Matayo 21

Yecu odonyo i Jerucalem ki kwogo madit

(Mar 11:1-11; Luk 19:28-40; Jon 12:12-19)

1Ikare madong gin cok oo i Jerucalem, gubino i Betepage, ikor got Jeituni. Ci Yecu ooro lupwonyene aryo, 2ocikogi ni, “Wucit i gang matye inyimwu. Cut wubinongo kana ma kitweyo, tye gin ki latine; wugonygi ci wukelgi bota. 3Kace dano mo biwaco lok mo botwu, wubidoke iye ni ‘Rwot aye mitogi,’ ci rwedgi bicwalogi kany oyotoyot.” 4Man otime wek lok mayam lanebi oloko ocobe kakare ni, 51

“Wuwac bot jo Cion ni,

Nen ka Rwotwu bino botwu,

kun obedo iwi kana ki mwolo,

iwi latin kana.”

6Lupwonye gucito gutimo kit macalo Yecu ocikogi kwede ni. 7Gukelo kana ki latine, gupeto bongigi ikome ka dong Yecu obedo iwiye. 8Jo mapol ikin lwak gupeto bongi i dye yoo, ki jo mogo gutongo jang yadi gupeto i dye yoo. 92Lwak dano mapol ma gutelo yoo ki jo mapol malubu kore gubedo ka dange ni:

“Ojana, obed bot Lakwar Daudi!

Lubanga omii gum ikom ngat ma bino

inying Rwot!

Ojana malo iwi polo!”

10Ka dong odonyo i Jerucalem ci taun ducu otuge woko pire, kun dano giwaco ni, “Man anga?” 11Lwak gugamo ni “Man aye lanebi Yecu ma oa ki i Najaret me Galilaya.”

Yecu odonyo i Ot pa Lubanga

(Mar 11:15-19; Luk 19:45-48; Jon 2:13-22)

12Yecu odonyo i Ot pa Lubanga, ci oryemo jo ducu ma onongo gicato wil ki ma giwilo jami i Ot pa Lubanga. Oryebo meja pa lulok cente, ki kom pa lucat amam. 133 Ci owaco botgi ni, “Kicoyo ni, ‘Oda kibilwongo ni ot me lega’; ento wun wuloko odoko boro pa luyak.”

14Lutowang ki lungolo gubino bote i Ot pa Lubanga ci en ocangogi. 15Ento ikare ma ajwaki madito pa Lubanga ki Lupwonycik guneno gin me aura ma en otiyo, ki lutino ma dange i Ot pa Lubanga kun giwaco ni, “Ojana, obed bot Lakwar Daudi!” Man omiyo kiniga omakogi matek. 164 Gupenye ni, “Iwinyo gin ma jo magi tye kawacone?”

Yecu ogamo ni, “Awinyo. Yam pe wukwano ni,

‘Wer ma lutino lukere ki lutino ma pud dot

giwero me paki ber atika?’”

17Lacen owekogi, oa ki i taun ocito i Betania ci obutu kunu.

Yecu oceno yat oduru

(Mar 11:12-14,20-26)

18Odiko ma en dong dok Jerucalem, kec oneke. 19Ma oneno yat oduru mo inget yoo, ci ongak itere, pe onongo iye gin mo, ento onongo pote keken. Yecu owaco bot yat oduru nu ni, “Pe dok ibinyako nyiggi matwal.” Cutcut oduru meno otugi tal woko.

20Ka lupwonye guneno ci guuru tutwal, kun gipenyo ni, “Yat oduru ni dok otugi two woko oyotoyot ningning?” 215

Yecu odok iye botgi ni, “Adada awaco botwu ni, ka onongo wutye ki niye, ma kun pe wukalo akala, onongo pe wutwero timo gin ma otime ikom oduru ni keken, ento wutwero waco ki got man ni, ‘Muke, dok itinge ipot wa i nam’, ci bitime bene. 22Gin ducu ma wupenyo ilega, wubinongo, kace wutye ki niye.”

Kipenyo kit twero pa Yecu

(Mar 11:27-33; Luk 20:1-8)

23Ikare ma Yecu odonyo i Ot pa Lubanga, ci ajwaki madito pa Lubanga ki ludongo pa lwak gubino bote ma onongo en tye kapwony, gupenye ni, “Twero mene ma omiyo itimo gin magi, dok anga ma omiyo ki in twero meno?”

