Matayo 25

Carolok ikom anyira apar

1“Ikare meno ker me polo kibiporo ki anyira apar mayam gutero taragi, gucito ka jolo lanyom. 2Jo abic ikin gi onongo lumingming, ki jo abic onongo luryeko. 3Anyira ma gin lumingo ni gutero taragi labongo moo, 4ento jo ma luryeko ni gutero moo i cupa kacel ki i taragi. 5Ikare ma lanyom pud ogale, gin ducu nino omako wanggi, ci gunino woko. 6Ka dong oo i cwiny dyewor woo owinye madwong ni, ‘Nen, lanyom dong bino ca! Wukat woko kajole.’ 7Anyira ca ducu gua cut, ci guyubu taragi. 8Ento anyira ma gin lumingoni gulego anyira ma luryekoni, ni, ‘Wumii ki wan moowu ni mogo do, pien mac tarawa mito to woko.’ 9Ento anyira meno ma luryeko ni gudok iye botgi ni, ‘Nen calo moo ma watye kwede pe biromowa ki wun bene; myero wucit bot lucatwil, ci wuwil mewu.’ 10Ikare ma gucito ka wilo moo, cutcut lanyom obino; jo ma nene gitye ma guyube gudonyo kacel kwede i ot i karama me nyom, ci kiloro dogola woko. 11Lacen anyira ca ma gin lumingo ni gubino, kun gibako dogi ni, ‘Ladit, ladit, yab dogola botwa do!’ 12Ento en odok iye botgi ni, ‘Adada awaco botwu ni, an gira pe angeyowu.’ 13Pimeno wubed atera wuki piny, pien pe wungeyo nino kadi wa cawa.

Carolok ikom talanta apar

(Luk 19:11-27)

141

Pien bibedo rom ki dano ma cito kawot i lobo mukene, ma olwongo lutice, ci oweko jamine i cinggi ni gulo. 15Ci omiyo bot latic acel talanta abic, bot dano mukene omiyo talanta aryo, ki bot ngat mukene omiyo talanta acel. Omiyo bot dano acel acel dul lim kit macalo en romo tic kwede. Ci oa gire ocito i wote. 16Dano ma onongo talanta abic ni ocako tic kwede woko oyotoyot i cato wile; onongo magoba talanta abic bene. 17Ki ngat ma ogamo talanta aryo ni bene onongo magoba talanta aryo. 18Ento dano ma nene ogamo talanta acel ni ocito okwinyo bur i ngom, ci okano lim pa ladite woko iye. 19Ka dong kare okato malac, ladit pa lutic magi odwogo, ocako kwano lim kacel kwedgi. 20Dano ma nene ogamo talanta abic ni okwongo bino anyim, kun okelo talanta abic mukene, owaco ni, ‘Ladit, nene imiya talanta abic; nen dok anongo talanta abic mukene.’ 21Ladite owaco bote ni, ‘Itimo ber mada, in latic maber dok lagen. Onongo ibedo lagen ikom jami matidi mo, abiketi dong ibedo ki twero ikom jami mapol. Dony i yomcwiny pa laditi.’ 22Lacen ngat ma kimiye talanta aryo ni bene obino anyim, owaco ni, ‘Ladit, onongo nene imiya talanta aryo; nen dok anongo talanta aryo mukene.’ 23Ladite owaco bote ni, ‘Itimo ber mada, in latic maber dok lagen. Onongo ibedo lagen ikom jami matidi mo, abiketi dong ibedo ki twero ikom jami mapol. Dony i yomcwiny pa laditi.’ 24Ka dok ngat ma nene ogamo talanta aceli bene obino anyim, owaco ni, ‘Ladit, onongo angeyo ni in dano ma kiti tek, ikayo kama yam pe icoyo iye kodi, icoko bene kama pe iketo; 25oweko abedo ki lworo, acito akano limi woko piny i ngom. Ene, gam giri limi.’ 26Ento ladite odoke iye ni, ‘In latic marac dok bene in lawackom! Onongo ingeyo ni akayo kama pe acoyo iye kodi, dok bene acoko kama yam pe aketo iye? 27Gin ango mugengi tero lima bot jo maloyo benge, wek ikare ma abino agam lima kacel ki magobane? 28Pimeno wukwany talanta aceli woko ki bote, wumii bot ngat matye ki talanta aparni. 292 Pien dano acel acel matye ki gin mo, kibimiye doki makato, ci en bibedo ki jami mabup. Ento ngat ma peke ki gin mo, kadi wa gin ma en tye kwede kibikwanyo woko ki bote. 303 Wubol latic ma konye peke ni i colpiny matye woko, kama dano gibikok kun gikayo iye lakgi.’

Ngolo kop ikom rok ducu

314

Ikare ma Wod pa dano bidwogo ki deyo kacel ki lumalaikane ducu, ci en bibedo iwi komkere me deyo. 32Rok ducu bicoke kacel inyime, ci en bipoko kin gi woko patpat, kit macalo lakwat poko kwede romi ki ikom dyegi. 33Biketo romi itung cinge ma lacuc, ento dyegi en biketo itung cinge ma lacam. 34Ci Rwot biwaco bot jo matye tung cinge ma lacuc ni, ‘Wubin, wun jo ma Wora omiyowu gum, wule ker mayam kiyubu pirwu cake wa i acaki me lobo. 35Pien ma nene onongo kec oneka, wun wumiya cam, orwo oneka, wumiya pii amato, onongo awelo, wun wujola; 36ma nene onongo atye munero, wuruku bongo ikoma, ma koma obedo lit, wubino ka lima, dok ikare ma atye ibuc, wun wubino wulima.’ 37Ci jo ma kitgi atir bidok iye bote ni, ‘Rwot, yam waneni awene ka kec neki, ci wamii cam, nyo ka orwo neki, ci wamii pii imato? 38Yam waneni awene ka iwelo, ci wajoli; nyo ka itye munero, ci waruku bongo ikomi? 39Dok onongo waneni awene ka komi lit nyo ka itye ibuc, ci walimi?’ 40Rwot bidok iye botgi ni, ‘Adada awaco botwu ni gin ma wutimo bot dano acel ikin utmegina magi matino ni, meno wutimo bota.’ 41Lacen en dong biwaco bot jo matye tung cinge ma lacam ni, ‘Wun jo ma kiceno, wua woko ki inyima, wudony i mac ma pe to ma kiyubu pi Catan ki lumalaikane. 42Pien ma nene kec neka, wun pe wumiya cam, orwo pii oneka, pe bene wumiya pii me amata; 43yam awelo, ento pe wujola, onongo atye munero ci pe wuruku bongo ikoma, nene koma lit dok abedo ibuc, ento wun pe wubino ka lima.’ 44Gin bene gibidoke iye ni, ‘Rwot, waneni awene ka kec neki nyo ka orwo neki, nyo ka iwelo, nyo ka itye munero, nyo ka komi lit, nyo ka itye ibuc, ci pe wakonyi?’ 45En bidok iye botgi ni, ‘Adada awaco botwu ni, kit macalo pe wutimo bot dano mo acel ikin jo magi matino, pe wutimo bota.’ 465 Ci gibicito woko i can ma pe tum, ento jo ma kitgi atir bicito i kwo ma pe tum.”