Matayo 24

Yecu otito pi muku Ot pa Lubanga

(Mar 13:1-2; Luk 21:5-6)

1Yecu okato woko ki i Ot pa Lubanga. Ma dong tye kacito, lupwonyene gubino gunyute gedo me Ot pa Lubanga. 2Ento en odok iye botgi ni, “Wuneno gin magi ducu, pe kumeno? Adada awaco botwu ni, pe kibiweko got acel mo kany ma odode iwi wadi, ma pe kibicoro woko piny.”

Can ma bipoto i lobo

(Mar 13:3-13; Luk 21:7-19)

3Ikare ma Yecu obedo iwi got Jeituni, lupwonyene gubino bote i mung gucako penye ni, “Tit botwa, lok man bitime awene, dok kit gin ango ma binyutu dwogoni ki agiki piny?” 4Ci Yecu odok iye botgi ni, “Wugwoke, pe wuwek ngat mo obwolwu. 5Pien jo mapol gibibino inyinga, ma giwaco ni, ‘An aye Kricito ma Lubanga oyero’, ci gibibwolo jo mapol. 6Dok bene wubiwinyo pi mony, ki lok ma yweko pi mony; pe wuwek tipu komwu oto woko lirut. Jami magi omyero kong otime, ento nongo nino me agiki pud peke. 7Pien rok bilweny ki rok wadi, ki ker bene bilweny ki ker wadi, ki kec bene bipoto i lobo, ki oyengyeng biyengo lobo i kabedo mapol. 8Gin magi ducu gin aye acaki me can ma bipoto i lobo. 91

Ikare meno kibimakowu ci kibimiyowu i cing jo ma biketo can ikomwu ci gibinekowu woko. Jo me rok ducu bikwerowu pi nyinga. 10Ikare meno jo mapol bipoto, kibiketo lok roro ikin gi gidote keken gi, dok ki bibedo ki adagadaga ikin gi keken gi. 11Lunebi mapol ma lugoba bibino ma gibirwenyo jo mapol. 12Kit macalo tim maracu bibedo ka mede ameda ni, mar pa jo mapol bikwe woko. 132 Ento ngat ma biciro nio wa iagiki bilare. 14Dong lok man me Kwena Maber me ker pa Lubanga kibitito iwi lobo ducu wek obed caden bot rok ducu; ka dong lacen agiki piny bibino.”

Can madit ma lik

(Mar 13:14-23; Luk 21:20-24)

153

“Pimeno ka wubineno gin mo me kwer, malik, ma balo cwiny dano, mayam Daniel otito pire, kun ocung i Kabedo Maleng, (dano ma kwano myero oniang iye), 16ci jo matye i Judaya myero guring woko iwi godi. 174 Dano ma onongo tye iwi ot pe dok olor piny me bino ka kwanyo gin mo matye i ode. 18Dano matye i poto bene pe odok cen paco kaomo ginarukane. 19Bibedo rac adada bot mon ma giyac ki mon ma doto lutino! 20Wuleg wek ngwecwu pe otime i cwir nyo i ceng Cabit. 215 Pien ikare meno twon can madit atika bitime iye, mayam peya onen i lobo, nia wa iacaki lobo nio kwede wa onyo, dok pe bene binen. 22Kono nene Rwot pe ojwiko kare meno obedo manok mo, kono dano mo pe obwot; ento pi jo ma ki yero, miyo kibijwiko wel nino bedo manok.

23Ikare meno kace dano mo biwaco botwu ni, ‘Nen, Kricito ma Lubanga oyero tye kany’, nyo ni, ‘Nen, tye kuca’, pe wuye. 24Pien Kricito ma lugoba, kacel ki lunebigu ma lugoba gibibino, gibinyutu lanyut kitiyo jami me tango, wek girweny jo mapol ka gitwero, wek girweny wa ki jo ma Lubanga oyero bene. 25Nen, dong atyeko tito botwu con. 266

Kace kibiwaco botwu ni, ‘Nen, en tye i tim kuca’, pe wucit kunu, nyo ni, ‘Tye i kicika ot ma i iye’, pe wuye. 27Kit macalo lutkot a ki tung kunyango ci wil menyo piny wa tung kupotoceng, dwogo pa Wod pa dano bene bibedo kitmeno. 287 Kama kom dano ma oto tye iye, acut bene gicoke kunu.

