Matayo 1

Kwari pa Yecu Kricito

(Luk 3:23-38)

1Jo magi aye gubedo kwari pa Yecu Kricito, ma lakwar Daudi, lakwar Abraim.

2Abraim onywalo Icaka, Icaka onywalo Yakobo, Yakobo onywalo Juda ki omegine; 3ka dong Juda ki Tamar gunywalo Perej ki Jera, ci Perej onywalo Kejeron, Kejeron onywalo Aram; 4ci Aram onywalo Aminadab, Aminadab onywalo Nakucon, ka Nakucon onywalo Calmon; 5Calmon ki Rakab gunywalo Boaj, ci Boaj ki Ruth gunywalo Obed, ki Obed onywalo Yece; 6ka Yece onywalo rwot Daudi.

Daudi ki dako pa Uria gunywalo Solomon; 7ci Solomon onywalo Rekoboam, Rekoboam onywalo Abija, Abija onywalo Aca; 8Aca onywalo Yekocapat, Yekocapat onywalo Joram, Joram onywalo Ujia; 9Ujia onywalo Jotam, Jotam onywalo Akaj, Akaj onywalo Kejekia; 10Kejekia onywalo Manace, Manace onywalo Amoc, Amoc onywalo Jocia; 111Jocia onywalo Jekonia ki omegine, ikare ma kiterogi woko kwede i Babilon.

12Lacen ma onongo dong kiterogi woko i Babilon, Jekonia onywalo Cealtiel, ci Cealtiel onywalo Jerubabel; 13Jerubabel onywalo Abiud, ka Abiud onywalo Eliakim, Eliakim onywalo Ajor; 14Ajor onywalo Jadok, Jadok onywalo Akim, Akim onywalo Eliud; 15Eluid onywalo Eleajar, Eleajar onywalo Matan, Matan onywalo Yakobo; 16Yakobo onywalo Yucepu cwar Maliam ma obedo min Yecu ma kilwongo ni Kricito.

17Kitmeno kwari ducu mayam kinywalogi cake ki ikom Abraim nio kwede ikom Daudi, ducu onongo welgi romo apar wiye angwen, dok cake ki ikom Daudi nio wa ikare mayam kiterogi kwede i Babilon, onongo romo kwari apar wiye angwen, dok cake ikare ma kiterogi kwede i Babilon nio kwede wa ikom Kricito romo kwari apar wiye angwen.

Kit ma kinywalo kwede Yecu Kricito

182

Man aye obedo kit mayam kinywalo kwede Yecu Kricito. Ikare ma mine Maliam dong Yucepu ocunu oye, ma peya kin gi orwate, kinongo ni Maliam tye ki ic pa Cwiny Maleng. 19Cware Yucepu yam onongo obedo dano ma kite atir, ci pe obedo ki cwiny me keto lewic iwi Maliam; ento onongo mito ni eryem woko lalingling i mung. 20Ento ikare ma onongo Yucepu pud tye kalwodo lok meno ki i cwinye, ci cutcut lamalaika pa Rwot onen bote iwang lek, kun wace ni, “Yucepu, lakwar Daudi, pe ilwor kwanyo Maliam me bedo dakoni, pien ic ma en tye kwedeni obedo ic pa Cwiny Maleng. 213 En binywalo latin awobi, ibicako nyinge Yecu, pien bilaro dano ki ibalgi.” 22Lok man ducu otime wek lok pa Rwot ocobe kakare kit macalo yam oloko i dog lanebi kit man;

23“Nen, nyako mo ma peya ongeyo laco biyac,

binywalo latin ma laco,

kibicako nyinge Emmanuel. Ma teloke ni, Lubanga tye kwedwa.”

24Ikare ma Yucepu oco ki iwang nino, otimo kit macalo lamalaika pa Rwot ocike kwede; okwanyo dakone otero bote, 254 ento pe obedo kwede, nio wa ikare madong kinywalo latin. Yucepu ocako nyinge Yecu.