girom, ngat acel acel binongo mucarane muporo tic ma en otiyo. 9Pien wan lutic kacel ki Lubanga; wun poto pa Lubanga, dok bene wun gedo pa Lubanga.

10Pi kica pa Lubanga ma kimiya, omiyo aketo teguti me gedo macalo ladit me gedo ma ladiru; ki dano mo mukene tye ka gero ot iwiye. Ento dano acel acel myero ogwoke mada pi kit gedo ango ma etye ka gedone. 11Pien pe tye teguti mo mukene doki ma kitwero ketone, kono maca madong tyeni keken, en aye Yecu Kricito. 12Dong ka ngat mo ogedo iwi teguti mukwongonu ki jabu nyo ryal, nyo godi me wel gu, nyo yat nyo lum, nyo reng kal, 13tic ma dano acel acel otiyo binen woko kamaleng. Pien mac me Nino maca binyutu tic pa dano acel acel, ci nyutu kamaleng kit macalo tice tye kwede. 14Kace inen gedo pa danoni odong, en gedo ma ogero ikom teguti mukwongoni, dano meno bilimo mic me pwoc. 15Ento kace gedo pa dano mo owang woko, ci en pe binongo mic mo me pwoc, ento en kikome bibwot, macalo ngat madong oloyo cwicwi ki i mac ka dong okati kamaleng. 164

Pe wungeyo ni wun aye wubedo Ot pa Lubanga me woro en, dok Cwiny pa Lubanga bedo i iwu? 17Dong ka ngat mo obalo Ot pa Lubanga, Lubanga bene bityeke woko; pien Ot pa Lubanga leng, wun ki komwu aye wuot meno.

18Ngat mo pe obwole kekene. Kace dano mo ikinwu tamo ni eryek ikit ma lobo neno kwede, en kong omyero oloke odok laming, ka wek dong odok maryek. 195 Pien gin ma dano me lobo man gitamo ni obedo me ryeko, inyim Lubanga obedo gin me mingo. Pien yam kicoyo ni, “En mako jo maryek iryekogi ken gi, macalo i owic,” 206dok ni, “Rwot ngeyo ni tam pa luryeko mere gin ma konye peke.” 21Pimeno ngat mo pe myero owake ikom ngat mo, pien jami ducu obedo mewu. 22Kadi wa Paulo, nyo Apolo, nyo Kepa, nyo lobo man, nyo kwo, nyo to, nyo gin matye kombedi, nyo gin ma bibedo tye i anyim, magi gu ducu mewu. 23Wun jo pa Kricito, ki Kricito pa Lubanga.