Matayo 22

Carolok ikom karama me nyom

(Luk 14:15-24)

1Yecu dok oloko kwedgi i carolok kun waco ni, 2“Ker me polo kiporo ki rwot mo, ma oyubu karama me nyom pa wode. 3En ooro lutice me cito kalwongo jo mayam onongo kilwongogi i karama meno, ento gin gukwero bino woko. 4Dok ooro lutice mukene, kun waco botgi ni, ‘Wuwac bot jo ma onongo kilwongogi ni, Nen, dong ayubu cam ducu tye, twonina ki rocina ma moo dong kinekogi woko, dong kiyubu jami ducu tye; wubin ikarama me nyom’ 5Ento gin pe guketo cwinygi iye, gucito citogi, ngat acel ocito i potone, ngat mukene ocito i cato wile, 6jo mukene ma gudong gumako lutice, gutimogi ki kit tim ducu me lewic, ci gunekogi woko. 7Kiniga omako rwot, ocwalo mony ci guneko lunek gu woko, dok guwango taun gi madit woko bene. 8Rwot dok owaco bot lutice ni, ‘Karama dong kiyubu, ento jo ma onongo nene kilwongogi pe dong gimyero. 9Pimeno wucit i yoo madito, wulwong jo mapol ma wubinongo, wuwek gubin i karama me nyom.’ 10Lutic magi gucito i yoo gudo ci gucoko jo ducu ma gunongo; jo maracu kacel ki jo mabeco; ma omiyo ot me nyom opong woko nigwik ki wele. 11Ento ikare ma rwot odonyo i ot kaneno wele, ci oneno laco mo ma obedo kunu ma pe onongo oruku bongo me nyom. 12Cutcut otugi penye ni, ‘Larema, idonyo kany ningning ma kun pe iruku bongo me nyom?’ Laco meno oling alinga litik. 131 Man oweko rwot ociko lugwok wele ni, ‘Wutwe cinge wa ki tyen ne woko, ci wubole kwede woko i piny macol; kunu dano gibikok kun gikayo lakgi.’ 14Pien jo ma kilwongogi pol, ento ma kiyerogi nok.”

Culu mucoro bot Cecar

(Mar 12:13-17; Luk 20:20-26)

15Luparicayo gucito guporo lok kit macalo myero gimak kwede lok ma a ki idoge. 16Ci guoro bote lupwonyegi kacel ki jo pa Kerode, kun giwaco ni, “Lapwony, wan wangeyo ni in dano me ada, dok ipwonyo yo pa Lubanga ki ada, dok bene pe inwene ikom dano mo, pien in pe ineno kom dano ki woko. 17Tit botwa gin ma itamo. Cikwa ye ni kicul mucoro bot Cecar nyo pe?” 18Ento Yecu ongeyo rac cwiny ma gitye kwede, ci owaco botgi ni, “Wun wuomo cwinya pingo, wun lugoba? 19Kong wunyuta kom lim ma kiculu kwede mucoro ni.” Ci gukelo bote. 20Yecu openyogi ni, “Cal ki coc ma kicoyo ikome ni pa anga?” 21Gugamo ni, “Pa Cecar.” Ci owaco botgi ni, “Wumii jami pa Cecar bot Cecar, ki jami pa Lubanga wumii bot Lubanga.” 22Ikare ma guwinyo loke guuru matek; ci guweke gucito woko.

Peny ikom cer ki ikin jo ma oto

(Mar 12:18-27; Luk 20:27-40)

232

Inino meno bene Lucadukayo gubino bot Yecu, gin aye jo ma onongo giwaco ni jo ma oto pe gicer. Ci gupenye ki peny mo acel ni, 243 “Lapwony, Moses yam owaco ni, ‘Kace laco mo oto ma pe onywalo latin, ci omine myero olak dakone, wek onywal kwede lutino ma kaka omine.’ 25Yam onongo tye omego abiro ikinwa. Ngat mukwongo onyomo dako, ci oto woko ma pe obwoto latin mo, oweko dako bot omine. 26Dano me aryo ki me adeke bene ducu kitmeno, nio wa ikom dano me abirone. 27Lacen ki ingegi ducu, dako bene oto. 28Dong ikare me cer dakonu bibedo pa anga ikin co abironu? Pien gin ducu onongo gubedo kwede.”

29Ento Yecu odok iye ni, “Wun wurwenyo, pien pe wungeyo gin ma kicoyo i ginacoya, kadi wa teko pa Lubanga bene wukwiya. 30Pien ikare ma dano gibicer woko, dong pe gibinyome, ento gibibedo macalo lumalaika ma i polo. 31Ento ikom lok man me cer ki ikin jo ma oto ni, yam pe wukwano lok ma Lubanga oloko botwu ni, 324 ‘An Lubanga pa Abraim, ki Lubanga pa Icaka, ki Lubanga pa Yakobo’ En pe Lubanga pa jo ma oto, ento Lubanga pa jo makwo.” 33Ka lwak guwinyo, ci guuru pwonye matek.

Cik madit makato ducu

(Mar 12:28-34; Luk 10:25-28)

34Ikare ma Luparicayo guwinyo ni Yecu otwoyo dog Lucadukayo woko ki lok, ci gucoke kacel. 35Dano mo ikin gi onongo Lapwonycik, oteme kun penye ki peny acel, ni 36“Lapwony, Cik mene madit makato Cik ducu?” 375

Yecu odoke iye ni, “‘Mar Rwot Lubangani ki cwinyi ducu, ki kwo ni ducu, ki tami ducu.’ 38Man aye Cik madit dok mukwongo. 396 Ki me aryone marom kwede en ene ni, ‘Mar lawoti macalo imare keni.’ 40Ikom Cik magi aryo lok ducu matye i Cik ki i pwony pa lunebi gucung iye.”

Peny ikom lakwar Daudi

(Mar 12:35-37; Luk 20:41-44)

41Ikare ma Luparicayo dong gucoke kacel, Yecu openyogi kun waco ni, 42“Wutamo gin ango ikom Kricito ma Lubanga oyero? En lakwar anga?” Gudoke iye ni, “Lakwar Daudi.” 43Yecu dok openyogi ni, “Pingo kono Cwiny Maleng dok omiyo Daudi olwonge ni Rwot? Pien yam oloko ni, 447

‘Rwot owaco bot Rwoda ni:

bed itung bada ma lacuc, i kabedo me deyo,

nio ka abiketo lukwori piny ite tyeni.’

45Ka en Daudi aye yam olwonge ni Rwot, ci en dok bedo lakware ningning?” 46Dano mo pe ma otwero doke iye lok mo kadi ki acel, dok cake ikare meno ngat mo pe dok oete me penye ki kit peny mo.