Matayo 26

Ludito gupiro lok ikom Yecu

(Mar 14:1-2; Luk 22:1-2; Jon 11:45-53)

1Ikare ma Yecu dong otyeko loko lok magi ducu, owaco bot lupwonyene ni, 21 “Odong nino aryo ci bedo Karama me Kato,2 ci Wod pa dano kibimiye woko me agura ikom yatariya.”

3Ikare meno ajwaki madito pa Lubanga ki ludongo pa lwak gucoke i gangkal pa ajwaka madit pa Lubanga, ma nyinge Kayapa. 4Ci guporo lok kacel me mako Yecu ki ryeko ka dong gineke. 5Ento guwaco ni, “Pe obed inino madit, pien miyo lwak bituge.”

Kiwiro Yecu ki moo i Betania

(Mar 14:3-9; Jon 12:1-8)

6Ikare ma Yecu tye i Betania i ot pa Cimon ladobo, 73ci dako mo obino bote kun tye ki adomo moo ma ngwece kur, ma wele bene dit, ci oonyo iwiye ma onongo en obedo ka cam. 8Ento ma lupwonye guneno, cwinygi ocwer, guwaco ni, “Pingo moo man gibalo abala kit man? 9Pien moo man ka kono kicato acata, onongo kono okelo lim madit atika, ka wek gimi bot lucan.” 10Ento Yecu ongeyo lok man, ci owaco botgi ni, “Wuyelo dako ni pingo? En otiyo gin maber tutwal ikoma. 11Pien wun wutye kacel ki lucan kare ducu, ento pe wubibedo kweda kare ducu. 12Moo man ma dako ni oonyo ikoma ni en otimo man pi yubu koma me ayika. 134 Adada awaco botwu ni, iwi lobo ducu kama kibitito iye lok man me Kwena Maber ni, gin ma dako ni otiyo bene kibitito pire, wek obed me nipo pi en.”

Juda oye dobo Yecu

(Mar 14:10-11; Luk 22:3-6)

14Ikare meno Juda Lakeriot, ma en dano acel ma ikin jo apar wiye aryo ni, ocito bot ajwaki madito pa Lubanga, 15ci openyogi ni, “Wubimiya gin ango ka amiyo Yecu i cingwu?” Ci gucule ki lim ryal pyere adek. 16Cake i cawa meno cutcut Juda ocako yenyo kare maber ma en etwero miyo kwede Yecu i cinggi.

Yecu ocamo Karama me Kato ki lupwonyene

(Mar 14:12-21; Luk 22:7-14; 22:21-23; Jon 13:21-30)

17Inino mukwongo me nino madito me Mugati ma Tobi Peke Iye, lupwonye gubino bot Yecu, ci gupenye ni, “Imito waciyubi kabedo kwene wek icam iye Karama me Kato?”5

18Yecu ogamo ni, “Wucit i Jerucalem bot dano moni, ci wuwac bote ni, ‘Lapwony owaco ni, Kare na dong cok. Abicamo Karama me Kato i odi kacel ki lupwonyena.’” 19Lupwonye gucito gutiyo kit macalo Yecu ocikogi kwede, ci guyubu cam me Kato6 kunu.

20Ma piny dong oyutu, ci Yecu obedo piny kacel ki lupwonye apar wiye aryo. 21Ikare madong gitye kacam, Yecu owaco botgi ni, “Adada, awaco botwu ni, ngat acel ikinwu bidoba.”

22Ci lupwonye gucako kumu cut, kun gipenye ki acel acel ni, “An bo, Rwot?” 237 Yecu odok iye ni, “Dano matye ka gweyo dek i atabo acel kwedani aye bidoba. 24Wod pa dano tye kawot kit macalo yam kicoyo ikome ni; ento dano ma odobo Wod pa danoni bineno can marac! Kono nene obedo ber ka dano man pe kinywalo.” 25Juda ma en ngat ma odobe openye bene ni, “Lapwony, an mono?” Yecu odoke iye ni, “In iwaco giri kitmeno.”