Kit ma Wod pa dano bidwogo kwede

(Mar 13:24-27; Luk 21:25-28)

298

Cutcut inge can madit me kare meno bibedo kit macalo yam kicoyo ni.

‘Ceng bicido woko macol licuc,

ki dwe bene pe biryeny,

lakalatwe bia ki i polo gipoto piny,

ki twer ducu ma i polo bene biyenge.’ 309

Ka dong lanyut pa Wod pa dano binen i polo. Ci ikare meno kaka ducu ma iwi lobo bikumu, ci gibineno Wod pa dano kabino ki iwi pol me polo, ki twero madwong, ki deyo madit. 31En bioro lumalaika ki tum makok malongo, gibicoko jone ma en oyero ki itwok piny angwen ducu, nia ki i agiki polo tungcel nio kwede wa i agikine mukene.

Pwony ikom yat oduru

(Mar 13:28-31; Luk 21:29-33)

32Wupwonye ikom yat oduru; cutcut ka jange olot, ci pote luk, ci dong wungeyo ni oro dong cok. 10 33Ki wun bene kace wuneno gin magi ducu, ci wunge ni en dong tye cok, tye wa idogola. 34Adada awaco botwu ni, yalwak me kare man pe bitum, nio wang ma lok magi ducu otime. 35Polo ki lobo bitum, ento loka pe bitum.”

Ngat mo pe ma ngeyo nino kadi cawa meno

(Mar 13:32-37; Luk 17:26-30,34-36)

36Ento nino meno ki cawa meno, pe tye ngat mo ma ngeyo, kadi wa lumalaika ma i polo, kadi wa Wod, ento kono Lubanga Won keken aye ngeyo gire. 3711 Kit macalo ceng otime ikare pa Nua, bitime kitmeno bene ikare me dwogo pa Wod pa dano. 38Ikare ca ma peya pii aluka ocore iwi lobo onongo dano gicamo, gimato, dok awobe ki anyira ginyome, nio wa inino ma Nua odonyo kwede i yeya. 3912 Gin pe gumedo ki ngeyo gin mo nio ka pii aluka opong, ci omologi woko ducu. Bibedo kitmeno bene ikare ma Wod pa dano bidwogo iye. 40Ikare meno jo aryo bibedo i poto; kibikwanyo ngat acel, kibiweko ngat acel dong. 41Mon aryo bibedo ka rego kacel; kibikwanyo ngat acel, kibiweko ngat acel dong. 42Pimeno, wubed ma wangwu twolo, pien pe wungeyo nino ma Rwotwu bibino iye. 4313 Ento myero wunge man, ni, kace nene won ot ongeyo cawa mene i dyewor ma lakwo onongo obibino kwede, kono obedo ka kiyo piny, kono pe oweko gituru ode. 44Pimeno, wun bene wubed ma wuyube; pien Wod pa dano bibino i cawa ma nongo pe wutamo pire.

Latic ma lagen ki ma pe lagen

(Luk 12:41-48)

45“Anga ma lagwok ot ma lagen dok maryek, ma ladite biweko dano ducu ma bedo i ode ite loce, wek opok botgi camgi ikare mamite? 46Latic meno tye ki gum, ma ladite ka obino nongo en tye katiyo tice kitmeno. 47Adada awaco botwu ni ladit meno bimiye twero me loyo jamine woko ducu. 48Ento ka latic meno oloko kekene ni, ‘Ladita dong ogale kabino,’ 49ci ocako goyo lutic luwote, kun camo, mato dok mer kacel ki lumero, 50ladit pa latic meno bidwogo inino ma en pe tamo pi dwogone, dok i cawa ma en pe ngeyo. 51Ci ladite bipwode, ci kete kacel ki lugoba; kama dano gibibedo iye kakoko kun gikayo lakgi.”