Matayo 5

Lok ma Yecu otito iwi got

1Yecu ka oneno lwak, ci oito malo iwi got, ka dong obedo piny, ci lupwonyene gucito bote. 2Ocako pwonyogi kun waco botgi kit man ni:

Gum me ada

(Luk 6:20-23)

3“Gitye ki gum jo ma gingeyo ni gin lucan ilok me cwiny, pien ker me polo meggi.”

4“Gitye ki gum jo ma cwinygi cwer, pien kibikweyo cwinygi. 51

Gitye ki gum jo ma mwol, pien gibileyo lobo doko meggi.

6Gitye ki gum jo ma kec ki orwo pii nekogi pi bedo jo ma kitgi atir, pien kibimiyo giyeng.

7Gitye ki gum jo ma lukica, pien gin bene kibitimo kica botgi. 82

Gitye ki gum jo ma cwinygi leng, pien gin aye gibineno Lubanga.

9Gitye ki gum jo makelo kuc, pien gin aye kibilwongogi ni lutino pa Lubanga.

10Gitye ki gum jo ma kiketo ayelayela ikomgi pi bedo jo ma kitgi atir, pien ker me polo meggi. 113

Wutye ki gum ka dano ngalowu, kun giyelowu ma giwaco kit lok ducu maracu gobagoba ikomwu pira. 124 Wupwo, cwinywu obed yom atika, pien mot ma kibimiyowu me pwoc dit, tye i polo, pien lunebi mayam gukwongo nyimwu dano guketo ayelayela ikomgi kitmeno.

Lok ikom kado ki dero

(Mar 9:50; Luk 14:34-35)

135

Wun wukado me lobo; ento kado atwona6 ka dong odoko bot, ci kibitimo ningning wek dok odok mit? Konye dong nongo peke, myero kiony woko dano onyon. 147

Wun dero me lobo. Taun madit ma kigero iwi got pe twero kane. 158 Dok pe kicwinyo tara me auma ki aduku, ento kicibo iwi lacib tara, ci lyel caro piny bot jo ducu matye i ot. 169 Wun bene wubed jo ma menyo piny calo tara bot dano, wek gunen tic mabeco ma wutiyo ci gumi deyo bot Wonwu matye i polo.”

Lok ma Yecu opwonyo ikom Cik

17“Pe wutam ni an abino kajwayo Cik pa Moses ki lok pa lunebi woko; pe abino ka gengo dano lubugi, ento me cobogi acoba. 1810 Adada awaco botwu ni, nio wang ma polo ki lobo bitum woko, latin ton mo acel, kadi ki nukuta mo acel me Cik pe birwenyo, nio kalok ducu ocobe kakare. 19Pimeno, dano mo ma bimiyo Cik mo acel ki ikom Cik magi doko yogoyogo, kun pwonyo ki dano kitmeno, kibilwongo ni en dano matidi i ker me polo; ento ngat ma gwoko Cik magi, kun pwonyo ki dano, kibilwonge ni en dano madit i ker me polo. 20Pien awaciwu ni, ka pe kitwu obedo atir makato kit pa Lupwonycik ki pa Luparicayo, ci pe wubidonyo i ker me polo.”

Lok ma Yecu opwonyo ikom kiniga

(Luk 12:57-59)

2111

“Dong wuwinyo lok mayam kiwaco bot jo macon ni, ‘Pe ineki; ngat ma oneko dano kibingolo kop ikome.’ 22Ento an awaco botwu ni ngat mo ka kiniga omako ikom omine kibingolo kop ikome; dano ma yeto omine kibitero i kot, ki ngat ma biwaco ni, ‘In laming’ kibibolo woko i mac me Geena. 23Pimeno, ka ikelo moti bot Lubanga, ma itye ka tyerone inyim keno tyer, kace ipo ni omeru onongo tye ki lok mo ikomi, 24ci myero iwek moti kunu inyim keno tyer, ci idok cen; mukwongo kong wumer wuribe ki omeru, ka lacen dong idwogi ityer moti. 25Mak larem woko oyotoyot ki ngat mudoti, ikare ma pud wutye kawot kwede i yoo me cito i kot, wek dano mudoti ni pe oteri inyim langolkop, ci langolkop bimiyi bot lakurpiny, ci teri tweyi woko i buc. 26Adada awaci ni, pe ibikati woko ki kunu, nio ka iculu cul ducu, ma wi cente mo pe orem.

