Matayo 19

Lok ma Yecu opwonyo ikom keto nyom

(Mar 10:1-12; Luk 16:18)

1Ikare ma Yecu dong otyeko loko lok magi, oa woko ki i Galilaya, ci obino ibut lobo me Judaya matye loka Jordan. 2Lwak madwong gulube, ci ocangogi ki kunu.

3Luparicayo mogo gubino bote, ci gucako omo cwinye kun gin penye ni, “Cik miyo twero ni laco myero oryem dakone pi tyen lok mo keken?” 41 Yecu odok iye ni, “Pud peya wukwano lok ma waco ni, cake i acaki piny Lacwec ocweyogi laco ki dako? 52 Dok owaco ni, ‘Pi tyen lok man laco biweko wone ki mine ci biribe ki dakone, ci gin aryoni dong gidoko kom acel.’ 6Kitmeno pe dong gibedo kom aryo ento kom acel. Pimeno gin ma Lubanga oribo kacel, ngat mo pe opok kin gi.” 73

Dok gupenye ni, “Ka kumeno, pingo Moses yam ociko ni kimii waraga me keto nyom, ki ryemo dako woko?”

8En owaco botgi ni, “Pi nwang cwinywu oweko Moses oye ni wuryem monwu, ento cake i acaki piny onongo yam pe tye kitmeno. 94 Ento awaco botwu ni, laco mo ma oryemo dakone, ma pe pi tim me abor, ce onyomo dako mukene, nongo otimo abor.”

10Lupwonyene guwace ni, “Kace lok ikom laco ki dakone tye kitmeno, ci dong bedo ber ka dano pe gunyome.” 11Ento Yecu owaco botgi ni, “Dano ducu pe twero jolo pwony macalo man, ento kono jo ma kimiyo botgi keken aye twero. 12Pien tye jo mogo ma lulur cake wa ki ii megigi, ma kinywalogi kitmeno; tye jo mukene ma lulur ma nongo dano aye ma okologi; ki tye jo mukene malulur ma nongo gukole ken gi pi ker me polo. Dano matwero ye lok man, wek oye.”

Yecu omiyo gum ikom lutino

(Mar 10:13-16; Luk 18:15-17)

13Lacen kikelo lutino bot Yecu ni oket cinge ikomgi kun lego Lubanga pirgi. Lupwonyene gujuku dano woko. 14Ento Yecu owaco botgi ni, “Wuwek lutino gubin bota, pe wugeng gi, pien ker me polo tye pi jo macalo gin.”

15Ci oketo cinge ikomgi, ka dong oa woko ki kunu.

Awobi ma lalonyo

(Mar 10:17-31; Luk 18:18-30)

16Nen, dano mo obino bot Yecu kun penye ni, “Lapwony, atim gin ango maber wek alim kwo ma pe tum?”

17Yecu openye ni, “Pingo ipenya pi gin maber? Ngat maber tye acel keken. Ka i mito donyo i kwo, ci igwok Cik.” 185

Openyo Yecu ni, “Cik mene?”

Yecu owace ni, “Pe ineki; Pe i tim abor; Pe ikwal; Pe ibed caden me goba; 196 Wor woru ki meni; ki dok ni, Mar lawoti macalo imare keni.”

20Awobi meno odoke iye ni, “Magi ducu dong atyeko lubugi; gin ango ma pud odong?”

21Yecu ogamo doge ni, “Kace i mito bedo maber labongo roc mo ikomi, cit icat jami ducu ma itye kwede, ci imii lime ki lucan, ci i bibedo ki lwak lonyo ma kikano piri i polo; ka dong ibin ilub kora.”

22Ikare ma awobi ni owinyo lok man, ocako cito woko kun cwinye cwer tutwal; pien onongo yam tye ki lim madwong.

23Ci Yecu owaco bot lupwonyene ni, “Adada awaco botwu ni, bibedo tek mada bot dano ma lalonyo me donyo i ker me polo. 24An dok awaco botwu aye ni, kinaga twero donyo iwang libira7 oyot, makato lalonyo me donyo i ker pa Lubanga.” 25Ka lupwonye guwinyo lok man, ci guuru tutwal kun gipenye ni, “Anga ma dok twero lare?” 26Ento Yecu onenogi ci owaco botgi ni, “Ki bot dano man pe twere, ento ki bot Lubanga jami ducu twere.” 27Petero ogamo kun waco ni, “Nen, wan waweko jamiwa ducu ci walubi. Wabinongo iye gin ango?” 288 Yecu owaco botgi ni, “Adada awaco botwu ni, ikare me lobo manyen, ka Wod pa dano bibedo iwi komkere me deyo, wun jo madong wulubu kora bene wubibedo iwi komker apar wiye aryo, kun wungolo kop ikom kaka apar wiye aryo me Icrael. 29Dong dano acel acel mayam oweko odi, nyo omege nyo nyimege, nyo wone, nyo mine, nyo lutino, nyo potine, pi nyinga, binongo jami makato magi tyen miya, ki en bene binongo kwo ma pe tum. 309 Jo mapol ma gin gubedo jo me wi atii gibidong cen, ki jo ma gudong cen gibibedo jo me wi atii.”