Matayo

Kwena Maber ma

MATAYO

Ocoyo

Lanyut wilok madito ma i buk man

Kwena Maber ma Matayo ocoyo nyutu kamaleng ni Yecu en aye Lalar mayam kiciko pire. I en Lubanga ocobo cikene bot jone kit ma kicoyo kwede i buk me Cik Macon. Kwena man maber ni pe pi Lujudaya keken onyo kama Yecu kinywalo iye dok bene odongo ki iye ni, ento pi wilobo ni kulu.

Buk pa Matayo kicano maber kore ki kore kun cake ki tekwaro pa Lujudaya, nywalo Yecu, batijane, atematema ma Yecu owok ki iye, tito loke, pwonye ki cango two mapatpat ma en otimo i Galilaya. Ki inge man Matayo otito pi wot pa Yecu nia ki i Galilaya cito Jerucalem kama kineko en iye ka lacen en ocer ki ilyel.

Kwena man Maber ni nyutu Yecu macalo lapwony madit ma oa ki bot Lubanga matye ki ngec dok ki twero me gonyo tecik pa Lubanga maber. Buk man bene onyutu Yecu macalo lapwony ma pwonyo pwony ma atir ikom lok ma mako ker pa Lubanga.

Matayo oketo pwony pa Yecu i dul abic: (i) Pwony pa Yecu iwi got. Dit me pwony man ocung ilok magi: Bedo ki kit ma atir, tic maber, twero ma jo ma ye Lubanga tye kwede ki agiki ma megi i Polo ma i nongo icura abic nio kwede wa icura abiro; (ii) Miyo tic bot lukwenane apar wiye aryo matye i cura apar; (iii) Pwony pa Yecu mapatpat icaro lok ma mako ker me polo nonge icura apar wiye adek; (iv) Pwonye ma mako bedo dano ma kite atir dok muteggi i niye ma inongo icura apar wiye aboro; (v) Pwonye pi kare me agiki me kwo man ki bino me ker pa Lubanga, ma nonge icura pyere aryo wiye angwen ki pyere aryo wiye abic.

Dong wilok madito ma i buk man en aye; timo tic maber ki bedo dano ma lagen.

I buk man bene en aye kama Yecu oloko madwong lok ma mako Cik pa Moses ki tekwaro pa jo Lujudaya.

Agiki me buk man tito pi to pa Yecu, cere ki ilyel, ciko ki oro lupwonyene.

Lacim wilok madito ma i buk man

Tekwaro ki nywale pa Yecu Kricito

Tic pa Jon Labatica

Batija ki atematema pa Yecu

Tic pa Yecu i Galilaya

Wot pa Yecu nia ki Galilaya me cito i Jerucalem

Cabit me agiki i Jerucalem ki kabedo ma orumu Jerucalem

Cer ki nyute pa Rwotwa Yecu