Matayo 27

Yecu ocung inyim Pilato

(Mar 15:1; Luk 23:1-2; Jon 18:28-32)

1Ka piny dong oru, ajwaki madito pa Lubanga ki ludongo pa lwak guporo lok ikom Yecu kit ma myero gineke kwede. 2Ci gutweye gutere gumiye bot Pilato ma onongo laloc ikare meno.

To pa Juda

(Tic 1:18-19)

31

Ka Juda, ngat mayam odobe ni, oneno ni dong kingolo kop oloyo Yecu, ongut ci odwoko lim ryal pyere adek ca bot ajwaki madito pa Lubanga ki ludongo. 4Ci owaco botgi ni, “Abalo pi dobo dano ma peke ki bal.” Gudoke iye ni, “Meno obedo lokwa bo? Meno loki giri.” 5Juda obolo lim piny i ngom i Ot pa Lubanga, ci ocito odene woko. 6Ento ajwaki madito gukwanyo lim meno kun giwaco ni, “Cik pe ye ni myero kiket lim man i kica lim me Ot pa Lubanga, pien ki wilo ki remo.” 7Ci guporo lok kacel, guwilo lim meno woko ki poto pa lacwe agulu, odoko ka yiko lurok. 8Pimeno omiyo kilwongo poto meno ni poto me remo nio wa onyo. 92 Ma omiyo lok mayam lanebi Jeremia oloko ocobe kakare ni, “Yam gutero lim ryal pyere adek, en wel ma jo mogo ikin jo Icrael gungolo, 10ci kimiyo pi poto pa lacwe agulu kit macalo Rwot ociko kwede.”

Yecu inyim Pilato

(Mar 15:2-5; Luk 23:3-5; Jon 18:33-38)

11Yecu ocung inyim laloc ci laloc openye ni, “In i Rwot pa Lujudaya bo?” Yecu ogamo ni, “In iwaco gire kitmeno.” 12Ento ikare ma ajwaki madito pa Lubanga ki ludongo gudote, en pe ogamo iye gin mo. 13Pilato openye ni, “Pe iwinyo kit lwak adot mapol ma gidoti kwede ni?” 14Ento Yecu pe odok iye lok mo kadi ki acel ilok ducu ma kikelo ikome; man omiyo laloc ouru tutwal.

Kingolo to iwi Yecu

(Mar 15:6-15; Luk 23:13-25; Jon 18:39—19:16)

15Inino madito me Karama me Kato3 onongo yam Pilato gonyo iye lamabuc acel ma lwak mito. 16Ikare meno onongo gitye ki lamabuc mo ma ngene ma nyinge Baraba. 17Ma dong lwak gucoke kacel, Pilato openyogi ni, “Wumito ni agony botwu anga, Baraba nyo Yecu ma kilwongo Kricito?” 18Pien Pilato onongo ongeyo woko ni gumiyo Yecu bote pi nyeko.

19Dok bene ikare madong Pilato obedo iwi kom me ngolo kop, dakone ocwalo kwena bote ni, “Pe i tim gin mo ikom dano man ma kite atir ni, pien lek tin oyela mada pire.”

20Ento ajwaki madito pa Lubanga ki ludongo gubito lwak ni myero gupeny pi Baraba, guwek kinek Yecu woko. 21Laloc me lobo dok openyogi ni, “Ikin jo aryo ni wumito agony botwu anga?” Lwak gudoke iye ni, “Baraba.” 22Pilato dok openyogi ni, “Ci Yecu ma kilwongo Kricito ni dong abitimo ningning?” Gin ducu gudoke iye ni, “Wek kigure ikom yatariya.” 23Pilato dok openyogi ni, “Pingo kaa, otimo kit gin ango marac?” Ento lwak gumede ki woo ni, “Wek kigure woko ikom yatariya.” 244 Ma Pilato oneno ni lok man dong pe twere, pien woo onongo tye ka mede ameda, ci okwanyo pii, olwoko ki cinge inyim lwak kun waco ni, “Bal me remo pa dano man gire pe ikoma, lokwu giwu.” 25Dano ducu gugamo ni, “Remone obed iwiwa ki iwi lutinowa!” 26Ci ogonyo botgi Baraba; ka lacen madong otyeko goyo Yecu ki del omiye woko ni kigure ikom yatariya.

Acikari gungalo Yecu

(Mar 15:16-20; Jon 19:2-3)

27Acikari pa laloc gutero Yecu wa idye kal pa laloc lobo, ci gucoko buca monygi ducu inyime. 28Gulunyo bongine woko ki ikome, ka dong guruke ki bongo makwar. 29Gucweyo lalukana okutu, gurwako iwiye, ci guketo odo lagada i cinge ma lacuc. Gurumu cong gi piny inyime, gucako ngale kun giwaco ni, “Itye ba, Rwot pa Lujudaya!” 30Gungulu laa ikome, gukwanyo odo lagada ci gugoyo ki wiye. 31Ka dong gutyeko ngale, ci gulunyo bongo makwar woko ki ikome, ka dok guruke ki bongine kikome, ci gutere kwede woko ka gure ikom yatariya.

