1 Jo Korint 14

Dumu leb mapatpat ki tucu lok me nebi

1Wuket mar aye obed tamwu mukwongo ma pire dit; wuket cwinywu bene me nongo mot ma Cwiny Maleng miyo, makato ducu mot me tito lok me nebi. 2Pien dano ma dumu leb mapatpat pe loko ki dano, ento nongo loko ki Lubanga. Ngat mo ma niang i loke pe, pien nongo en tye kaloko mung me Cwiny Maleng. 3Ento dano ma tucu lok me nebi loko ki dano kun tego niyegi, ci cuko cwinygi dok kweyo cwinygi bene. 4Dano ma dumu leb mapatpat tego niye ne kene; ento ngat ma tucu lok me nebi nongo tye ka tego jo ma oye Kricito i niyegi. 5Amito ni wudum leb mapatpat, ento makato ducu amito wutit lok me nebi. Dano ma tucu lok me nebi pire dit kato ngat ma dumu leb mapatpat, nikwanyo kace tye ngat mo matwero gonyo telok ma en loko bot dano, wek okony jo ma oye Kricito wek gubed ma gutegi.

6Utmegina, ka abio botwu kunu ma kun nongo adumo leb mapatpat, abibedo ki kony ango botwu, ka pe akelo botwu lok pa Lubanga ma kinyuta, nyo ngec mo, nyo lok mo me nebi ma Lubanga omiya me atita, nyo pwony mo? 7Kadi wa gin ma pe ki kwo, ma kok calo nyamulere nyo nanga, kace dwone pe winye maber, ci dano gibiniang ningning i wer ma kikutu nyo kigoyo? 8Bila bene ka pe kikutu idwon me lwongo kikome, ci anga ma biyube pi cito ilweny? 9En i yo acelu, anga ma biniang i gin ma wuloko ka wudum aduma ki leb mapatpat, kun wuloko lok ma pe giniang tere? Lokwu biket woko i yamo ata. 10Tye leb mapol ma kitgi patpat iwi lobo, ento pe tye mo ma teloke peke. 11Ento ka pe angeyo leb ma dano moni tye kaloko, abedo macalo larok bote, ki en bene bedo macalo larok bota. 12Dong wun bene; kit macalo wutyeko keto cwinywu me nongo mot me Cwiny, wuteme matek me tic ki gin ducu ma tego jo ma oye Kricito, wek gucung matek.

13Pimeno, dano ma dumu leb mapatpat myero oleg Lubanga wek okonye me gonyo tyen lok ma en loko. 14Pien ka alego Lubanga ma kun nongo adum aduma ileb mapat ma pe aniang tere, nongo cwinya aye lego, ento nongo pe medo ngec mo i niang ma mera. 15Atim ango doki? Abilego Lubanga i cwiny dok bene abilego lega i ngec ki niang; abiwero wer i cwiny dok bene abiwero wer i ngec ki niang. 16Ka pe kumeno, ka ipwoyo Lubanga i cwiny keken, dano mukene ata ma obino icokewu twero gamo “Amen” ipwoci nu ningning, ma kun pe oniang i gin ma iloko? 17Kadi bed onongo imiyo pwoc maber, nongo pe ikonyo dano mukene ca me tegi kadi ki acel mo. 18Apwoyo Lubanga pien an adumu leb mapatpat ma akatowu ducu, 19ento icoke pa jo ma oye Kricito amito loko lok abic mo keken ki ngec me niang wek apwony ki jo mukene, makato loko lok alip ki alip kun adum aduma ki leb mapatpat ma pe kiniang tere.

20Utmegina, pe wubed ki tam me tino, wubed lukere i timo gin marac, ento wubed jo muteggi i tamwu. 211 Yam kicoyo i cik ni,

“Abilok ki jo me rok man

i leb pa jo ma dum ma pe ginang tere,

ki i dog jo ma gin lurok ento kadi bed kumeno,

ento gin pe gibiwinyo loka.”

22Meno nyutu ni, dumu leb mapatpat kimiyo wek obed lanyut bot jo ma pe guye Kricito, pe bot jo ma oye, ento tito lok me nebi tye pi jo ma oye, pe pi jo ma pe guye. 23Dong ka dano ma guye Kricito gucoke kacel kun jo ducu ma iye gidumu leb mapatpat, dok ka jo mukene ata, nyo ma pe guye gubino i kacoke, pe gibiwaco ni wun jo ma obange? 24Ento ka dano ducu tye katucu lok me nebi, ce dano mo ma pe ye, nyo dano mo ata obino i kacoke, biniang ikom bale pi gin ma en owinyo ki bot jo ducu. Lok ma dano ducu guloko bingolo kop ikome, 25dok mung matye i cwinye bene en bitucu woko kamaleng, ka dong biryebe piny ci cako woro Lubanga kun tucu ni, “Adada, Lubanga gire tye ikinwu.”

Woro ma opore i Kanica

262

Utmegina, gin ango ma omyero dong kitim? Ka wucoke kacel, ma nongo ngat acel acel ikinwu tye ki gin mo; calo wer, nyo pwony, nyo ki lok ma kinyute, nyo ngat mukene ma dumu leb mapatpat, ki ngat mukene nongo ngeyo gonyo teloke; gin nu ducu omyero otime i yo makelo niang kun konyo tego jo ma oye Kricito. 27Ka dano dumu leb mapatpat, myero gubed gin aryo nyo adek, pe okat wel enuni, kun gileyo aleya, ma ngat mo gonyo teloke. 28Dong ka onongo pe tye ngat mo ma gonyo, ci myero dano ma mito lok ileb mapatpat oling woko litik i coke pa jo ma oye Kricito, en olok kekene ki Lubanga. 29Ento jo aryo nyo adek ma gitucu lok me nebi gitwero lok, kun jo mukene ni ducu gingiyo lok ma gin loko. 30Kace inen Lubanga onyutu lok mo bot ngat mukene ma obedo piny, dong dano manen tye kalok ca myero oling woko. 31Pien wun ducu wutwero tito lok pa Lubanga kun wuleyo aleya, wek jo ducu gupwonye, dok bene ocuk cwinygi. 32Jo ma gitucu lok me nebi gitye ki twero me loyo cwiny ma kimiyogi me tucu lok me nebi. 33Pien Lubanga pe tice me kelo anyobanyoba, en gire won kuc.

Macalo time i coke ducu pa lwak muye Yecu, ma gin jo pa Lubanga, 34mon myero guling woko litik ka gitye i kacoke. Pien pe kiyegi me lok; gin myero gubed ite loc, macalo cik pa Lujudaya bene oloko. 35Kace gimito ngeyo lok mo, myero gupeny coggi ki paco. Bedo me lewic mada, dako me lok i coke pa lwak dano ma guye Kricito. 36Gwok nyo wutamo ni lok pa Lubanga yam oa ki botwu ba, dok obino botwu keken?

37Ka ngat mo tamo ni en lanebi, nyo etye ki mot mogo me Cwiny, omyero onge ni lok ma acoyo botwu ni en aye cik ma oa ki bot Rwot. 38Ento ka ngat mo pe oketo lok man itam, pe bene wuketo tamwu ikome. 39Kitmeno, wutmegina, wuket cwinywu itucu lok me nebi, ento pe wugeng dumu leb mapatpat bene. 40Ento wutim jami ducu i yo mupore, dok kore ki kore.