Cam me otyeno pa Rwotwa

(Mar 14:22-26; Luk 22:15-20; 1 Kor 11:23-26)

26Ka gitye kacamo cam, Yecu omako mugati, ci olego gum ikome, ka ocako baro iye, omiyo bot lupwonye, kun waco ni, “Wugam, wucam; man aye koma.” 27Ka dok otingo kikopo, ka dong opwoyo Lubanga, ci omiyo botgi, kun waco ni, “Wun ducu wumat man; 28pien man aye remona me gicike, ma oo pi jo mapol pi weko bal. 29Atito botwu ni, cake tin, pe dok abimato pig olok, nio wa inino maca ka abimatone doki kacel kwedwu i ker pa Wora.” 30Ikare madong gutyeko wero wer, gua gucito iwi got Jeituni.

Yecu otito ni Petero bikwere woko

(Mar 14:27-31; Luk 22:31-34; Jon 13:36-38)

318

Yecu owaco botgi ni, “I dyewor ma tin ni, wun ducu wubitenya woko kena, pien yam kicoyo ni, ‘Abigoyo lakwat, ci romi gibiket woko ata.’ 329 Ento lacen ka dong acer woko abitelo nyimwu me cito i Galilaya.”

33Petero owaco bot Yecu ni, “Kadi bed jo mukene ducu gibitenyi woko, ento an pe abitenyi ata.”

34Yecu owaco bote ni, “Adada awaco ni, tin ki i dyewor, ma nongo twon gweno peya okok, ibikwera woko tyen adek.”

35Ento Petero dok ogamo ni, “Kadi bed mite ni myero ato kacel kwedi, pe abikweri.” Lupwonye mukene ni bene ducu guwaco kitmeno.

Yecu olego Lubanga i poto Gececemane

(Mar 14:32-42; Luk 22:39-46)

36Lacen Yecu ocito kwedgi i kabedo mo ma nyinge Gececemane, ci ociko lupwonyene ni, “Wun kong wubed kany, an kong acit kuca kalego Lubanga.” 37Okwanyo Petero ki awobe pa Jebedayo aryo me wot kwede. Cwinye ocako poto matek ki kumu bene madwong. 38Owaco botgi ni, “Atye ki arem cwiny matek ma mito neka woko. Wubed piny kany kacel kweda ma wangwu twolo.” 39Ocako cito anyim manok, ci ogungo oryebe piny olego ni, “Wora, kace i mito, kwany kikopo man woko ki ikoma; ento pe obed kit macalo an amito, ento wek gin ma in i mito aye myero otime.” 40Ka oa odwogo bot lupwonye onongo gunino woko, ci owaco bot Petero ni, “Pe itwero bedo ma wangi twolo pi cawa acel mo kacel kweda? 41Wubed ma wangwu twolo, wuleg Lubanga, wek pe wudony i abita mo; cwiny kikome mito, ento kom aye nyap.” 42Dok odok kalego Lubanga tyen me aryo kun lego ni, “Wora, ka kikopo man pe twero kato ma pe amato, wek gin ma i mito otime.” 43Dok odwogo onongo gunino woko, pien onongo nino dong omako wanggi tutwal. 44Ka dok owekogi ocito olego Lubanga tyen me adeke, kun nwoyo lego lega aceli. 45Ka oa odwogo bot lupwonye ci openyogi ni, “Wun pud wunino ce? Pud wutye kayweyo bo? Nen, cawa dong oromo, me miyo Wod pa dano i cing lubalo. 46Dong wua malo, wacitu; nen dano ma doba dong oo.”

Kimako Yecu

(Mar 14:43-50; Luk 22:47-53; Jon 18:2-11)

47Ikare ma Yecu pud tye kalok, Juda otugi bino; en yam ngat acel ikin jo apar wiye aryo ni. Obino ki lwak ma gua bot ajwaki madito pa Lubanga ki ludongo pa lwak, kun gitye ki pala lucwan ki odo gu. 48Juda ma odobe ni yam omiyo botgi lanyut. En owaco ni, “Dano ma abimoto kun anoto leme, meno aye en kikome; wutugi makone woko.” 49Cutcut obino bot Yecu atir, ocako mote ni, “Lapwony itye!” Ci onoto leme. 50Yecu owaco bot Juda ni, “Larema, ibino kany pingo?” Ci gubino gutugi poto ikome, gumake woko cut. 51Ento dano mo acel ikom jo ma onongo gin tye kacel ki Yecu owoto pala lucwane, otongo ki opii pa ajwaka madit pa Lubanga, onguno ite woko. 52Ci Yecu owaco ki dano meno ni, “Dwok pala lucwani kakare i akura; pien jo ducu ma mako pala lucwan, kibinekogi bene ki pala lucwan. 53Itamo ni pe atwero lego Wora wek ocwala lumalaika makato dul mony apar wiye aryo woko, i cawa man? 54Ci lok mayam kicoyo i ginacoya ni dong bicobbe kakare ningning, ni myero obed kitmeno?” 5510 Ikare meno Yecu owaco bot lwak ni, “Wubino bota ki pala lucwan ki odo gu me maka, macalo wubino ikom layak? Abedo ka pwony i Ot pa Lubanga jwijwi, ci pe yam wumaka do. 56Ento gin magi ducu dong otime, wek lok mayam kicoyo i buk pa lunebi ocobe kakare.” Cutcut lupwonye gubwote ci guringo woko.

