Matayo 4

Catan obito Yecu

(Mar 1:12-13; Luk 4:1-13)

11

Cutcut Cwiny Maleng otero Yecu wa i tim wek Catan obite. 2Ka Yecu obedo i nirii kec nino pyere angwen dyeceng ki dyewor, ci lacen kec ocako neke. 3Labit dano obino ci owace ni, “Ka in i Wod pa Lubanga, wac ki gweng man oloke odok kwon.” 42 Ento Yecu odok iye ni, “Yam kicoyo ni,

‘Dano pe bibedo kwo ki kwon keken,

ento bedo kwo ki lok ducu ma a ki i dog Lubanga.’”

5Catan dok otere i taun madit maleng, ci ocibe ocung iwi labila Ot pa Lubanga, 63 ci owace ni, “Ka in i Wod pa Lubanga, kong i a ki malo kany ipot piny pien yam bene kicoyo ni,

‘En biciko lumalaikane piri,’

dok bene ni,

‘Gin bijoli ki cinggi,

wek pe iyok tyeni ikom got.’” 74

Yecu dok ogamo doge owaci, “Yam bene kicoyo ni, ‘Pe item i Rwot Lubangani.’” 8Catan dok otere malo iwi got mabor adada, ci onyute ker ducu ma iwi lobo ki deyogi ducu. 9Ci owace ni, “Magi ducu abimiyo boti, ka igungu piny iwora.” 105 Ci Yecu owace ni, “Nyik icit cen, Catan, pien yam kicoyo ni,

‘Wor Rwot Lubangani,

dok bene iti pire keken.’”

11Cutcut Catan oweke, ci lumalaika gubino gukonye.

Yecu ocako tice i Galilaya

(Mar 1:14-15; Luk 4:14-15)

126

Cutcut ka Yecu owinyo ni kimako Jon kitweyo woko i buc, oa obino i Galilaya. 137 En pe dong obedo i Najaret, ento ocito obedo i Kapernaum matye i dog nam, i lobo Jabulon ki Naputali, 14wek lok mayam lanebi Icaya oloko ocobe kakare ni: 158

“Lobo Jabulon ki lobo Naputali,

tung nam, loka Jordan,

Galilaya pa Lurok.

16Jo mayam gibedo i piny macol dong guneno dero ceng madit,

jo mayam gibedo i lobo ki i tipu me to,

ceng dong otuc woko omenyogi.”

17Cake ikare meno Yecu ocako tito lok kun waco ni, “Wunguti, pien ker me polo dong onyiko cok.”

Yecu olwongo lucik rec angwen

(Mar 1:16-20; Luk 5:1-11)

18Ikare ma Yecu obedo kawot kun rabo dog nam Galilaya, ci oneno omego aryo, Cimon ma kilwongo Petero ki omine Anderiya, ka gitye kabolo obwo recgi i nam; pien onongo gin lumak rec. 19Ci olwongogi ni, “Wubin wulub kora, ci an abimiyo wudoko lumak dano.” 20Ci cutcut gutugi weko obwogi, gulubu kore. 21Ka dok owoto anyim manok, ci oneno omego mukene aryo, Yakobo ki omine Jon, gin awobe pa Jebedayo, ma onongo gitye i yeya kacel ki won gi Jebedayo ka tudu wang obwo recgi ma oyec, ci olwongogi. 22Cutcut gutugi weko yeya ki won gi Jebedayo, ci gulubu kore.

Yecu opwonyo dok ocango dano

(Luk 6:17-19)

239

Yecu owoto orumu lobo Galilaya ducu, kun pwonyo i kacokegi, dok bene onongo tito lok me Kwena Maber me ker pa Lubanga. Ocango bene kit two ducu ki kit goro ducu ki ikin dano. 24Ma omiyo nyinge oywek i lobo Ciria ducu. Dano gukelo jo ducu ma komgi lit bote, jo ma gitwo kit two mapatpat ki jo ma arem obwoyogi, jo matye ki cen, jo ma twoyo two alili ki jo ma twoyo two akweya, ci en ocangogi. 25Lwak dano mapol ata ma gua ki i Galilaya, Dekapoli, Jerucalem, Judaya ki loka Jordan ducu gulube.