Matayo 2

Luryeko gucito kalimo latin Yecu

1Ma dong kinywalo Yecu i Beterekem ma i Judaya ikare me loc pa rwot Kerode, luryeko mogo ma co gua tung kunyango gubino i Jerucalem, kun gin penyo ni, 2“En latin ma kinywalo me bedo Rwot pa Lujudaya ni tye kwene? Pien onongo waneno lakalatwe manyutu nywale tung kunyango, ci wan wabino ka wore.”

3Ikare ma rwot Kerode owinyo lok man, cwinye opoto matek, kadi wa jo Jerucalem bene ducu cwinygi opoto matek. 4Man omiyo rwot Kerode ocoko ajwaki madito ki Lupwonycik me rokgi ducu, ci openyogi ni, “Kricito mono kibinywalo kwene?” 5Gin gudoke iye ni, “I Beterekem ma i Judaya, pien lanebi yam ocoyo ni, 61

‘In Beterekem ma i lobo me Judaya,

in pe itidi tutwal ki ikin luloc me Judaya;

pien laloc bia ki i in,

en aye ma biloyo jona jo Icrael.’”

7Ci Kerode olwongo luryeko i mung, guniange kun gitite kare ma lakalatwe onen iye. 8Ka dong ocwalogi me cito i Jerucalem kun waco botgi ni, “Wucit wupeny lok kom latin man maber kore kikore, ce ka wunonge ci wudwoka loke, wek an bene acit awore.” 9Ikare madong guwinyo lok pa rwot Kerode, gucito ki yoogi ci guneno lakalatwe mayam kong guneno tung kunyango ca otelo nyimgi, obino ocung ki malo wa i kabedo kama onongo latin man tye iye. 10Ma guneno lakalatwe meno, cwinygi obedo yom adada. 11Madong gudonyo i ot, guneno latin kacel ki mine Maliam, cutcut guryebe piny guwore. Gugonyo yecgi ma onongo tye iye lonyo madwong, ci gumiye mot, jabu ki odok luban ki murra. 12Lacen, Lubanga ocikogi ni pe gudok cen ki korgi bot Kerode, ci gudok tugi ma kun gilubu yoo mukene.

Lunyodo pa Yecu guringo gularo Ejipt

13Ikare ma luryeko gucito woko, ci lamalaika pa Rwot onen bot Yucepu iwang lek kun waci, “Aa malo, i kwany latin ki mine, iring ilar kwedgi Ejipt, ci wubed kunu nio wang ma awaco lok botwu, pien Kerode dong cok yenyo latin man wek enek woko.” 14Ci Yucepu oa malo okwanyo latin ki mine ki dyewor, ocito kwedgi i Ejipt; 152 gubedo kunu nio ka Kerode oto. Man otime wek lok mayam Rwot oloko ki i dog lanebi ni ocobe kakare ni; “Yam alwongo Woda nia ki i Ejipt.”

Neko lutino matino

16Ikare ma Kerode dong oniang ni luryeko gutimo ryeko ikome, akemo omake matek tutwal, ci ocwalo dano guneko lutino co woko ducu ki i Beterekem kacel ki i kabedo ducu ma orumu kenyo, cake ki ikom lutino me mwaka aryo dok kwede piny, kun poro ki kit kare mayam luryeko guniange pire ca. 17Man omiyo lok mayam lanebi Jeremia oloko ocobe kakare ni, 183

“Koko owinye ki i Rama,

kumu ki koko lyel;

Lakeri onongo kok pi lutinone.

Okwero woko ni pe myero

gikwe cwinye,

pien lutinone dong gipeke.”

Yucepugi gudwogo cen ki i Ejipt

19Ikare madong Kerode oto woko, lamalaika pa Rwot onen bot Yucepu iwang lek ki i Ejipt, kun wace ni; 20“Aa malo, kwany latin ki mine, ci idok kwedgi cen i lobo Icrael, pien jo ma onongo nene gimito neko latin ni dong guto woko.” 21Ci Yucepu oa okwanyo latin ki mine odok kwedgi cen i lobo Icrael. 22Ento ka Yucepu owinyo ni Arkelao aye dong tye kaloc i Judaya ma ka wone Kerode, lworo omake me dok kunu; ento kit ma Lubanga ocike iwang lek omiyo owoto ocito i Galilaya. 234 En ocito obedo i taun ma nyinge Najaret, wek gin mayam lunebi guloko ocobe kakare ni, “Kibilwonge ni Lanajaret.”