Kiguro Yecu ikom yatariya

(Mar 15:21-32; Luk 23:26-43; Jon 19:17-27)

32Ikare ma gitye kakato woko, gurwate ki dano mo me Cirene ma nyinge Cimon, ci gudiye tektek me tingo yatariya pa Yecu. 33Ikare ma guo i kabedo ma kilwongo ni Golgota, ma teloke ni kabedo me cogo wic, 34gumiye kongo bwino ma kirubu ki keda ni omati, ento ikare ma en obilo, ci pe oye matone. 355 Madong gugure ikom yatariya, ci gupoko bongine woko ikin gi kun gibolo iye kwir. 36Ka lacen dong gubedo piny kunu ka kiye. 37Lok me adot ma kidote kwede ni kiguro malo ka wiye, kun kicoyo ni, “Man aye Yecu Rwot pa Lujudaya.” 38Kigure kacel ki luyak mogo aryo, dano acel tung lacuc ki acel tung lacam. 396 Jo ma gimol gikato ki ka ngete gubedo ka yete, kun giyengo wigi, 407 ma giwaco ni, “Nye, in ma imuku Ot pa Lubanga woko, ci igero pi nino adek ni, dong ilare keni ba! Kace in i Wod pa Lubanga, lor woko piny ki ikom yatariya.”

41Ki ajwaki madito pa Lubanga ki Lupwonycik ki ludongo bene gungale kitmeno kun giwaco ni, 42“En laro jo mukene, pe twero lare kene. Ka en Rwot pa jo Icrael; wek olor piny ki ikom yatariya, ci wabiye en. 438 En geno Lubanga, wek Lubanga kong olare kombedi, ka mite; pien yam owaco ni, ‘An a Wod pa Lubanga.’” 44Ki luyak bene ma onongo kigurogi kacel kwede gucaye ikit acelu.

Yecu oto

(Mar 15:33-41; Luk 23:44-49; Jon 19:28-30)

45Cake i cawa abicel, piny ocido woko macol i lobo ducu, nio wa i cawa abongwen. 469 I kine me cawa abongwen Yecu odange ki dwon malongo ni, “Eloi, Eloi, lama cabaktani?” ma teloke ni, “Lubangana, Lubangana, itenya woko pingo?” 47Ka jo ma onongo gucung kunu guwinyo loke, ci guwaco ni, “Laco man tye kalwongo Eliya.” 4810 Cutcut dano acel ikin gi oringo okwanyo amor, ci olutu i kongo bwino mawac, orwako iwi tal lagada, ka omiyo bot Yecu ni omati. 49Ento jo mukene guwaco ni, “Kong wukur, wek mono wanen ka Eliya bino ka lare.” 50Yecu dok odange ki dwon malongo, ka dong cwinye otum. 5111

Ci nen, bongo kicika ma i Ot pa Lubanga oyec opoke woko i dul aryo, cake ki malo, nio kwede wa i tere piny. Piny oyenge, pata gubar woko; 52ki lyel bene doggi oyabe woko, ci kom jo maleng mapol mayam guto gucer woko. 53Gukati woko ki i lyelgi ikare ma Yecu dong ocer, gucito i Jerucalem gunyute bot jo mapol.

54Ladit maloyo acikari kacel ki jo ma onongo gitye kwede, ma gubedo ka kiyo Yecu, ka guneno kit ma piny oyenge kwede ki gin madong otyeko time, gubedo ki lworo madit mada, ci guwaco ni, “Adada, man onongo Wod pa Lubanga!” 5512

Dok bene onongo nene tye mon mapol kunu ma gucung ki cen ka nenone, ma gulubu kor Yecu cake ki i Galilaya, ma gubedo ka konye bene. 56Ikin mon magi onongo tye iye Maliam Lamagdala ki Maliam min Yakobo ki Yucepu, ki min awobe pa Jebedayo.

Kiyiko kom Yecu i lyel

(Mar 15:42-47; Luk 23:50-56; Jon 19:38-42)

57Ki i otyeno me nino meno, dano mo ma lalonyo me Arimataya ma nyinge Yucepu obino; en kikome bene onongo yam obedo lapwonye pa Yecu. 58Ocito bot Pilato ci olego kom Yecu. Ci Pilato ociko ni kimiye. 59Yucepu okwanyo kom Yecu, ci oboyo woko ki bongo matar maryeny ni dangdang, 60ka opyelo i lyel ma mege kikome manyen, mayam onongo okwinyo oroko i got; ci ongilo got madit oloro ki dog lyel, ka dong oa ocito gire. 61Maliam Lamagdala ki Maliam mukene ni bene onongo gitye kunu gubedo piny gukeme ki lyel.

Lukur piny ma gurumu lyel

62Orwone, ma en aye nino malubu nino me Yube, ajwaki madito pa Lubanga ki Luparicayo gucoke inyim Pilato, 6313 guwaco bote ni, “Ladit, wapo kit ma dano man ma lagoba ni oloko kwede, ikare ma pud en kwo. En owaco ni, ‘I nge nino adek abicer woko doki.’ 64Pimeno cik kigwok lyel maber adada nio wa inino me adeke, wek lupwonyene pe gucit gukwal kome woko, kun giwaco bot lwak ni, ‘En dong ocer woko ki ikin jo ma oto’, man bimiyo bwola man bedo rac makato mukwongo ca.”

65Pilato owaco botgi ni, “Wutye ki acikari ma gin lukur piny; wucit, wugwok maber mada kit macalo wutwero.”

66Ci gucito guloro dog lyel woko maber kun kimwono lanen iye ikom got, ka guketo lukur piny me gwokone.