Yecu ocung inyim jo me Otkot kapido

(Mar 14:53-65; Luk 22:54-55; 22:63-71; Jon 18:12-14; 18:19-24)

57Jo ma gumako Yecu gutere bot Kayapa ajwaka madit pa Lubanga, kama onongo Lupwonycik ki ludongo gucoke iye. 58Ento Petero obedo kalubu kor Yecu ki cencen, nio kwede wa idyekal pa ajwaka madit. En odonyo ci obedo kacel ki lukur piny kun kuru wek enen gin ma bitime.

59Ajwaki madito ki jo ma i Otkot ducu guyenyo lok me caden me goba ikom Yecu wek kineke woko. 60Ento pe gumedo ki nongo lok mo, kadi bed lucaden ma lugoba mapol gukelo lok goba. Me agikine jo aryo gubino, 6111 guwaco ni, “Dano man owaco ni, ‘Atwero keto Ot pa Lubanga, ka dok agero dok kakare inino adek.’”

62Cutcut ajwaka madit pa Lubanga oa malo ci owaco ni, “Pe idok iye lok mo? Kit lok ango ma joni gudoti kwede ni?” 63Ento Yecu oling woko alinga. Ajwaka madit pa Lubanga dok owaco ni, “Amito ikwong kwong ki nying Lubanga makwo, tit botwa kace in aye i Kricito ma Lubanga oyero, Wod pa Lubanga.” 6412

Yecu odoke iye ni, “In iwaco giri kitmeno; ento awaco botwu ni, cake kombedi wubineno Wod pa dano ka obedo piny i kabedo me deyo ka nget Won Twer tung lacuc, kun bino ki pol me polo.” 6513

Ci ajwaka madit pa Lubanga oyeco ginarukane woko kekene, kun waco ni, “Oyeto Lubanga; pud dok wumito caden me ngo? Kombedi dong wuwinyo kit ma en oyeto kwede Lubanga. 66Wutamo iye lok ango?” Gudoke iye ni, “Bale rome to.” 6714

Cutcut gungulu laa i wange, ka gudonge. Jo mogo gudonge kun giwaco ni, 68“In lanebi ni! In Kricito ma Lubanga oyero ni, tuci! Anga mugoyi?”

Petero okwero Yecu

(Mar 14:66-72; Luk 22:56-62; Jon 18:15-18; 18:25-27)

69Petero onongo tye woko, obedo piny idyekal. Ci angeca mo obino bote, owaco ni, “In bene onongo itye kacel ki Yecu Lagalilaya.”

70Ento Petero okwero woko inyim dano ducu, kun waco ni, “An pe aniang gin ma itye kaloko ni.” 71Ka Petero okato woko i dog gang, angeca mukene dok onene, ci owaco bot jo ma onongo gucung kunu ni, “Dano man bene onongo tye kacel ki Yecu me Najaret.”

72Petero dok okwero woko kun kwonge akwonga ni, “An gira pe angeyo dano man.” 73Ka kare okato manoknok, jo ma onongo gucung kenyo gubino guwaco bot Petero ni, “Adada, in ingat acel ikin gi, pien kit ma iloko kwede nyuti woko.” 74Petero ocako kwonge kun lame kekene ni, “Pe angeyo dano man.” Cutcut twon gweno otugi kok. 75Ci Petero ocako po lok ma onongo Yecu owaco ni, “Ma nongo twon gweno peya okok, nongo in dong ikwera woko tyen adek kulu.” Ci okato woko okok ki cwercwiny madwong.