Matayo 18

Anga maloyo ki dit

(Mar 9:33-37; Luk 9:46-48)

11

Ikare meno lupwonye gubino bot Yecu, gupenye ni, “Anga mono ma rwome dit iker me polo?” 2Ci Yecu olwongo latin mo bote, ocibo ocung ikin gi, 32 ka owaco botgi ni, “Adada awaco botwu ni, ka pe wuloke wudoko macalo lutino, pe wubidonyo iker me polo wa ki acel. 4Ngat ma inen mwole woko kekene calo latin man, en aye maloyo ki dit iker me polo. 5Ngat ma inen jolo latin mo acel macalo man inyinga, nongo ojolo an.

Gin mamiyo dano poto ibal

(Mar 9:42-48; Luk 17:1-2)

6Ento dano mamiyo ngat acel ma ikin jo magi matino ma guye an ni poto ibal, onongo bedo ber makato ducu ka kitweyo kidi rego madit ingute ci kibole kwede woko wa i nam matut.

7Lobo bineno can pi ariya mamiyo dano poto ibal. Pien gin mamiyo dano poto ibal pe bigenge, ento dano makelo gin mamiyo dano poto ibal bineno can! 8Kace cingi nyo tyeni aye miyo i poto ibal, ci tong ingune ibol woko; twara ma idonyo i kwo ma cingi lakucel peke nyo laput, ber makato ma ibedo ki cingi aryo nyo tyeni ducu ci giboli kwede woko imac ma pe to. 9Kace wangi aye miyo i poto ibal, ci kol woko; twara ma idonyo i kwo ki wangi lakucel, kato ma kono giboli ki wangi aryo ducu imac Geena.

Carolok ikom romo ma orwenyo

(Luk 15:3-7)

10Myero wunen maber ni pe wucayo ngat mo acel ki ikin jo magi matino ni; pien awaco ki wun ni, ki i polo lumalaikagi tye inyim Wora matye ipolo kare ducu. 11[Pien Wod pa dano obino ka laro jo murwenyo.]

12Wutamo gin ango? Kace dano mo tye ki romine miya acel, ka acel ki ikin gi orwenyo woko, pe biweko romi pyere abongwen wiye abongwen ni iwi got kunu, ci cito kayenyo en ma orwenyo ni? 13Ka ononge, adada awaco botwu ni, cwinye bibedo yom pire makato pi romi pyere abongwen wiye abongwen ma pe onongo gurwenyo ni. 14Kitmeno Wora matye i polo bene pe mito ni ngat mo acel ikin jo magi matino ni myero orweny.

Omeru ka obalo

(Luk 17:3)

15Kace lawoti obalo bal mo boti, cit bote inyute bale, ikin in ki en keken. Ka owinyo loki, ci dong inongo lawoti. 16Ento ka pe owinyo loki, kwany dano acel nyo aryo mukene wucit kwedgi, wek lok ma caden aryo nyo adek giloko omok lok ducu. 17Kace okwero winyo lokgi, tit pire bot lwak jo muye an; kace okwero winyo wa lok pa jo muye an, ci wek en dong obed boti calo ngat ma pe ngeyo Lubanga ki lajog mucoro.

Tweyo ki gonyo

183

Adada awaco botwu ni, kit gin mo ducu ma wutweyo iwi lobo man kibitweyo kadi wa i polo, dok gin mo ducu ma wubigonyo iwi lobo man kibigonyo bene wa i polo. 19Dok bene awaco botwu ni, ka jo aryo ikinwu biye kacel lok ikom gin ma gilego, ci Wora matye ipolo bitimo pirgi. 20Pien kama jo aryo nyo adek gucoke kacel inyinga, an bene nongo atye kunu ikin gi.”

Carolok ikom latic ma pe lakica

214

Petero oa obino bot Yecu ci openye ni, “Rwot lawota mono myero otim bal bota tyen adi, ka dok atim kica bote? Pud dok abitimo bote kica ka obalo tyen abiro?” 22Yecu owaco ni, “Pe awaco ni maromo tyen abiro, ento maromo tyen pyere abiro tyen abiro.

23Pimeno ker me polo gitwero poro ki rwot mo ma onongo yam omito yubo lok me banya ki lutice. 24Ikare madong ocako kwano wel, ci kikelo ngat mo acel ma onongo tye ki banyane maromo milion mapol ata. 25Kit macalo onongo dong pe twero culu banya meno, ci ladite ociko ni myero kicate woko i opii, en kacel ki dakone ki lutinone, ki kit jami ducu ma onongo en tye kwede, wek kicul ki banya meno. 26Cutcut latic meno orumu conge piny inyime, kun bako doge bote ni, ‘Ladit, kong idi cwinyi ikoma do, ci abiculi gin ducu.’ 27Ci kica omako ladit ikom latice meno, ogonye woko dok oweko banyane bene ducu. 28Ento latic meno ikare ma okato woko, orwate ki latic acel ikin lutic luwote ma onongo tye ki banyane me ciling mo manok adada, ci omake ki ngute kun peye ma waco ni, ‘Cul banyana!’ 29Ento latic lawote ni oryebe piny kun bako doge bote ni, ‘Kong idi cwinyi ikoma, abiculu banyani.’ 30Ento en okwero woko, ocito otweye i buc nio ka en biculu banyane. 31Ikare ma lutic wadigi guneno gin ma otime ni, ci cwinygi ocwer matek tutwal, gucito gutito gin ducu ma otime bot laditgi. 32Cutcut ladit olwonge ci owaco ni, ‘In latic marac! Aweki banya ca woko ducu pien onongo ilega kun ibako dogi bota; 33onongo in bene pe kica twero maki ikom latic lawoti ni, kit macalo onongo kica omaka ikomi ni?’ 34Kiniga omako ladit tutwal oweko omiye bot acikari ma gin gwoko mabuc, nio ka oculu banyane ducu. 35Wora matye ipolo bene bitimowu kitmeno, kace pe wutimo kica bot dano ki icwinywu ducu, dano acel acel ki lawote.”