24Yecu ogamo doggi ni, “An bene abipenyowu ki peny acel; kace wudoka iye, ci dong abitito botwu twero ma an atimo gin magi. 25Batija pa Jon twerone oa ki kwene? Oa ki i polo nyo ki bot dano?” Ci gucako pyem ikin gi keken gi kun giwaco ni, “Ka wawaci, ‘Twerone oa ki i polo’, ci en bipenyowa ni, ‘Pingo kono onongo pe wuye en?’ 26Ento kace wawaco ni, ‘Oa ki bot dano’, walworo lwak; pien gin ducu gingeyo maber ni Jon aye lanebi atika.” 27Ma omiyo gudok iye bot Yecu ni, “Pe wangeyo.” Yecu bene owaco botgi ni, “An bene pe abitito bot wun kit twero ma omiyo atiyo gin magi.

Carolok ikom awobe aryo

28Wutamo ango? Laco mo onongo yam tye ki awobene aryo. Oa ocito bot latin mukwongo, owace ni, ‘Latina, tin cit katic i poto olok.’ 29Latin meno ogamo ni, ‘Pe abicito’, ento lacen ongut ci ocito katic i poto olok. 30Laco meno dok oa ocito bot latine me aryo ci owace lok marom ki maca; ci wode odok iye ni, ‘Ladit, abicito’; ento pe omedo ki cito. 31Ikin awobe aryo nu anga ma otiyo gin ma onongo wone mito?” Gudoke iye ni, “Latin mukwongo.”

Yecu owaco botgi ni, “Adada awaco botwu ni, lujog mucoro ki mon ma malaya bikwongo donyo i ker pa Lubanga wi atii ki wun. 326 Pien Jon yam obino botwu kun lubu yo me kit ma atir, ento wun wukwero ye en woko; ento lujog mucoro ki mon ma malaya guye en. Dok bene kadi bed wuneno gin mutime, lacen pe wungut, dok pe wuye en.

Carolok ikom lugwok poto olok

(Mar 12:1-12; Luk 20:9-19)

33Kong dok wuwiny carolok mukene. Yam tye dano mo ma opito olok i potone, ci orumu woko ducu ki cel, ka okwinyo iye bur me biyo pige, ogero iye lubele, oweko bot lupur, ci ocito woko i lobo mukene. 34Ka kare me pwono nyig olok dong oromo, ci ocwalo lutice bot lupur ka kelo nyig oloke. 35Ento lupur gumako lutice, gugoyo ngat acel, ki ngat acel guneko woko, ki mukene gucelo woko ki got. 36En dok ocwalo lutic mukene mapol, ma gikato jo mukwongo ca, jonu bene kitimogi ki kit tim acel ma kitimo ikom lutic mukwongo ca. 37Lacen dong en ocwalo wode kikome botgi, kun waco ni, ‘Gibiworo woda.’ 38Ento ka lupur guneno wode, gucako lok keken gi ni, ‘Man aye dong lale lim; wubin waneke woko, wek lim aleyane ni obed mewa.’ 39Ci gumake gubole woko ki i poto olok, ka guneke woko. 40Pimeno ka won poto olok obino, bitimo lupur ningning?” 41Ci gugamo ni, “En bineko lupur maracuni woko ki kit nek marac atika, ci miyo poto olok woko bot lupur mukene ma gitwero miye nyig olok ka karene oromo.”

42Ci Yecu owaco botgi ni, “Yam pe wukwano lok ma kicoyo i ginacoya ni,

‘Got ma lugedo gukwero ni en aye odoko got mapire tek me gedo ot;

man Rwot aye ma otiyo,

obedo botwa lok me aura!’

43Pimeno awaco botwu ni, kibikwanyo ker pa Lubanga woko ki botwu, ci kimiyo bot rok ma binyako nyig mamite iye kikome.” 44[Dano ma bipoto ikom got man bitur ngide woko matinotino; ento ka got man opoto ikom dano mo, ci nyoto woko.]

45Ka ajwaki madito pa Lubanga ki Luparicayo guwinyo caroloke, ci guniang ni onongo kara Yecu tye kalok ikomgi. 46Gutemo make, ento gulworo lwak, pien lwak onongo ngeyo ni en lanebi.