Malaki 3

11

Lubanga ogamo ni, “Nen, abicwalo lakwenana cito anyim kayubu yona ma peya abino, dong Rwot ma wuyenyoni bibino oyotoyot i Ot mere. Lakwena me gicike ma cwinywu yom ikome, nen, en bibino.” 22

Ento nga ma bitwero ciro nino me binone, dok anga matwero cung ka en binen? Pien en tye macalo mac me lalii ryal, ki dok calo cabun pa lalwok bongi. 3En bibino ka ngolo kop macalo ngat ma liyo ryal wek obed maleng, ki bilonyo likwayo pa Levi, dok bilonyogi gidoko leng macalo dano ma liyo ryal ki jabu, nio wang ma gibityero macalo gityer ma myero bot Rwot. 4Lacene gityer pa jo Juda ki gityer pa jo Jerucalem biyomo cwiny Rwot macalo ikare macon kit ma i mwaka mapol ma okato angec.

5Rwot waco kuman ni, “Abinyiko cok botwu pi ngolo kop; ki bene abibedo caden ma kome mit ikom lutal, ki ikom lutim abor, ki ikom jo ma kwongo kwong goba, ki ikom jo ma buru lupakaca pi mucaragi, ki ma buru mon to ki lutino kic, ki ikom jo ma ryemo lubedo ma ikin gi gicwalogi woko cen, kun pe gilwora.”

Culu dul acel me apar

6Rwot waco kuman ni, “An a Rwot, ma pe aloke; pimeno wun likwayo pa Yakobo peya kityekowu. 7Nia ikare pa kwariwu wungak ki i cik mera, pe wugwokogi. Wudwog cen bota, ci an bene abidwogo botwu. Ento wuwaco ni, ‘Wabidwogo ningning?’ 8An apenyowu ni, ‘Ber ki dano mono me yako Lubanga?’ Ento wun wuyaka. Dok wuwaco ni, ‘Wayaki ningning?’ Wun wuyaka i dul acel me apar ki i gityer mewu. 9Kicenowu woko dong ki cen, pien wun kacel ki rok mewu ducu wutye kayaka. 103Wukel dul acel me apar i ot ma mera, wek cam obed tye i oda; ka dok wutema, wek wunen ka pe dong abiyabo botwu wang dirica me polo, wek aony gum ma opong madwong ikomwu, man lok ma an Rwot me mony aye awaco. 11Ci abijuku wa bonyo, wek pe otyek cam ma ocek i potiwu; nyig olokwu bene pe bibale. 12Ci bimiyo dano me rok ducu gibilwongowu ni jo ma komgi gum, pien wubibedo i lobo ma cwinywu yom.”

Cike pa Lubanga pi Kica

13Rwot me mony waco kuman ni, “Wuloko gin marac ikoma. Dok bene wun wuwaco ni, ‘Waloko ikomi ningo?’ 14Wun wuwaco ni, ‘Woro Lubanga konye peke. Dok cobo cikene nyo bedo inyim Rwot me mony macalo jo ma kwero cola kono konyowa ki gin ango? 15Nia kombedi wan dong wabineno ni jo ma giwakeni aye gin lugumkom; dok lutim gin maracu aye limgi nya; pe meno keken, kadi ka gitemo Lubanga, gibwot gire.’”

16Ci ikare meno jo ma gilworo Rwot guloko ki luwotgi; Rwot otero ite, ci owinyogi. Kicoyo buk me po ikom jo mayam gilworo Rwot dok ma gitamo pire. 17Ci Rwot waco ni. “Gibibedo mera, mera kikome, inino ma abitic iye, dok abitimogi kica macalo dano timo kwede kica ki wode ma tiyo bote. 18Ma omiyo wubipoko kin jo ma kitgi atir ki jo maracu, ki kin jo ma gitiyo bota ki jo ma pe gitiyo bota.”