1 Jo Korint 4

Lukwena pa Kricito

1Omyero kinenwa macalo lutic pa Kricito, ki lugwok mung pa Lubanga. 2Gin mamite ki bot lugwok jami, en aye ni omyero gubed jo ma gene. 3Ki tung bota an pe aparo kace wun onyo otkot ongolo kop ikoma, ni atiyo tica i yo mupore onyo pe. An ki koma bene pe angolo kop ikoma kena. 4Pien angeyo ni cwinya leng, ento man pe nyutuni an apeke ki bal. Rwot aye ma ngolo kop ikoma. 5Pimeno, pe wungol kop mo ma peya kare oromo, ma pud peya Rwot odwogo. En aye ma bimenyo gin ducu mukane i piny macol, dok binyutu tam matye i cwiny dano wek onen woko ducu kamaleng. Ikare meno Lubanga bipwoyo dano acel acel ikit ma myero.

6Utmegina, lok magi aloko kun odok ikoma ki ikom Apolo pirwu, wek omii wadok lanyut botwu kun wupwonye ikomwa ki telok man ni, “Wubed kun wulubu gin mayam kicoyo.” Wek dano mo ikinwu pe owake, ma pako dano acel kun cayo kwede ngat mukene. 7Dong anga mono ma oketo in dit makato jo mukeneni woko? Gin ango ma itye kwede ma pe kimiyo ki in amiya? Ka kimiyo ki in amiya, ci pingo iwake kwede kumeno calo pe kimii amiya nono?

8Dong wutye ki gin ducu ma wumito? Dong wudoko lulonyo bene? Dong bene wudoko luker, kadi bed wan pe luker! Atikane kono onongo wamito ni wudok luker gire, wek wan bene wabed luker kacel kwedwu. 9Pien atamo ni, nen calo Lubanga onyutuwa wan lukwena calo jo mudong cen tutwal, macalo jo ma kingolo kop me to iwigi; pien dong wadoko ginanena pi jo matye iwi lobo ducu, bot lumalaika ki bot dano. 10Dong wadoko luming pi Kricito, ento wun wuryek i Kricito. Wan wagoro, ento wun wutek. Kiketo deyo ikomwu, ento wan kicayowa acaya. 11Nio kombedi wan wabedo kec, orwo pii oketowa woko, bongo me arukawa peke, kigoyowa, ki pacowagu bene peke. 121 Wacane kun watiyo tic matek ki cingwa. Ka dano giyetowa, wan walamo gum ikomgi; ka giunowa, wan waciro acira; 13ka gibalo nyingwa, wan wanwere giwa anwera ki mwolo. Dong wadoko calo yugi me wi lobo; wan dong cete me jami ducu.

14Pe acoyo lok man ni wek lewic omakwu, ento me pwonyowu macalo lutinona ma amaro. 15Kadi bed wutye ki lupwony alip ki alip ma gitelowu i yo pa Kricito, pe wutye ki wego mapol. Yam adoko wonwu i Kricito pi lok me Kwena Maber. 162 Pimeno alegowu, wulub kita. 17Man en gin ma omiyo acwalo Temceo botwu. Temceo aye latina ma amaro i Rwot, dok gene. En bipoyo wiwu i yo ma atye kalubune i Kricito Yecu, ma apwonyo ki jo ducu muye Kricito ikabedo ducu. 18Jo mogo ikinwu gitye ka tamo ni an pe abibino botwu, omiyo gitye ka wake. 19Ento ka Rwot oye ci abio botwu oyot, ento pe abiketo cwinya ilok ma giloko aloka ma gitye ka wake kwedeni, ento wek abinen ka gitye ki tek pa Lubanga. 20Ker pa Lubanga pe ocung ikom gin ma kiloko aloka ento ocung ikom tek. 21Wumito gin ango? Wumito abin botwu ki odo, nyo abin ki mar ki cwiny me mwolo?