1 Jo Korint 2

Kwena mamako Kricito ma kiguro ikom yatariya

1Utmegina, yam pe abino botwu ki lok mo nyo ki ryeko mo mamalo ikare ma akelo botwu kwena me mung me yub pa Lubanga. 2Onongo amoko tama pe me ngeyo gin mo ikinwu, kono Yecu Kricito keken, ki kit ma gigure kwede ikom yatariya. 31 Yam abedo kwedwu ma agoro, abedo ki lworo madwong, koma bene omyel matek. 4Loka ki gin ma atito yam pe obedo lok mo me ryeko me ywayo tamwu, ento onyutu tek pa Cwiny Maleng, 5wek niyewu pe ocung ikom ryeko pa dano, ento ikom tek pa Lubanga.

Ryeko ma a ki bot Lubanga

6Watito ryeko bot jo muteggi, ento ryeko man pe ryeko me loboni, nyo ryeko pa luloc me kare man, ma twerogi rwenyo wokoni. 7Ento wan watito ryeko pa Lubanga ma en mung ma kikano, ryeko mayam Lubanga oyubu wa con me kelo deyo botwa. 8Pe tye laloc mo me lobo man ma oniang iye; ka onongo nene guniang, kono pe guguro Rwot, won deyo ikom yatariya. 92 Ento kit macalo yam kicoyo ni,

“Gin mogo ma dano pe guneno ki wanggi dok bene pe guwinyo ki itgi;

gin mogo ma pe donyo itam pa dano,

gin magi en aye gin ma Lubanga oyubu pi jo ma mare.”

10Dok bene meno aye gin ma Lubanga omiyo Cwiny Maleng onyutugi botwa. Pien Cwiny Maleng ngiyo jami ducu, dok bene en ngeyo kadi wa lok ducu ma niange tek ikom Lubanga. 11Anga ma ngeyo tam matye i dano mukene? Pe cwiny danoni matye i iye keken aye ngeyo? Kitmeno bene, pe tye ngat mo ma ngeyo tam pa Lubanga, kono Cwiny pa Lubanga keken. 12Yam pe kimiyowa ryeko me lobo man, ento kimiyowa Cwiny ma oa ki bot Lubanga, wek omii waniang ikom kit mot ducu ma Lubanga miyowa pi kicane. 13Meno aye lok ma watito; pe waloko lok ma kipwonyo ki ryeko pa dano, ento watito lok ma Cwiny Maleng opwonyowa kwede, kun wagonyo telok me Cwiny bot jo matye ki Cwiny pa Lubanga. 14Ento dano ma pe ki Cwiny pa Lubanga pe twero gamo gin ma Cwiny pa Lubanga miyo, pien ki tung bote nen calo gin me mingo, en pe twero niang iye, pien gin macalo meno Cwiny Maleng aye miyo dano ngeyo poko. 15Dano matye ki Cwiny pa Lubanga ngeyo poko kin jami ducu, ento ngat mo pe matwero ngolo kop ikome. 163 Yam kicoyo ni,

“Anga ma ngeyo tam pa Rwot?

Anga mayam miye tam?”

Ento wan watye ki tam pa Kricito.