Matayo 20

Lutic i poto olok

1“Ker me polo rom ki dano ma en won tic ma opuk woko odiko con ocito ka wako lutic i poto oloke. 2Oyubu lok kwedgi ni ebiculugi iwel lim mamite pi nino acel acel kit ma kicul kwede cul me nino ducu, ci ocwalogi i poto oloke. 3I cawa adek en ocito woko, ci oneno jo mukene ma gucung acunga i cuk labongo gin mo ma gitiyo. 4Won tic owaco botgi ni, ‘Wun bene wucit i poto oloka, dok abiculu wun cul ma atir.’ Ci gin gucito. 5Ikare ma dok en okato ocito woko i cawa abicel ki cawa abongwen, otimo marom ki me wi atii. 6I kine me cawa apar wiye acel en dok ocito onongo jo mukene gucung acunga kunu; ci openyogi ni, ‘Pingo wucung kany dyecengi kulu labongo tiyo gin mo?’ 7Gudoke iye ni, ‘Pien dano mo pe owakowa.’ Ci won ot owaco botgi ni, ‘Wun bene wucit i poto oloka.’ 81

Ka dong oo otyeno, won poto olok owaco bot ladit maloyo lutice ni; ‘Lwong lutic, ci icul mucaragi. Cak ki ikom jo ma gucako tic lacen, nio kwede wa ikom jo ma gukwongo bino.’ 9Ka jo ma gucako tic i cawa apar wiye aceli gubino, ci dano acel acel ikin gi ogamo mucara me nino acel kulu. 10Ka jo ma onongo gukwongo cako tic gubino, gutamo ni gwok onyo gibinongo mabup makato; ento ngat acel acel ikin gi kimiye mucara me nino acel. 11Ka dong gugamo, gucako ngur bot won tic, 12kun giwaco ni, ‘Jo magi ma gubino lacen ni gutiyo tic pi cawa acel keken, ento in imiyo gubedo rom kwedwa kun wan wacane ki tic i dyeceng malyeti kulu.’ 13Ento won tic odok iye ki dano acel ma ikin gi ni, ‘Larema, pe atye ka timi marac. Yam pe icike kweda ni ibigamo wel mucara meno? 14Gam meri en, citi. An amiyo bot dano man ma lacen kit ma amiyo botini. 15Pe myero atii ki jamina kit macalo iya mito? Gwok onyo nyeko omaki pi gin maber ma atiyo ni ba’? 162 Kitmeno jo ma gudong cen gibibedo jo me wi atii, ki jo me wi atii gibidoko jo ma lacen.”

Yecu otito pi tone tyen me adeke

(Mar 10:32-34; Luk 18:31-34)

17Ikare ma Yecu tye kaito cere me cito i Jerucalem, otero lupwonyene i mung. Ka gitye i yoo owaco botgi ni, 18“Wunen, dong watye kaito cere wacito i Jerucalem. Wod pa dano dong kibimiye i cing ajwaki madito pa Lubanga ki Lupwonycik. Kibingole kop me to, 19ci kibimiye i cing Lurok wek gungale, gupwode ki del. Gin bigure woko ikom yatariya, ento en bicer woko inge nino adek.”

Lega pa Yakobo ki Jon

(Mar 10:35-45)

20Lacen megi lutino pa Jebedayo obino bot Yecu kacel ki lutino awobene, ci ogungo piny inyime, ci olege pi gin mo. 21Yecu openye ni, “Imito ango?” Odok iye ni, “Cike pi lutinona aryoni, ni ngat acel obed kangeti tung lacuc, ki acel bene obed kangeti tung lacam, i ker meri.” 22Ento Yecu odoke iye ni, “Wun pe wungeyo gin ma wulego. Wun wutwero mato ki kikopo me can ma abimato ni?” Gudoke iye ni, “Watwero.” 23Yecu dok owaco botgi ni, “Kikopo me can ma an abimato ni wun bene wubimato, ento lok me bedo itung bada ma lacuc nyo ma lacam pe an aye apoko. Meno bibedo pa jo mayam Wora oyubu pirgi wa con.”

24Ka lupwonye apar mukene ni guwinyo loke, ci cwinygi ocwer mada ikom omego aryonu. 253 Ento Yecu olwongogi bote, ci owaco ni, “Wun wungeyo ni, jo ma kilwongogi ni gin lulo Lurok giloyo dano ki tek, dok luditogi bene gibedo ki twero ikomgi. 264 Pe bibedo kitmeno ikinwu; ento ngat ma mito bedo ladit ikinwu aye omyero obed laticwu, 27ki ngat ma mito bedo mukwongo ikinwu, en aye myero obed laticwu. 28Kitmeno Wod pa dano bene pe obino ni omyero ki tiine, ento ni wek en aye etii ki dano, ki pi miyo kwone me koko jo mapol.”

Yecu ocango lutowang aryo

(Mar 10:46-52; Luk 18:35-43)

29Ikare madong gitye ka a woko ki i Jeriko, lwak madwong gulubu kore. 30Nen, lutowang aryo ma gubedo piny inget gudo ka guwinyo ni meno aye Yecu ma obikato ni, ci gudange matek ni, “Lakwar Daudi, kica omaki ikom wa ba!”

31Lwak gujukugi, kun giwaco botgi ni guling; ento gin gumede ameda ki dange ni, “Rwot, kica omaki ikom wa do, Lakwar Daudi!” 32Yecu ocung ci olwongogi, kun waco ni, “Wumito atim gin ango pirwu?” 33Gudoke iye ni, “Rwot wamito wangwa oyabe.” 34Cutcut kica omako Yecu ikomgi, ci ogudu wanggi. Ci gucako neno piny, ka dong gulubu kore.