Lok ma Yecu opwonyo ikom timo abor

2712

Dong wuwinyo ka yam kiwaco ni, ‘Pe i tim abor.’ 28Ento an awaco botwu ni, dano mo ma oneno dako mo ce oparo ni ebed kwede, meno nongo dong otimo abor woko kwede ki i cwinye. 2913 Kace wangi tung lacuc aye mamiyo i poto ibal, kole ci ibol woko kamabor; pien bedo ber ka dul komi mo acel orwenyo, kato ma kono kibolo komi kulu woko i Geena. 3014 Kace cingi ma lacuc aye mamiyo i poto ibal, tonge ingune ibol woko; pien bedo ber ka dul komi mo acel orwenyo, kato ma kono gibolo komi woko kulu i Geena.

Lok ma Yecu opwonyo ikom keto nyom

(Mat 19:9; Mar 10:11-12; Luk 16:18)

3115

Yam kiwaco ni, ‘Dano mo ma ryemo dakone, myero omiye waraga me keto nyom.’ 3216 Ento an awaco botwu ni, laco mo ma oryemo dakone, kono pi lok me tim me tarwang keken, nongo dong omiyo dakonu odoko latim abor; dok dano ma onyomo dako ma cware oryemo nongo otimo abor.

Lok ma Yecu opwonyo ikom kwongo kwong

3317

Dok bene yam wuwinyo lok ma onongo kiwaco bot jo macon ni, ‘Pe ikwong kwong goba, ento cob kwongi ducu bot Rwot.’ 3418 Ento an awaco botwu ni: pe myero wukwong kwong mo kadi ki acel, kadi ki nying polo, pien meno komker pa Lubanga, 3519 nyo ki nying lobo, pien meno kom me teno tyene, nyo kadi ki nying Jerucalem, pien meno taun madit pa Rwot madit. 36Dok bene pe ikwong kwong ki wii, pien in pe itwero loko yer wii mo acel doko matar nyo macol. 37Ento wuwek lokwu obed ni ‘Eyo’ nyo ‘Pe’; gin mukene makato lok man nongo oa ki bot Larac.

Lok ma Yecu opwonyo ikom culu kwor

(Luk 6:29-30)

3820

Dong wuwinyo yam ka kiwaco ni, ‘Wang kiculu ki wang, lak kiculu ki lak.’ 39Ento an awaco botwu ni: pe icul kwor ikom dano mo ma otimo gin marac ikomi. Kace ngat mo odongo lemi tung lacuc, lok bote lemi tung lacam wek odong bene; 40dok kace ngat mo mito pido kwedi ni wek eter kotini, ci miye kanyini bene. 41Kace dano mo odiyi tektek ni iting yece icit kwede i wot me mairo acel, wot kwede wot me mairo aryo. 42Ka dano mo olegi gin mo ci myero imiye, dok bene pe myero ikwer pi den bot ngat ma mito deno jami ki boti.

Maro lukworwa

(Luk 6:27-28,32-36)

4321

Dok wuwinyo bene ka yam kiwaco ni, ‘Mar lawoti ento ikwer lakwori.’ 44Ento an awaco botwu ni, ‘Wumar lukworwu, dok bene wuleg Lubanga pi jo ma keto ayelayela ikomwu,’ 45wek wudok lutino pa Wonwu matye i polo. Pien en miyo ceng tuc bot jo maracu ki jo mabeco bene, dok miyo kot cwer bot dano ma kitgi atir, ki bot jo ma pe kitgi atir bene. 46Pien ka wumaro jo ma marowu keken, ci wubinongo iye kit pwoc ango? Lujog mucoro kono pe gitimo kitmeno? 47Kace imoto utmegini keken, ci nongo itimo gin ango maber makato jo mukene? Lurok ma pe gingeyo Lubanga ni bene pe gitimo kitmeno? 4822 Wubed jo ma bal mo peke ikomwu, kit macalo Wonwu matye i polo bal mo pe ikome ni.”