Matayo 23

Yecu otucu pi can ma bipoto ikom Lupwonycik ki Luparicayo

(Mar 12:38-40; Luk 11:37-54; 20:45-47)

1Lacen Yecu owaco bot lwak ki bot lupwonyene ni, 2“Lupwonycik ki Luparicayo gibedo iwi kom pa Moses; 3pimeno lok ducu ma gin pwonyowu kwede, wutii dok wugwok bene, ento pe wutii gin ma gin tiyo, pien giloko aloka keken pe gitiyo gin ma gipwonyo. 4Gitweyo yec mapek ma yeyone tek, ci giketo iwi gwok dano; ento gin ki komgi pe gikonyo me tingo kadi ki nyig cinggi acel. 51 Gitiyo ticgi ducu ni wek dano onengi; pien gikwoyo coc madito ikom del aruka i turnyimgi, lok me Cik pa Lubanga, gimedo bene dog bongi gi bedo maboco adada, 6dok gimaro bedo i kabedo me deyo i karama, ki bedo iwi kom me dito i kacoke. 7Dok bene gimito ni dano omotgi wa i cuk gu, gimaro bene ni dano myero gulwong gi ni, ‘Lapwony.’ 8Ento wun pe myero gilwongwu ni, ‘Lapwony’, pien wutye ki Lapwony acel keken, pimeno wun ducu dong wudoko utmege. 9Dok bene pe wulwong dano mo ni wonwu iwi lobo, pien Wonwu tye acel, en aye ngat matye i polo. 10Pe bene gilwongwu ni lutel, pien wutye ki Latelwu acel, ma en aye Kricito ma Lubanga oyero. 112 Dano madit maloyo ki ikinwu aye bibedo laticwu. 123 Pien ngat ma ile malo kene i rwom mamalo, kibidwoke piny, ento ngat ma mwole kene kibimiye doko dit.

13Wubineno can, wun Lupwonycik ki Luparicayo, wun lugoba! Pien wuloro dogola me ker me polo woko bot dano; kun wun ki komwu pe wudonyo iye, dok bene wugengo jo ma mito donyo iye woko. 14Wubineno can wun Lupwonycik ki Luparicayo, wun lugoba! Pien wumayo odi pa mon to, dok wulego lega maboco me buta keken. Kibingolo kop madit makato ducu iwiwu.

15Wubineno can, wun Lupwonycik ki Luparicayo, wun lugoba! Pien wuwoto wulongo piny ki i dye nam kun wuwoto wa iwi tura gu wek wulok dano acel owek dinine odwog i mewuni, ento ka dong oloke, wumiyo doko latin me Geena marom aroma kwedwu tyen aryo.

16Wubineno can, wun lutel dano ma wangwu oto, ma wuwaco ni, ‘Kace dano mo okwongo kwong ki Ot pa Lubanga, lok mo bedo peke iye, ento ka ngat mo okwongo kwong ki jabu ma i Ot pa Lubanga, en myero ocob kwongeneni.’ 17Wun lutowang ma luming! Gin mene ma pire dit kato, jabu nyo Ot pa Lubanga mamiyo jabu odoko maleng? 18Dok wuwaco ni, ‘Kace dano mo okwongo kwong ki keno tyer, lok mo peke iye, ento kace ngat mo okwongo ki mot ma giketo iwi keno tyer, kwonge ni en myero ocobi woko gire.’ 19Wun lutowang! Gin mene madit makato, mot nyo keno tyer mamiyo mot doko maleng? 20Pimeno dano ma kwongo kwong ki keno tyer, kwongo bene ki jami ducu matye iwi keno tyer. 21Dano ma kwonge ki Ot pa Lubanga, nongo okwonge ki Ot pa Lubanga kadi wa ki Ngat ma bedo iye. 224 Dano ma kwonge ki polo, nongo kwonge ki komker pa Lubanga kadi wa ki Ngat ma bedo iwiye ni. 235

Wubineno can, wun Lupwonycik ki Luparicayo, wun lugoba! Pien wumiyo dul acel me apar me malakwang ki toki ki okwerwu, ento wutenyo lok ma pirgi tego me Cik woko, gin macalo ngolo kop atir, timo kica ki bedo jo matye ki niye. Magi ducu myero wutim, kun bene pe wuweko mukene ca. 24Wun lutowang, wukwanyo lwango ki i pii amatawu, ento wumwonyo kinaga woko kacel ki pii nu.

25Wubineno can, wun Lupwonycik ki Luparicayo, wun lugoba! Pien wulwoko nge kikopo ki cani ki woko wek obed leng, ento ki igi nongo gupong ki tim me yako dano ki miti mogo ma pe twero juke. 26Wun Luparicayo ma lutowang! Mukwongo myero kong wulwok i kikopo ki cani obed leng, ka wek ngeye bene obed leng. 276

Wubineno can, wun Lupwonycik ki Luparicayo, wun lugoba! Pien wurom ki lyel ma gipuyo ki gin matar, ma nongo ki tung woko nen maber, ento igi nongo opong ki cogo pa jo ma oto, ki jami ducu ma keni keken. 28Wun bene kitmeno, ki woko wunen bot dano ni wun jo ma kitwu atir, ento wun lutim bwolobwolo dok wupong ki gin maracu keken.

29Wubineno can, wun Lupwonycik ki Luparicayo, wun lugoba! Pien wucano got iwi lyel pa lunebi, ka dok wudeyo kom gin mayam kigero pi po pi jo ma kitgi atir. Wuyubu woko wek onen maber, 30kun wuwaco ni, ‘Ka nene onongo wabedo ikare pa kwarowa, kono onongo pe waribe kwedgi ka neko lunebi.’ 31Wun giwu wutucu kenwu ni wun likwayo pa jo mayam guneko lunebi ni. 32Ber, dong wucob tic pa kwariwu! 337 Wun twol, lutino ororo, wubibwot ningning ki ingolo kop me bolowu i Geena? 34Piman abioro botwu lunebi ki luryeko ki Lupwonycik, ma jo mogo ikin gi wun wubinekogi ci wugurugi woko ikom yatariya. Jo mogo wubigoyogi ki del i kacokewu, kun wuyelo gi taun ki taun. 358 Pimeno remo pa jo ducu ma kitgi atir ma kinekogi i lobo obed iwiwu, cake ki ikom remo pa Abel ma bale peke ni nio kwede ikom remo pa Jekaria wod pa Barakia, mayam wuneko ikin Kabedo Maleng ki keno tyer pa Lubanga. 36Adada awaco botwu ni, lok man ducu bipoto ikom jo ma gin yalwak me kare man.

Yecu okumu pi Jerucalem

(Luk 13:34-35)

37Jerucalem, Jerucalem, in ma ineko lunebi, ma icelo jo ma kioro boti woko ki got, tyen adi ma nene amito coko lutinoni woko macalo min gweno ma coko lutinone ite bwome, ento in pe iye giri! 389 Nen, dong gitenyo otti boti, iye odong nono. 3910 Atito boti ni pe ibinena nio ka ibiwaco ni, ‘Kipwo ngat ma bino inying Rwot!’”