Matayo 3

Lok ma Jon Labatija otito

(Mar 1:1-8; Luk 3:1-9,15-17; Jon 1:19-28)

1Ikare meno Jon Labatija obino kun tito lok i tim me Judaya. 21 En owaci, “Wunguti, pien ker me polo dong onyiko cok.” 32 Jon en aye dano mayam lanebi Icaya otito pire ni,

“Dwon dano mo ma dange i tim ni,

‘Wuger yo pa Rwot,

wutir yone ocung ma atir.’” 43

Jon yam onongo ruku bongo yer kinaga, kun tweyo pyere ki del, dok camo bonyo ki moo kic ma i tim. 5Jo mapol gua ki i Jerucalem, ki lobo Judaya ducu, ki lobo ducu matye cok ki Jordan, gumol gubino bote. 6Gutucu balgi, ci en obatijagi i kulu Jordan. 74

Ento ikare ma en oneno Luparicayo ki Lucadukayo gibino kun gimito ni en e batijagi, ci en owaco ni, “Wun lutino twol ororo, anga ma owaco botwu ni myero wuring woko ki i akemo pa Lubanga matye ka binoni? 8Dong wutii gin ma nyutu ni wungut ikom balwu, 95 pe dok wucak tamo ni, ‘Watye ki kwarowa Abraim.’ Kong wunen awaco botwu ni, Lubanga tye ki twero me miyo gweng magi loke doko likwayo Abraim. 106 Kombedi dong kiketo latong woko ilwit yadi, yat acel acel ma pe nyako nyige mabeco, kitongo kireto woko piny, ci kibolo woko i mac.

11An abatijawu ki pii pi nyutu ni dong wungut woko ikom balwu, ento ngat ma bino luba ni tek kata woko; pe amyero me mako war tyene. En bibatijawu ki Cwiny Maleng, dok ki mac bene. 12Oderone tye i cinge me pyeto ngano, en biyubu larone woko maber, ci bicoko nganone bidilo i dero, ento cunge en biwango woko ki mac ma pe to.”

Jon obatija Yecu

(Mar 1:9-11; Luk 3:21-22)

13Yecu oa ki i Galilaya obino bot Jon i dog kulu Jordan, wek Jon obatija en. 14Jon onongo mito kwero woko, owaco bot Yecu ni, “Amito ni, in aye ibatija an, ento in dok ibino bota ni an aye abatija in?” 15Ento Yecu odoke iye ni, “Wek kong dong obed kitmeno kombedi, pien pore botwa me cobo gin ducu matye atir.” Jon ocako ye loke. 16Ikare madong kityeko batija Yecu, ci en okati woko ki ipii. Cutcut polo oyabe, ci oneno Cwiny Maleng pa Lubanga ma bino kun lyane piny macalo akuri, ci opye ikome. 177 Ci dwon ocako winye ma a ki i polo ma waco ni, “Man aye Woda ma amaro, ma cwinya yom ikome mada.”