Malaki 4

Nino pa Rwot tye kabino

1Rwot me mony waco kuman ni, “Nino bibino ma wang calo keno ma mac tye iye; ci jo ma wake, ki lutim maracu ducu gibidoko calo reng kal. Inino ma bibinoni kibiwangogi woko, pe dok kibiwekogi kadi lwitgi nyo kadi wa janggi. 2Ento pi wun jo ma wulworo nyinga, tek me lar ma mera bibino ikomwu macalo ceng ci bikelo gin me cango dano ki i derone. Wun wubibedo agonya dok ki yomcwiny madwong macalo roci ma gikato woko kun gia ki i dwol. 3Wubinyono jo maracu piny, ci gibidoko calo putu matye ite tyenwu, inino ma abitic iye.

4Wupo ikom pwony pa latica Moses. Cik ki gin ducu mayam acike kwede botwu ki i Koreb pi jo Icrael ducu ni wek gulub. 51

Nen, abicwalo lanebi Eliya botwu, ma peya nino pa Rwot oo, en nino madit ki dok ma bikelo lworo bot lwak. 6Ci en biloko cwiny wegi lutino ikom lutinogi ki cwiny lutino ikom wegigi, wek pe abin abal lobogi woko macalo gin ma kiceno.”